Muhanga: Abana bato bagaragaje impano mu mikino ngororamubiri

Yanditswe na Akimana Jean de Dieu
Kuya 7 Gicurasi 2018 saa 06:41
Yasuwe :
0 0

Amarushanwa y’Imikino Ngororamubiri ahuza ibiga by’amashuri yisumbuye ku Rwego rw’Igihugu yasorejwe mu Karere ka Muhanga ku Cyumweru, tariki ya 6 Gicurasi 2018, abaserukiye Akarere ka Rubavu mu bahungu biharira imidali naho mu bakobwa Gicumbi iza ku isonga.

Aya marushanwa yari mu rwego rwo gukomeza gutoza abana bazaserukira ibigo bitandukanye byo mu Rwanda mu mikino ihuza ibigo by’amashuri mu Karere ka Afurika y’Iburasirazuba (FEASSA) izabera i Musanze muri Kanama uyu mwaka.

Bamwe mu bana bitabiriye iyi mikino batangaje ko ari amahirwe akomeye bahabwa yo kugaragaza impano zabo bakaba batagombaga kuyapfusha ubusa.

Bucatse Angelique ukomoka mu Karere ka Gicumbi w’imyaka 14 wigaragaje mu kwiruka metero 1500 yagize ati “Nakoresheje imbaraga z’umubiri wanjye mbasha kubasiga ariko mfashwa cyane n’inama z’abatoza banjye kuko bamba hafi bakambwira uko ngomba kwitwara ndetse nuko ngomba kubifatanya n’amasomo. Mfite inzozi zo guhagararira igihugu mu mahanga ya kure nkazana imidali nanjye nkakirwa ku Kibuga cy’Indege.”

Dushimirimana Angelique wo mu Karere ka Rutsiro we yasabye ababyeyi babuza abana babo gukina ko babareka bakagaragaza impano zabo ntizipfukiranwe kuko harimo abashobora kuzahesha ishema igighugu mu gihe kiri imbere.

Yagize ati “Aya mahirwe nahawe ngomba kuyakoresha neza bityo nkerekana ko ntari gukora ubusa. Ndagaya cyane umuntu ubuza umwana gukina kuko ni ugutsikamira impano aba yifitemo kandi si byiza. Gukina si uburara ahubwo bidufasha kwiga neza, umuntu atuje mu mutwe.”

Umuyobozi wa Tekiniki mu Ishyirahamwe ry’Imikino y’Abanyeshuri, Rurangirwa Aron, yishimiye uko iyi mikino yagenze by’umwihariko umusaruro abana bakiri bato batanze kuko bagaragaje ko hari icyizere ko u Rwanda ruzitwara neza mu marushanwa ya FEASSA iteganyijwe mu Karere ka Musanze mu mezi atatu ari imbere.

Yagize ati “Urebye neza kugeza ubu ishusho dufite ry’iyi mikino ni uko abana bamaze kugera ku rugero rwiza kandi bazafasha. Batangiye kwerekana ko biteguye guhangana bashaka kwigaragaza, nk’uyu munsi batangiye kwereka bakuru babo ko bamaze gukura bityo rero babonye amarushanwa menshi babasha kwigaragaza ndetse bakabasha gufasha igihugu mu mikino dukunze kwitabira ku nzego zose irimo n’iya FEASSA yegereje.”

Aya marushanwa yitabiriwe n’abanyeshuri batarengeje imyaka 20, mu bahungu Akarere ka Rubavu ni ko kahawe igikombe kuko ari ko kegukanye imidali myinshi, naho mu bakobwa Gicumbi ihiga utundi twose.

Imikino ya FEASSA ni ku nshuro ya gatatu igiye kubera mu Rwanda nyuma y’iyabereye i Kigali mu 2008 n’iya 2015 yabereye mu Karere ka Huye.

Abana bato berekanye impano mu mukino wo kwiruka n'amaguru
Banagaragaje impano zo gusimbuka urukiramende
Abana bishimira imidali begukanye mu mikino itandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza