Tour of Rwanda : Cogebanque yatanze miliyoni 105 mu gushyigikira isiganwa ry’amagare

Tour of Rwanda : Cogebanque yatanze miliyoni 105 mu gushyigikira isiganwa ry’amagare


Yanditswe kuya 23-11-2012 - Saa 17:10' na Elisée Mpirwa

Cogebanque, umuterankunga w’imena w’isiganwa ry’amagare ryiswe Tour of Rwanda 2012, yatanze akayabo ka miliyoni 105 yo gutera inkunga Ishyirahamwe ry’umukino w’amagare mu Rwanda kugira ngo afashe mu gutegura amarushanwa atandukanye.

Ntabwoba Bonaventure ushinzwe amashami ya Cogebanque hirya no hino mu gihugu, avuga ko impamvu nyamukuru yatumye batera inkunga umukino w’amagare ari uko ari wo ugera ku baturage benshi kuko uzenguruka igihugu hafi ya cyose.

Yagize ati “Ubusanzwe dutera inkunga imikino ya Golf ibera i Kigali ariko ubu twahisemo no gushyigikira isiganwa ry’amagare kuko ari umukino ugera henshi mu Rwanda kandi tukaba tunahafite amashami yacu.”

Ntabwoba akomeza avuga ko Cogebanque ishishikariza Abaturarwanda kwizigamira bagana amabanki ari na ko bakunda umukino w’isiganwa ry’amagare.

Ntabwoba Bonaventure hamwe na Mayor wa Rubavu, Bahame Hassan bahemba Merone Amanuel urusha abandi ahaterera

Kuri uyu wa Gatanu, iri rushanwa ryari rigeze ku cyiciro cyaryo cya 6 aho abasore 59 muri 62 batangiye iri rushanwa bahagurutse i Musanze berekeza i Rubavu (60,5 Km), maze Umunya-Eritrea Meron Amanuel ku nshuro ya kabiri yegukana umwanya wa mbere.

Uyu Meron Amanuel ni na we wegukanye icyiciro cya kabiri cy’iri siganwa cyavuye i Kigali cyerekeza i Muhanga.

Mbere ho iminsi ibiri ngo iri rushanwa rigere ku musozo, Umunya-Eritrea Merhawi Kudus w’imyaka 18 gusa ni we ukomeje kuza ku mwanya wa mbere muri iri rushanwa, ndetse akaba anahabwa amahirwe yo kuryegukana.

Icyiciro cya karindwi kibanziriza icya nyuma, ari na cyo kirekire (156,7 Km) kizahaguruka i Rubavu kuri uyu wa Gatandatu cyerekeza i Kigali.

Ab'i Rubavu bifuzaga ko Cogebanque yabasigira Mc Anita Pendo
Abasore Merhawi Kudus (imyaka 18) na Merone Amanuel (imyaka 19) bo muri Eritrea bakomeje kwereka igihandure abandi bose muri Tour of Rwanda
N'ubwo hari abaguye, benshi muri aba banyonzi basoje iki cyiciro batandukanyijwe n'intera ntoya

Foto/Elisée Mpirwa

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO