Bazwi mu buyobozi bukuru, banabaye abakinnyi bakomeye

Bazwi mu buyobozi bukuru, banabaye abakinnyi bakomeye


Yanditswe kuya 28-03-2013 - Saa 14:07' na Karirima A. Ngarambe

Imikino ihuza abantu, bagahuza urugwiro kandi hakabamo kubahiriza amategeko. Umunyapolitiki wabaye umukinnyi biramufasha cyane kuko muri politiki habamo ubushishozi n’indangagaciro biba no mu mikino. Hari byinshi abakinnyi ndetse n’abanyapolitiki bahuriraho birimo nko kugira ubworoherane, gushishoza, gukorera hamwe no kubona umuti w’ikibazo runaka.

Bamwe mu bayobozi bakuru b’igihugu cyangwa se abayibayemo usanga barakunze kuba mu makipe y’aho bigaga kandi yari akomeye abandi bakaba barakinnye mu makipe y’igihugu.

Imikino twibandaho ni iy’intoki ari yo Volleyball na Basketball, bakinaga bakiri mu mashuri yaba ayisumbuye ndetse na za Kaminuza. Nyuma bagiriwe icyizere bajya mu nzego nkuru z’ubuyobozi bw’igihugu.

Dr Jean Damascene Ntawukuriryayo

Dr Jean Damascène Ntawukuriryayo, Perezida wa Sena akaba yarabaye Minisitiri w’ubuzima, yabaye Minisitiri w’Ibikorwaremezo, aba Umunyamabanga wa Leta Ushinzwe amashuri makuru n’ubushakashatsi mu by’ubuhanga, yabaye kandi Umuyobozi wungirije wa Kaminuza Nkuru y’u Rwanda. Mbere yo kujya muri Sena yari Visi Perezida w’Inteko Ishinga Amategeko, Umutwe w’Abadepite.

Yamenyekanye cyane mu ikipe ya Basketball ya Kaminuza Nkuru y’u Rwanda mu 1980.

Senateri Bernard Makuza

Senateri Bernard Makuza, Visi Perezida wa Sena. Yabaye Minisitiri w’Intebe w’u Rwanda kuva mu 2000 kugeza mu 20011. Yabaye kandi Ambasaderi w’u Rwanda mu Burundi no mu Budage. Yabaye Umukinnyi wa Volleyball mu ikipe ya Seminari Nto y’i Kabgayi. Ageze muri Kaminuza Nkuru y’u Rwanda i Ruhande, yakomeje gukina ndetse aba na Kapiteni w’ikipe yahoo kugeza arangije. Si Volleyball gusa kuko ubu ni Kapiteni w’ikipe y’umupira w’amaguru y’Inteko Ishinga Amategeko y’u Rwanda.

Depite Agnes Mukazibera

Depite Mukazibera agnès yamenyekanye cyane mu ikipe ya Volleyball y’abakobwa y’Ishuri Nderabarezi rya Kibuye, akina no mu ikipe y’igihugu y’Abakobwa nyuma y’aho aviriye kwiga muri Kaminuza muri Côte d’Ivoire mu mwaka wa 1994. Nyuma yagiye gukomeza amashuri muri Kaminuza i Dakar muri Senegal mu 1996. Yabaye kandi umunyamabanga mukuru muri Minisiteri ya siporo n’umuco.

Senateri Charles Uyisenga

Senateri Uyisenga Charles yatangiye gukina Volleyball mu mashuri y’isumbuye i Save mu 1967, yanakiniye Kaminuza Nkuru y’u Rwanda mu 1972 kugeza mu 1975, akaba yari n’umukinnyi ubwo yigaga muri Kaminuza ya Dakar muri Senegali mu 1976 kugeza mu 1979.

Yabaye umuyobozi w’ishyirahamwe ry’umukino wa Volleyball kuva mu 1984 kugeza mu 1993 yongera gutorwa mu 2009 kugeza 2012. Yabaye kandi Umuyobozi Mukuru w’Ubushyinguranyandiko bw’Igihugu mbere yo kwerekeza muri Ambasade y’u Rwanda mu Budage no mu Bubiligi. Yakoze muri Minisiteri y’Ububanyi n’amahanga, akora no mu Biro bya Minisitiri w’intebe, aba na Komiseri muri Komisiyo y’Igihugu y’Amatora.

Ambasaderi Ntwari Gerard

Ntwari Gérard wahagarariye u Rwanda mu bubiligi ubu akaba ari Ambasaderi mu gihugu cya Sénégal wamenyekanye muri Basket y’ikipe ya Kaminuza y’u Rwanda i Nyakinama.

Ambasaderi Joseph Habineza

Ambasaderi Joseph Habineza , yatangiye kuba umukinyi mu rwego rw’amarushanwa (championnat) mu 1984. Yakiniye ikipe y’aho yigaga mu Byimana, akinira UNR, Electrogaz Volley-ball club, USBAM mu Bufaransa i Montpellier yaje no gukinira ikipe ya KVC aho hose yagiye agirwa na kapiteni.

Politiki ayitangira mu 2004, aho yayoboye Minisiteri y’umuco na Siporo ubu akaba ahagarariye u Rwanda muri Nijeriya. We atangaza ko kuba umukinnyi hari icyo bifasha mu buzima bw’akazi ka politiki.

Habineza agira ati “kuba umunyapolitiki warabaye n’umukinnyi birafasha cyane, kuko muri politiki hari ubushobozi n’indangagaciro ugomba kugira usanga mu bakinnyi muri rusange.”

Urugero yatanze ni nko kugira ubworoherane (fairplay), kumenya gushishoza no kudahubuka (maîtrise de soi), kugira ibitekerezo bihamye byo kubona umuti w’ikibazo runaka (Reflexes), kumenya gukorera hamwe n’abandi (Travail d’équipe), no guhorana morale ngo akazi kagende neza.

Ambasaderi Jean Pierre Karabaranga

Ambasaderi Jean Pierre Karabaranga yatangiriye Volleyball muri Seminari nto ya Karubanda mu mwaka wa 1983. Nyuma yaho yakiniye ikipe ya “Minitransco Volley ball club”, akinira kandi ikipe ya “Asec d’abidjan” aho yigaga muri Kaminuza. Akinira “Cougars” y’i Kinshasa, APR yo mu Rwanda na UNR i Ruhande anayibera umutoza. Yabaye Umunyamabanga uhoraho muri Minisiteri y’umuco na Siporo ubu akaba yaragizwe Ambasaderi w’u Rwanda mu gihugu cy’u Buholandi.

Ambasaderi Karabaranga atangaza ko kuba umukinnyi bifasha cyane haba mu kazi ka Politiki cyangwa mu buzima busanzwe. Avuga ko ukina Volleyball iyo ukina ugomba Gukora cyane, kwihangana no kuvunika ugamije gutsinda. Akomeza agira ati “Bisaba na none kugira ishyaka, kumenya gufata ibyemezo vuba kandi byiza haba ikosa kuri wowe cyangwa mugenzi wawe ukamenya kubyihanganira, kumenya kubana neza n’abandi haba muri ikipe cyangwa mu buzima busanzwe.”

Ernest Ruzindaza

Ernest Ruzindaza yamenyekanye mu ikipe ya UNR na ESPOIR muri Basket ubu akaba ari Umunyamabanga uhoraho muri Minisiteri y’ubuhinzi n’ubworozi mu Rwanda.

Dr Alexandre Ryambabaje

Yamenyakanye cyane mu mukino wa Volleyball akaba kugeza na nubu ntawundi mukinnyi wa Volleyball mu Rwanda uragaragaza ubuhanga yerekanye mu bihe byashize.

Dr Ryambabje yatangiriye gukina mu mashuri yisumbuye ya Byimana mu myaka igana 1981, yakiniye ikipe ya Kaminuza nkuru y’u Rwanda aho yavuye ajya kwiga muri Canada, akomereza mu Bufaransa i Monpellier. Aho hose yakomeje kuba umukinnyi w’intangarugero. Arangije amasomo yagarutse mu Rwanda aba umwarimu muri UNR kandi akomeza gukina no gutoza ikipe ya UNR n’iy’igihugu muri Volleyball.

Mu 1993 yatorewe kuba Perezida w’ishyirahamwe rya Volleyball mu Rwanda. Yabaye Minisitiri w’ubucuruzi, inganda n’ubukerarugendo ariko ubu yikorera ku giti cye.

Robert Bayigamba

Robert Bayigamba nk’uko aherutse kubitangariza Jeune Afrique, umukino wa Volleyball wamufashije byinshi. Mu 1994 Bayigamba Robert yabaye umuyobozi mukuru w’ikigo kigenga cya “Manumétal”, anayobora ishyirahamwe rya Volleyball mu Rwanda. Yanabaye Umunyamabanga Mukuru wa Komite ya Olempike mu Rwanda. Mu mwaka wa 2002 yabaye Minisitiri wa Siporo n’Umuco, nyuma yabaye Perezida w’Urugaga rw’abikorera (PSF).

Abo bose indangagaciro zabarangaga mu mikino nko gukorana umuhate, kugira ishyaka, gusabana n’abandi, gukorera hamwe nk’ikipe byakomeje kubaranga haba mu mikino, muri Politiki no mu mibereho yabo isanzwe.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO