Kwamamaza

Umukino w’iteramakofe wahenze mu mateka y’Isi ushobora gusubirwamo

Yanditswe kuya 8-11-2016 saa 09:14' na Manzi Rema Jules


Umunya- Philippines, Manny Pacquiao yatangaje ko yiteguye kongera kurwana n’Umunyamerika Floyd Mayweather wamutsinze mu murwano wahenze kurusha indi ndetse ugasiga uduhigo mu mateka y’umukino w’iteramakofe ku Isi.

Uyu mukino hagati y’aba bombi wabaye kuya 2 Gicurasi 2015 i Las Vegas muri Amerika.

Pacquiao w’imyaka 37 yavuze ko yiteguye kwihorera kuri Floyd Mayweather, ubwo yari amaze gutsinda undi Munyamerika ariko ufite inkomoko muri Mexique, Jessie Vargas kuri iki Cyumweru mu murwano wabereye i Las Vegas.

Yagize ati “Nitwongera kurwana nzakoresha imbaraga zanjye zose ntsinde mbashe kwigarurira icyizere cy’abafana. Sinzongera kubatenguha ku yindi nshuro niturwana, ndabizeza kuzawishimira. Icyo nicyo mbagomba.”

Pacquiao watsinze Vargas mu maso ya Mayweather wari waje kureba uwo murwano yatangaje ko ikimushishikaje cyane kongera kurwana n’uyu Munyamerika wamaze guhagarika gukina iteramakofe, atari amafaranga menshi ashobora kubona ahubwo ari ukubaha ibyifuzo by’abafana.

Ati “Niba abafana babishaka kuki bitaba! Amasezerano y’agaciro mfite ni ayo mfitanye n’abafana. Amafaranga sicyo cya mbere, ishema no guha abafana ibyishimo nibyo biruta ibindi.”

Mu gihe umukino wabahuje muri 2015 wasize amateka n’uduhigo tutari duke dore ko bwari ubwa mbere umukinnyi utsinze ahabwa miliyoni 150 z’amadolari ya Leta Zunze Ubumwe za Amerika utsinzwe agahabwa miliyoni 100, uyu wa kabiri ushobora guca ako gahigo kuko Mayweather yahabwa miliyoni 210 naho Pacquiao agahabwa 120.

Pacquiao bakunze kwita Pacman ni umugabo ufite abana batanu, asanzwe ari Umusenateri iwabo muri Philippines ndetse ni umukristo wo mu idini ry’abaporotesitanti ukomeye cyane ariko akaba yari n’umusirikare ufite ipeti rya Lieutenant Colonel mu ngabo za Philippines.

Mayweather w’imyaka 39, watwaye ibihembo by’Isi bikomeye nka WBA na WBC, yasezeye amaze gutsinda imikino 49 yose yakinnye abura umuntu n’umwe ku Isi umutsinda kuko na Pacquiao wabigerageje yatsinzwe ku manota 118-110, 116-112, 116-112.

Aba bagabo bombi uretse kuba barahuriye mu mukino w’ikinyejana, warushije indi yose yabayeho guhenda no gukurikirwa n’amamiliyoni w’abantu ku Isi, ni bamwe mu bafite amateka akomeye cyane kuko nka Mayweather mu mikino 49 yakinnye afite agahigo ko kuba ataratsinzwe na rimwe mu gihe, Paquiao we yakinnye 67 atsindwa itandatu gusa.

Igihe uyu mukino ushobora kubera ntikiramenyekana ndetse Mayweather ntaremeza ko abyiteguye nubwo kuba kuri iki cyumweru yaritabiriye ubutumire bwa Pacquiao byatumye ibitangazamakuru bihamya ko bishoboka ko azemera bakarwana.

Inkuru bifitanye isano: Mayweather yegukanye intsinzi mu mukino ukomeye mu mateka y’iteramakofe

Manny Pacquiao na Floyd Mayweather baheruka guhura muri 2015, mu mukino wahenze cyane mu mateka y'iteramakofe
Manny Pacquiao ahanganye n'Umunyamerika Jessie Vargas
Pacquiao (iburyo) yongeye kwitwara neza atsinda Vargas mu irushanwa ritegurwa na WBO (World Boxing Organization)
Pacquiao ati " Niba abafana babishaka nzongera mpangane na Floyd Mayweather"
Manny Pacquiao yishimira intsinzi nyuma yo gutsinda Jessie Vargas

Amafoto yaranze umukino wa Mayweather na Pacquiao muri Gicurasi 2015

Mayweather agirwa inama na se usanzwe umutoza
Pacquiao agirwa inama n'umutoza we
Ingume zavuzaga ubuhuha
Abafana 16,500 bari mur MGM Grand Garden Arena
'Jesus is the name of the Lord' niyo magambo yari yanditse ku mupira w'umukirisitu Manny Pacquiao
Mayweather yinjira muri Ring
Jamie Foxx yatangiye aririmba indirimbo yubahiriza igihugu
Indege z'abaje kureba umurwano zari nk'isenene
Beyonce Knowles na Jay Z bari bitabiriye uwo murwano

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved