Ikipe ya Karate yasohokeye u Rwanda muri RDC mu mikino y’Akarere yisanze ku kibuga yonyine

Yanditswe na Mukwaya olivier
Kuya 4 Nzeri 2017 saa 03:14
Yasuwe :
0 0

Mu marushanwa ya Karate y’Akarere ahuza ibihugu bine yagombaga kubera mu Mujyi wa Goma muri Repubilika Iharanira Demokarasi ya Congo, yasubitswe bitewe n’uko amwe mu makipe yagomba guserukira ibihugu atabonetse ku kubuga.

Uretse ikipe y’u Rwanda yahagaragaye yonyine izindi zirimo, iya Congo Kinshasa, u Burundi ndetse na Uganda ntizahabonetse.

Ikibuga cyari giteguye ibyapa bigaragaza uko iyo mikino iri bube ndetse n’ikipe y’igihugu ya RDC ikaba yari iri mu Mujyi wa Goma ariko ntiyakandagira ku kibuga, abari bateguwe kuyobora imikino, bafata umwanzuro ko ikipe y’u Rwanda yakina kuko ariyo yonyine yahagaragaye, ariko u Rwanda rurabyanga, nibwo bahise batangaza ko amarushanwa atakibaye kandi bisegura ku bari aho.

Grand Maitre Ntambwa Mutambayi ari na we wari ukuriye abateguraga aya marushanwa yatangaje ko iri subikwa ryatewe no kutumvikaha hagati y’amashyirahamwe y’umukino wa karate mu bihugu byari kuyitabira bityo akaba ashobora kuzashakirwa undi mwanya.

Yagize ati “Aya marushanwa yari guhuza ibihugu bine ntakibaye kubera ko hari ibirebana n’ubuyobozi bitabashije gukunda, akazakorwa nyuma yo kumvikana hagati y’amashyirahamwe y’uyu mukino. Turabasaba imbabazi kubyabaye ariko ni amategeko.’’

Leother Ngaboyamahina wari ukuriye itsinda ryari rihagarariye u Rwanda muri ayo marushanwa, nawe yavuze impamvu bafashe umwanzuro wo kudakina.

Yagize ati “Impamvu amarushanwa atabaye kandi twari tuyiteguye twageze ku kibuga dutegereje amakipe yo mu karere ariko ikipe yacu niyo yonyine yahagaragaye bituma amarushanwa tuyahagarika. Hagombaga kuboneka u Rwanda ,u Burundi, Congo Kinshasa na Uganda ariko yose ntiyaje tubura ikipe yo gukina nayo.’’

Ku ruhande rw’abafana bari bitabiriye iyo mikino by’umwihariko Abanyecongo, bo babajwe no kubura ku kibuga ku ikipe yabo.

Musavuri Patrick yagize ati “Njye birambabaje cyane kuko nari nje kureba imikino none ntikibaye nashakaga kureba u Rwanda na Congo none ntibikibaye ni ukubera ababitegura batabiteguye neza ubutaha bazabikosore mbere.’’

Aya maruhanwa y’akarere ya Karate yagombaga gutangira saa tatu za mu gitondo kuri iki Cyumweru, umwanzuro wo kuyasubika ufatwa 13h30 u Rwanda rwabuze abo rukina na bo, akaba yari agiye kuba ku nshuro yayo ya 20.

Ikipe y'u Rwanda yisanze ku kibuga yonyine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza