Ibinezaneza byasaze Dushimumukiza w’i Rutsiro wegukanye moto muri “Peace Marathon”

Yanditswe na Manzi Rema Jules
Kuya 21 Gicurasi 2018 saa 12:23
Yasuwe :
0 0

Mu irushanwa Mpuzamahanga rya Kigali International Peace Marathon ryabaye kuri iki Cyumweru hari hashyizwemo igihembo kidasanzwe cya moto nshya yatanzwe n’Uruganda Nyarwanda ruteranya moto ( RMC), ifite agaciro ka miliyoni 1.3 Frw yagombaga kwegukanwa n’umwe mu Banyarwanda bitabiriye.

Ku bushishozi bw’Ishyirahamwe ry’umukino wo gusiganwa ku maguru mu Rwanda (RAF), hemejwe ko iyi moto izahabwa umukinnyi w’Umunyarwanda uzaba yitwaye neza mu cyiciro cy’abiruka Marathon yuzuye, bihesha amahirwe Dushimumukiza Thomas ukomoka i Rutsiro, ari naho akinira.

Uyu mukinnyi udasanzwe uzwi kuko byari n’ubwa mbere akinnye irushanwa nk’iri rikomeye ku rwego mpuzamahanga, ntiyegukamye umudali ariko niwe Munyarwanda wasoje ari imbere mu kwiruka ibirometero 42.

Mu kiganiro yagiranye na IGIHE, yagize ati “Ndishimye cyane, ndumva byandenze kuko ni ubwa mbere mbashije kubona igihembo nk’iki gikomeye. Nitabiriye isiganwa ntazi ko iki gihembo gihari, nabimenye mbere y’amasaha make ngo dutangire kwiruka ariko sinumvaga ko nshobora kucyegukana.”

Yakomeje agira ati “Ndashimira cyane RMC yashyizeho iki gihembo cya moto kandi nziza. Sinzayigurisha, nzayikoresha mu buzima busanzwe kuko ishobora gutwara abantu ikinjiza amafaranga. Ndizera ko izatuma ubuzima bwanjye buhinduka ndetse imfashe kubaho neza nkomeze nteze imbere impano yanjye yo kwiruka.”

Ineza Private ushinzwe imenyekanishabikorwa muri RMC ikora ubwoko butandukanye bwa moto mu Rwanda, yavuze ko mu nkunga bateye iri rushanwa bashyizemo guha moto umwe mu bazaryitabira nk’imwe mu ntego bafite zo guteza imbere urubyiruko.

Yagize ati “Twatanze moto yo mu bwoko bw’Imparage, ni moto umuntu ashobora gukoresha ashaka amafaranga (mu muhanda) cyangwa akaba yayikoresha muri gahunda ze zisanzwe. Biri muri gahunda zacu gufasha urubyiruko gutera imbere, akaba ari nayo mpamvu iyi moto ishobora gukora byose ariyo twahisemo gutanga.”

Yongeyeho ati “Moto ni igikoresho umuntu wese yakenera mu buzima busanzwe ariko ku rubyiruko ni umwihariko kuko n’ubushobozi buba butaraba bwinshi; izacu rero ni nziza, zikoze ku buryo buberanye n’imiterere y’igihugu cyacu, ziboneka ku giciro kibereye buri wese ndetse n’ibikoresho byazo (byo gusimbura ibyangiritse) biboneka byoroshye.”

Uruganda rwa RMC rumaze umwaka umwe rutangiye gukorera mu Rwanda, rufite ubwoko butandukanye burimo izitwa Inziza, Imparage, Indakangwa, Ingenzi n’izindi; izi zose zikaba ziboneka ku cyicaro cy’uruganda ku Kicukiro-Sonatube ndetse n’i Rubavu mu Burengerazuba.

Dushimumukiza Thomas ukomoka i Rutsiro ibinezaneza byamusaze nyuma yo kwegukana moto y’Imparage yatanzwe n’Uruganda Nyarwanda rukora Moto (RMC)
Moto Dushimukukiza yegukanye ifite agaciro ka miliyoni n'ibihumbi 300 by'amafaranga y'u Rwanda
Moto za RMC ziboneka ku Kicukiro n'i Rubavu ariko mu minsi iri imbere zizaba ziri n'i Rusizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza