‘Kigali Night Run’ yari yitabiriwe n’abatari bake yajemo kidobya bataha imburagihe (amafoto)

Yanditswe na Manzi Rema Jules
Kuya 12 Gicurasi 2018 saa 08:56
Yasuwe :
0 0

Kigali Night Run ibanziriza isiganwa mpuzamahanga rya “Kigali International Peace Marathon 2018” yabaye ku mugoroba wo kuri uyu wa Gatanu yitabiriwe n’abatari bake ariko babangamirwa n’imvura yatumye basoza imburagihe.

Iri siganwa ryabereye mu mihanda ya Kimihurura aho bahagurukiye imbere ya Kigali Convention Center, ryari ryitabiriwe n’abasaga 600 biganjemo abanyamahanga. Ryatangijwe ku mugaragaro na Minisitiri wa Siporo n’Umuco, Uwacu Julienne.

Abasiganwa bahagurukiye imbere ya Kigali Heights bazenguruka banyuze mu muhanda w’imbere ya Radisson Blu Hotel bakomereza mu Rugando bagaruka kuri Kigali Heights bakomeza berekeza ku Kigo cy’Igihugu gishinzwe Imisoro n’Amahoro, basoreza kuri Kigali Convention Center ku ntera y’ibirometero bitanu na metero 400.

Ubusanzwe iyo abasiganwa bamaze kuzenguruka, bahurira imbere ya Kigali Heights bagakora imyitozo ngororamubiri itandukanye ariko kuri iyi nshuro ntibyakunze kuko haguye imvura nyinshi biba ngombwa ko bamwe bataha abandi bajya kugama, isiganwa rihita risozwa.

Kigali Night Run yabanjirije Kigali International Peace Marathon 2018 iteganyijwe ku Cyumweru tariki 20 Gicurasi, ikazaba mu byiciro bitatu icy’abiruka marathon (ibirometero 42) n’abiruka igice cya marathon (ibirometero 21) n’icy’abiruka bishimisha (Run for Fun).

Iri siganwa ryatewe inkunga n’uruganda rwa Skol, RwandAir, Banki ya Kigali na MTN, rizatwara ingengo y’imari ya miliyoni 120 z’amafaranga y’u Rwanda, arimo miliyoni 73 zatanzwe na MTN.

Mbere yo guhaguruka bahawe amabwiriza n'abari bashinzwe kuriyobora
Ryari ryitabiriwe n'abantu benshi
Minisitiri wa Siporo n'Umuco, Uwacu Julienne, akora siporo
Minisitiri wa Siporo n’Umuco, Uwacu Julienne ari kumwe n'Umuyobozi w’Ishyirahamwe ry’Imikino Ngororamubiri mu Rwanda, Mubirigi Fidèle n’Umunyamabanga Uhoraho muri Minisiteri ya Siporo n’Umuco, Ntigengwa John
Abitabiriye iri siganwa bari biganjemo abanyamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza