U Rwanda rwatangiye neza mu gushaka itike y’igikombe cy’Isi cya Cricket

Yanditswe na Eric Tony Ukurikiyimfura
Kuya 6 Gicurasi 2019 saa 07:25
Yasuwe :
0 0

Ikipe y’u Rwanda y’abagore yatangiye neza mu mikino nyafurika yo gushaka itike y’igikombe cy’Isi mu mukino wa Cricket, aho yatsinze Nigeria ku manota 37 mu mukino wayo wa mbere wo mu itsinda A ry’imikino iri kubera muri Zimbabwe guhera kuri iki Cyumweru.

Mbere y’uko umukino utangira, abakapiteni b’amakipe yombi babanje gutombora kugira ngo hamenyekane ikipe ibanza gutera udupira indi ikadukuramo. U Rwanda rutombora kubanza gutera udupira.

Ikipe y’u Rwanda yakoze amanota 101 muri dupira 120 mu gihe abakinnyi basohowe mu kibuga ari Iriho Veronique, Ishimwe Dusabemungu , Ingabire Sifa, Bimenyimana Marie Diane, Ishimwe Gisèle na Ishimwe Henriette wanabaye umukinnyi w’umukino nyuma yo gukora amanota 26.

Nigeria yateye udupira nyuma, yagombaga gukuramo aya manota yose kugira ngo ibashe gutsinda uyu mukino, igakora ikinyuranyo cy’inota rimwe gusa ntibyaboroheye kuko mu dupira 102 yakozemo amanota 66 mu gihe hasohotse abakinnyi icyenda ku ruhande rwayo.

Umutoza w’ikipe y’igihugu y’u Rwanda, Joshua Mwanja, yishimiye gutsinda umukino wa mbere, avuga ko bibongerera ingufu zo kwitwara neza mu yindi mikino.

Ati” Twishimiye gutsinda uyu mukino wa mbere, biraduha imbaraga n’icyizere tuzajyana mu yindi mikino itatu dusigaje. Abakinnyi banjye bitwaye neza cyane uyu mukino.”

Muri iri rushanwa riri kubera muri Zimbabwe guhera kuri iki Cyumweru kugeza tariki ya 12 Gicurasi, u Rwanda ruri mu itsinda A hamwe na Zimbabwe, Tanzania, Nigeria na Mozambique mu gihe itsinda B rizaba rigizwe na Uganda, Kenya, Namibia na Sierra Leone.

Ku mukino wa kabiri, ikipe y’u Rwanda y’abagore izahura n’iya Mozambique ku wa Gatatu tariki ya 8 Gicurasi.

Iyi mikino igamije gushaka itike y’igikombe cy’Isi cya 2019 ‘Women’s T20 World Cup Qualifier’ iteganyijwe kubera muri Écosse guhera tariki ya 31 Kanama kugeza ku ya 7 Nzeli. Bangladesh, Irlande, Écosse na Thaïlande ni bimwe mu bihugu bizayitabira.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza