Team Rwanda irerekeza muri Eritrea

Team Rwanda irerekeza muri Eritrea


Yanditswe kuya 24-05-2012 - Saa 14:22' na Egide MUGISHA

Ikipe y’igihugu y’umukino w’amagare mu Rwanda izwi kw’izina rya Team Rwanda irerekeza mu gihugu cya Eritrea aho izitabira irushanwa rya Tour of Eritrea iteganyijwe guhera tariki ya 30 Gicurasi 2012 kugeza tariki ya 3 Kamena 2012.

Ubuyobozi bw’ishyirahamwe ry’umukino w’amagare mu Rwanda FERWACY buratangaza ko ari gahunda bakomeje y’amarushanwa menshi, mu rwego rwo gukomeza guteza imbere uyu mukino, ndetse n’abakinnyi bakajya ku rwego rwo hejuru.

Amakuru ducyesha Umunyamabanga Uhoraho wa FERWACY Murenzi Emmanuel, itsinda rya Team Rwanda rigizwe n’abakinnyi 6 Byukusenge Nathan, Ruhumuriza Abraham, Habiyambere Nicodem, Hadi Janvier, Biziyaremye Joseph na Rudahunga Emmanuel, umutoza Jonathan Boyer, Ruvogera Obed ushizwe ibyo kunanura imitsi (massage) na Maxime barahaguruka I Kigali saa munani z’ijoro kuri uyu wa 25 Gicurasi 2012 berekeza muri Eritrea.

Iri ni irushanwa rya gatatu mpuzamahanga Team Rwanda igiye kwitabira uyu mwaka, nyuma ya Tour of Morocco na La Tropicale Amissa Bongo aho yitwaye neza ikegukana umwanya wa gatatu mu makipe y’ibihugu bya Afurika yari yitabiriye iri rushanwa.

Umuyobozi wa FERWACY Bayingana Aimable yatangarije itangazamakuru ko amarushanwa mpuzamahanga bitabira bayahitamo barebye azateza imbere abakinnyi b’Ikipe y’Igihugu bagira byinshi bigiramo, kuri Tour of Eritrea Team Rwanda izahuriramo n’amakipe ya mbere ku mugabane wa Afurika harimo ikipe y’igihugu ya Eritrea iri ku mwanya wa mbere, na Morocco iri ku mwanya wa kabiri, hazanagaragaramo n’ikipe izwi cyane ya Team MTN QHUBEKA ikinamo umukinnyi Adrien Niyonshuti (ariko we ntazagaragaramo kuko akomeje imyiteguro y’Imikino Olempike).

Tour of Eritrea ni rimwe mu marushanwa akomeye ku mugabane wa Afurika, ryatangiye mu mwaka 1946 ariko ryashyizwe kuri gahunda y’Ishyirahamwe ry’Umukino w’Amagare mu Rwanda mu 2009, umwaka ushize ryegukanwe na Meran Russan.

Andi makuru ku mukino w’amagare wayasanga ku rubuga rwa interineti rw’ishyirahamwe ry’umukino w’amagare mu Rwanda www.ferwacy.com

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO