Rusizi: Umukino wa Boneza Ball wahimbwe n’Umunyarwanda bwa mbere wakinwe n’abafite ubumuga

Yanditswe na Ishimwe Israel
Kuya 17 Kamena 2017 saa 10:29
Yasuwe :
1 0

Umukino Boneza Ball ufite umwihariko ku isi wahimbwe n’Umunyarwanda Jonas Ngirinshuti, bwa mbere kuva mu myaka ibiri utangiye gukinwa wahuje abo mu cyiciro cy’abafite ubumuga bo mu Karere ka Rusizi na Nyamasheke.

Uyu mukino wa gicuti wabereye ku Kigo cy’Urubyiruko cy’Akarere ka Rusizi giherereye mu murenge wa Gihundwe, ku wa Kane, tariki ya 15 Kamena 2017, wahuriranye n’ibirori byo kwitegura umunsi w’umwana w’Umunyafurika wizihirijwe mu Karere ka Rusizi. Warangiye ikipe ya Espérance BOBAC yo muri Rusizi inyagiye Abakosozi BOBAC y’i Nyamasheke ibitego 21 kuri 11.

Umwe mu bafite ubumuga mu Karere ka Rusizi, Renzaho Vincent, yatangaje ko uyu mukino ubafasha kwidagagadura ndetse no gusabana. Yagize ati “Uyu mukino ni mwiza kuko uduhuza kandi ukadufasha kwidagadura na bagenzi bacu tutari duherukanye.”

Umuyobozi washinze Boneza Ball, Jonas Ngirinshuti, yatangarije IGIHE ko uyu mukino wahuje abafite ubumuga wavuye mu busabe bwabo bagaragaje ko bafite inyota yo kwidagadura.

Yagize ati “Abafite ubumuga batugaragarije ko bakunda umukino ariko bazitirwa no kubona amakipe bakina na yo. Basabye ko bibaye byiza ukagezwa ku rwego rw’igihugu byabafasha kwiteza imbere no kumva ko bataheranywe n’agahinda.”

Ngirinshuti atangaza ko mu ntangiriro bitari byoroshye ariko yishimira intambwe Boneza Ball imaze gutera.

Ati “ Nubwo byangoye gushyira uyu mukino mu bikorwa ariko ndabona uri kugenda utera imbere mu mpande zose kandi ndizera ko nzagera ku ntego n’indoto zanjye.”

Ngirinshuti wahimbye uyu mukino usanzwe ari umunyabugeni ushushanya akaba n’umuhanzi uririmba indirimbo zihimbaza Imana, yatangaje ko n’ubwo uyu mukino atarawumurika ku rwego rw’igihugu afite icyizere ko uzemerwa n’inzego zibifitiye ububasha.

Ati “Twanyuze mu nzira zemewe n’amategeko twandikisha uyu mukino kandi hari icyizere ko uzarushaho gutera imbere ku buryo ushobora no kwemerwa ukajya ukinwa mu mikino mpuzamahanga ya Paralympic. Nkiwutangira abantu barambwiye bati bizakugora kuko uwutangiriye mu Rwanda ariko mbagaragariza ko gahunda ya Made In Rwanda nayo igomba kwimakazwa. Mu minsi ishize hari abanyamahanga babiri bo muri Canada baje kuwukina badusaba imipira ngo na bo bazajye kuwigisha abana babo.”

Umukino w’abafite ubumuga wakurikiwe n’uwahuje ikipe ya High Speed BOBAC na Inganzo BOBAC, warangiye amakipe yombi anganya 4-4.

Boneza Ball ni umukino wavuye ku gitekerezo Ngirinshuti yagize mu nzozi mu 2011; ateganya gutangira kuwigisha mu bigo by’amashuri no mu by’urubyiruko hagamijwe kuwusakaza hose.

Ubu ukinwa n’amakipe 11 mu Rwanda, arimo ane y’i Rusizi, atanu yo muri Nyamasheke, imwe y’i Nyanza n’indi ikinira ku Kimisagara mu Mujyi wa Kigali. Kuva uyu mukino watangira gukinwa mu 2015, hateguwe amarushanwa ane, arimo iry’umurimo, gushishikariza urubyiruko kwihangira imirimo n’ayandi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza