Ferwaka ishobora gushyiraho amarushanwa yo kwibuka Sayinzoga ufatwa nk’inkomarume muri Karate

Yanditswe na Cyprien Niyomwungeri
Kuya 21 Mata 2017 saa 03:58
Yasuwe :
0 0

Ishyirahamwe ry’umukino njyarugamba wa Karate mu Rwanda (Ferwaka), ryasabye umuryango wa Sayinzoga Jean, kuryemerera rikajya ritegura amarushanwa yo kumwibuka nk’igicumbi cy’uyu mukino mu Rwanda no mu Burundi.

Ku Cyumweru tariki 16 Mata 2017 nibwo Sayinzoga w’imyaka 75 yitabye Imana azize indwara ya kanseri y’umwijima, akaba yarashyinguwe ejo kuwa Kane mu irimbi rya Rusororo riherereye mu karere ka Gasabo.

Umuyobozi wa Ferwaka, Barnabe Karamaga, yavuze ko Sayinzoga ari inkomarume y’umukino wa Karate kuko mu 1973 yawutangije mu Burundi, nyuma y’urugamba rwo kubohora igihugu akagira uruhare mu ishingwa ry’ishyirahamwe ry’uyu mukino mu Rwanda kandi inama ze zigatuma riba rimwe mu akora neza mu gihugu.

Yatangaje ko nka Ferwaka bifuza gushyiraho amarushanwa ya karate afite intego yo kwibuka Sayinzoga bitaga Sensei [Mwarimu wa Karate].

Yagize ati “Nk’ishyirahamwe mpagarariye ndasaba umuryango nibabitwemerera tuzashyiraho umunsi w’amarushanwa yo kujya tumwibuka, ukuntu twabikora tuzabiganira mubitwemereye.”

Yatangaje ko yababereye ambasaderi mwiza ku buryo nk’iyo bashakaga kwaka inkunga yo gukora igikorwa runaka yabafashaga kandi bakayibona vuba. Ibi byiyongera ku kuba umukaratika washakaga gusaba cyangwa gusabwa wese yamufashaga kurangiza urwo rubanza.

Sayinzoga yitoje Karate akiri muto akorera imyitozo mu bihugu bitandukanye ku buryo ariwe wari imbere mu midali ya Karate mu Rwanda, aho yari afite ‘dan’ ya gatandatu yahawe mu 2015, akurikirwa na Sinzi Tharcisse ufite ‘dan’ ya gatanu.

Mu kiganiro Sinzi aherutse kugirana na IGIHE, yatangaje ko yamutoje umukino wa Karate mu Burundi kugeza abonye umukandara w’umukara mu 1984, nawe akaza kuwutangiza mu Rwanda muri 1988 kuko Sayinzoga we yaje nyuma ya Jenoside.

Yagize ati “Ni we wadutozaga, urumva ko niwe watureze, mbega niwe dukomokaho. Yaje mu Rwanda asanga hari aho natoje ariko umukino ni we wawutangije. Mbega ni nk’inzu y’ibitabo dutakaje.”

Sayinzoga yaherukaga muri uyu mukino ubwo yambikaga imidari abana batarengeje imyaka 15 bari bashoje amarushanwa yari yateguwe na Ferwaka.

Karamaga Barnabe, Umuyobozi wa Ferwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244