Nyuma yo gukubita MacGregor, Mayweather yashyikirijwe sheki ya miliyoni 350 z’amadolari

Yanditswe na Manzi Rema Jules
Kuya 28 Kanama 2017 saa 11:39
Yasuwe :
0 0

Floyd Mayweather wanditse amateka yari atarakorwa n’undi muntu wese mu mukino w’iteramakofe yo kumara imikino 50 ataratsindwa na rimwe, yashyikirijwe sheki ya miliyoni 350 z’amadolari nyuma yo gukubita Conor McGregor.

Uyu Munyamerika wari umaze umwaka urenga yarasezeye ku mukino w’iteramakofe, mu rukerera rwo kuri iki Cyumweru, tariki ya 27 Kanama 2017, yongeye kugaruka mu kibuga kurwana na MacGregor w’imyaka 29 ukomoka muri Ireland, umenyerewe mu mukino w’abaterana amakofe ariko banagundagurana (Mixed Martial Arts -MMA).

Ni umurwano wateguwe ku busabe bw’uyu MacGregor wemezaga ko kuba Mayweather yarasezeye iteramakofe akinnye imikino 49 ataratsindwa na rimwe ari uko yagiye ahura n’abakinnyi boroshye bityo yifuza kuba uwa mbere umutsinze gusa inzozi ze ntizabaye impamo.

Uyu mukino wari umaze igihe kinini utegerejwe wabereye i Las Vegas mu nzu y’imikino yitwa T-Mobile watangiye bigaragara ko MacGregor ashobora gukabya inzozi ze kuko round eshatu za mbere, yazitsinze bigaragara ko arusha cyane Mayweather gusa kuva kuya kane kugera kuya cyenda, imbaraga zari zashize kuko yakubitwaga umusubirizo. Bigeze ku ya 10, umusifuzi ahitamo gusoza umukino nyuma yaho MacGregor yari yananiwe cyane.

Mayweather uzwi cyane nka “Money” yatsindaga umukino wa 50 akaba yahise aba umukinnyi wa mbere mu mateka y’iteramakofe ubikoze kuko uwari ufite agahigo ari Rocky Marciano wakinaga iteramakofe ry’abafite ibiro byinshi wasezeye amaze gutsinda 49.

Money yahise anashyikirizwa sheki y’akayabo ka miliyoni 350 z’amadorali ya Amerika, akabakaba miliyari 295 mu mafaranga y’u Rwanda, ndetse nk’uko asanzwe abikora, aho akunda kugaragara aryamye mu mafaranga, cyangwa abyinana n’abakobwa ayabasukaho, kuri iyi nshuro akaba yayerekanye abinyujije ku rubuga rwe rwa instagram.

Umurwano ukirangira Mayweather yashyikirijwe miliyoni 100 z’amadorali ya Amerika ariko agomba guhabwa izindi 250 nyuma y’uko ayinjiye ku matike yagurishijwe, ayavuye mu mateleviziyo n’ahandi azaba amaze kumenyekana.

MacGregor we yahawe agera kuri miliyoni 30 z’amadorali ya Amerika, akaba ari hafi inshuro 10 z’ayo asanzwe akorera mu iteramakofe ry’abagundagurana yari asanzwe akina gusa bikaba binitezwe ko ashobora kuzongerwa izindi 45 akaba yatahana miliyoni 75 z’amadorali ya Amerika muri rusange.

Mayweather wahise asezera ku mukino w’iteramakofe yavuze ko naramuka abonye amahirwe yo guhanganira miliyoni 300 z’amadorali ya Amerika mu gihe cy’iminota 36 atazayitesha.

Floyd Mayweather yahise ashyikirizwa sheki ya miliyoni 100
Mayweather ahobera umwe mu bo bakorana nyuma y'umurwano
Mayweather yasezeye ku mukino w'iteramakofe amaze gukina imikino 50 ataratsindwa
Umukandara Mayweather yashyikirijwe nyuma yo gukubita MacGregor

Reba andi amafoto yaranze umurwano wa Mayweather na MacGregor

Mayweather yaciye agahigo ko kuba mu buzima bwe ataratsindwa na rimwe. Umukino wa MacGregor wari uwa 50 ari nawo wa nyuma nk'uko yabitangaje
Nyuma y'umukino, bombi bahoberanye bishimira ibyo bari bamaze kwereka abafana
Mayweather na se bishimira intsinzi
Yahawe umudali ukoze mu ruhu rw'ingona
MacGregor yakubiswe kugeza ubwo imbaraga zimushirana
Kuva kuri Round ya kane, ibintu byari byakomereye MacGregor
Wari umukino urimo imbaraga kuko hari aho aba bagabo bombi bageraga bagahangana cyane bigasaba ko umusifuzi abatandukanya
Muri round za mbere, Mayweather yari yugarijwe
MacGregor yatangiye yifitiye icyizere ari nako aseka mugenzi we bari bahanganye
Round za nyuma zari indyankundye kuri MacGregor
Mayweather yageze aho atangira gukubita MacGregor atababariye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza