Kwamamaza

Kung Fu: Abazitabira isozwa rya shampiyona bazirebera ibyo basanzwe babona muri filime

Yanditswe kuya 23-11-2016 saa 12:51' na Manzi Rema Jules


Ishyirahamwe ry’Umukino wa Kung Fu mu Rwanda ryatangaje ko mu gusoza imikino ya shampiyona y’uyu mwaka ku rwego rw’igihugu yari imaze iminsi ibera mu turere dutandukanye, abazayitabira bazongera gususurutswa n’Abashimwa mu myiyereko y’uyu mukino uri mu muco wabo.

Muri uyu mwaka, ku nshuro ya mbere Shampiyona ya Kung Fu yabanje gukinirwa mu Turere twa Ngoma, Muhanga n’Umujyi wa Kigali ahahuriraga amakipe atandukanye, abakinnyi bagahatanira itike yo kwerekeza mu mikino ya nyuma izaba ku rwego rw’igihugu ku Cyumweru tariki 27 Ugushyingo kuri Stade Amahoro.

Mu kiganiro n’abanyamakuru, Umuyobozi w’Ishyirahamwe ry’Umukino wa Kung Fu mu Rwanda, Mucyo Jackson, yavuze ko imikino yabanje y’amajonjora yagenze neza, hazamuka abakinnyi batsinze kuko bashoboye ku buryo umunsi wa nyuma uzagaragaza urwego rwiza Kung Fu imaze kugeraho mu Rwanda.

Ati “Ni ku nshuro ya mbere twari tugerageje gutangirira shampiyona mu turere, amakipe akabanza guhatana hakazamuka abitwaye neza. Ubusanzwe amakipe yose yazaga i Kigali bigakorerwa rimwe. Byagenze neza, tubona abakinnyi bashoboye aba aribo babona itike kandi ndizera ko no ku munsi wa nyuma abafana bazaryoherwa cyane.”

Mucyo yanavuze ko nk’uko byagenze umwaka ushize Abashinwa biyerekana muri uyu mukino ukomoka iwabo, n’ubundi uyu mwaka bagenewe umwanya wo kuzongera gushimisha Abanyarwanda, ibyo bari basanzwe babona muri filime bakabibona imbonankubone.

Ati “Birumvikana tuba dushaka gushimisha abafana bacu mu buryo butandukanye, umwaka ushize bishimiye bikomeye kureba imyiyereko y’Abashinwa ariko uyu mwaka bizaba birushijeho. Ubu bari mu myitozo kandi twabahaye umwanya munini. Navuga ko abazaba bahari bazirebera byinshi mu byo babona mu mafilime atandukanye.”

Kuba iyi mikino ihuriranye n’ibiruhuko by’abanyeshuri, mu rwego rwo kuborohereza kuzayitabira, iri Shyirahamwe ryahisemo kugabanya ibiciro byo kwinjira ku bana n’abanyeshuri kugira ngo barusheho kubakundisha umukino bazaze gushyigikira abakinnyi ari benshi.

Kwinjira muri stade Nto i Remera kuri iyi mikino izatangira saa tanu, ku banyeshuri ni amafaranga 500 y’u Rwanda, abakuru bazishyura 1000 mu gihe ku bashaka kwicara mu myanya y’icyubahiro bazishyura ibihumbi 5000.

Abakinnyi baba berekana ubuhanga mu gucanga ibyuma
Abana bato nabo baba biyerekana muri tekinike zitandukanye za Kung Fu
Abashinwa bazongera gushimisha abazitabira isozwa rya Shampiyona ya Kung Fu

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved