Kwamamaza

Ngoma: Batunguwe n’ubuhanga bw’abana babo muri Kung Fu (Amafoto)

Yanditswe kuya 7-11-2016 saa 17:56' na Manzi Rema Jules


Muri gahunda nshya Ishyirahamwe ry’Umukino wa Kung Fu mu Rwanda ryatangiye uyu mwaka yo kwegereza imikino ya shampiyona abaturage mu turere tumwe na tumwe, kuri iki Cyumweru yabereye i Ngoma, mu Ntara y’u Burasirazuba, aho ababyeyi batunguwe n’ubuhanga bw’abana babo muri uyu mukino ku nshuro ya mbere bari bababonye barushanwa.

Shampiyona y’uyu mwaka yatangiye ku Cyumweru gishize tariki 30 Ukwakira ku Kimisagara hashakishwa abana bahiga abandi mu makipe yo muri Kigali, kugira ngo bazahangane n’abazava mu tundi turere mu mikino ya nyuma iteganyijwe tariki 27 kuri stade nto i Remera.

Kuri iki Cyumweru tariki 6 Ugushyingo, hari hatahiwe Akarere ka Ngoma ahari hahuriye amakipe atandukanye yo mu Ntara y’u Burasirazuba ahurira mu cyumba cy’inama cy’Akarere ahari hateraniye abaturage benshi bashakaga kwihera ijisho imyiyereko y’abana babo n’ababaturanyi bari bagiye kubona bwa mbere barushanwa kuko mu nshuro zabanje amarushanwa yaberaga i Kigali.

Mu myiyereko y’abana bari hagati y’imyaka 4 na 16 yamaze amasaha abiri n’igice, benshi mu babyeyi bari basanzwe babona abana babo bajya mu myitozo ariko batarabona aho barushanwa, bishimiye cyane kubabona bwa mbere ariko banatungurwa n’ubuhanga bwabo.

Mukasine Janvière wari wagiye gushyigikira umwana we w’imyaka itanu, yabwiye IGIHE ko yatangajwe n’urwego umwana we amaze kugeraho mu mezi hafi atanu amaze akina Kung Fu.

Ati “Umwana wanjye ataraza gukina Kung Fu, wabonaga atinya abandi cyane ariko ubu byarahindutse, ikindi mu ishuri ubona ko asigaye akurikira cyane kuko na hano barabibabwira kenshi ko utamenya Kung Fu udatsinda mu ishuri.”

“Urebye igihe gito amaze atangiye gukina, sinari nzi ko amaze kumenya ibintu bingana kuriya. Ndashimira cyane ubuyobozi bw’Akarere bushyira imbaraga mu mikino ariko nkanashimira Ishyirahamwe rya Kung Fu ryatuzaniye ibi birori iwacu.”

Umuyobozi w’Akarere ka Ngoma, Nambaje Aphrodis, wari witabiriye iyi mikino ndetse akaba yari afitemo n’abana be babiri barushanwaga, yavuze ko yiteguye gukomeza gufasha ikipe ya Black Eagles yo muri aka karere kugira ngo izabe iya mbere mu gihugu.

Ati “Si muri Kung Fu gusa, ku bwanjye nifuza ko ikintu cyose gikorerwa mu karere kigira umwihariko kandi kikaba kizwi. Nk’uko iyo Abanyarwanda bagiye hanze bagatwara imidari abanyamahanga bose batangira kubazanya ngo bariya bakomoka he, ibi nanjye ni byo nifuza ko ikipe yacu ikomera ikajya ku rwego rw’igihugu igatsinda buri wese akamenya ko ari iy’Akarere ka Ngoma.”

Nambaje avuga ko yahitiyemo abana be gukina Kung Fu kuko nawe ari umukino akunda kurusha indi ahanini bitewe n’akamaro kawo mu gufasha uwukina kugira imyitwarire myiza, kugira umubiri ukora neza no kutumva ko yakwigira igihararumbo.

Amajonjora azakomeza ku Cyumweru tariki 13 Ugushyingo, i Muhanga hahurira amakipe yo mu Ntara y’Amajyepfo n’akarere ka Karongi mu Burengerazuba. Ni naho hanyuma azaba abereye mbere y’uko abana bitwaye neza bose bahurira i Kigali tariki 27 Ugushyingo mu mikino ya nyuma ya shampiyona ya Kung Fu uyu mwaka.

Abana kuva ku myaka ine bari babukereye mu marushanwa ya Kung Fu
Bagaragaje uko bashobora kwitabara bakoresheje ibikoresho bitandukanye
Aba bana berekanye ubuhanga bafite muri uyu mukino
Ababyeyi b'aba bana bavuga ko kuva batangira gukina Kung Fu basigaye bitwara neza haba mu rugo no mu ishuri
N'igitsina gore cyitabiriye umukino wa Kung Fu
Meya Nambaje avuga ko ashaka ko ikipe y'akarere ayoboye yazatera imbere ikaba iya mbere mu gihugu
Mucyo Jackson uyobora ishyirahamwe ry'umukino wa Kung Fu mu Rwanda, yishimira ubushake Akarere ka Ngoma kagaragaza mu guteza imbere uyu mukino

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved