Kwamamaza

Myasiro wasetswe ku Cyongereza yavugiye mu Pologne, arerekeza mu Budage ari mushya

Yanditswe kuya 25-11-2016 saa 13:41' na Manzi Rema Jules


Myasiro Jean Marie Vianney, umukinnyi w’ikipe y’Igihugu y’Imikino Ngororamubiri y’abatarengeje imyaka 20, wamenyekanye cyane ubwo yacaga agahigo mu kwiruka metero ibihumbi 10 ariko akaza gusekwa n’abatari bake ku bw’Icyongereza yavuze, agiye kwitabira irindi rushanwa mu Budage ari mushya nyuma y’amezi atatu yihugura muri uru rurimi.

Myasiro na mugenzi we Salome Nyirarukundo, bazerekeza mu Budage mu kwezi gutaha aho bagiye kwitabira ku nshuro ya mbere amarushanwa yitwa “Silvesterlauf New Year’s Eve race” azabera mu mujyi wa Trier, agamije gusoza umwaka mu busabane hakinwa imikino ngororamubiri itumirwamo bamwe mu bakinnyi bitwaye neza ku migabane yabo.

Mu kiganiro yagiranye na IGIHE, Myasiro yavuze ko ari gukora imyitozo ikomeye kuko muri aya marushanwa azaba ahanganye n’abakinnyi bakomeye, bityo ngo intego ye ni ukurangiza mu bakinnyi batanu ba mbere byashoboka n’umudali akaba yawegukana.

Ati “Nk’umukinnyi, mba ngomba gukora cyane buri munsi. Gusa ubu kuko hari amarushanwa kandi akomeye antegereje, ngiye kwitoreza i Gicumbi, ahantu hakonje kuko no muri biriya bihugu hahora hakonje cyane. Ikindi mu myitozo nzaba ndi kumwe n’abakinnyi bakomeye nka Kajuga Robert, nubwo yahagaritswe ariko afite byinshi yanyigisha.”

Myasiro yakunze kugaruka mu itangazamakuru no ku mbuga nkoranyambaga, bamwe banenga icyongereza yavuze ubwo yari muri Pologne muri shampiyona y’Isi y’abatarengeje imyaka 20 “2016 IAAF World Junior (U20) Championships” muri Nyakanga uyu mwaka, agakuraho n’agahigo ka Valens Bivahagumye wari warirutse metero ibihumbi 10 mu iminota 29,amasegonda 35 n’ibice 41 muri 2004, we akabyiruka mu iminota 29 amasegonda 26 n’ibice 26.

Nyuma kunengwa no guhabwa urw’amenyo n’abanyarwanda batandukanye, uyu musore yahise atangira kwiga uru rurimi akigaruka mu Rwanda. Kuri ubu avuga ko nubwo indimi atari yo gahunda ye ya mbere, ariko yizera ko ibyabaye bitazongera kuko hari urwego amaze kugeraho.

Ati “Wenda ubu sinabivugaho byinshi kuko ntiwabuza abashaka kuvuga ibibarimo. Icya mbere nshyira mu mutwe ni ukugenda nshaka gutsinda ibendera ry’u Rwanda rikazamurwa, gusa utaribwa ntamenya kurinda. Ibyabaye ntibizongera kuko maze iminsi nihugura mu Cyongereza kandi ndamutse numva bitari ngombwa kukivuga, nakoresha ikinyarwanda nabo bagashaka ubasobanurira. Nta kibazo.”

Aba bakinnyi bombi bazaserukira u Rwanda mu Budage, uretse kuba bakiri bato (kuko Salome Nyirarukundo afite imyaka 18 mu gihe Myasiro afite 20), ni nabo bitwaye neza uyu mwaka mu marushanwa atandukanye bagiye bitabira ari na cyo cyagendeweho batumirwa n’abashinzwe gutegura aya marushanwa, azatangira tariki 29 Ukuboza, agasozwa ku ya 1 Mutarama 2017.

Myasiro ugiye kujya mu Budage avuga ko intego ye ari ukuzamura ibendera ry'u Rwanda mu mahanga
Myasiro yemeza ko igihe amaze yiga Icyongereza hari urwego amaze kugeraho, ariko akemeza ko adashishikajwe n'ururimi cyane
Myasiro avuga ko yiteguye neza ayo marushanwa yo mu Budage

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved