Uko Abanyarwanda bitabiriye siporo rusange ya Car Free Day mu gihugu cyose (Amafoto)

Yanditswe na Eric Tony Ukurikiyimfura
Kuya 20 Mutarama 2020 saa 09:58
Yasuwe :
0 0

Kuri iki Cyumweru tariki ya 18 Mutarama 2020, mu bice byose by’u Rwanda habaye siporo rusange ya Car Free Day ihuza Abanyarwanda bagakora siporo mu rwego rwo kurushaho kugira ubuzima bwiza.

Gahunda ya Car Free Day yatangijwe mu Mujyi Kigali muri Gicurasi 2016, iza kugezwa no mu tundi turere tw’igihugu.

Mu ntangiriro za 2018 nibwo Perezida Kagame yasabye ko yazajya iba kabiri mu kwezi .

Kuri iki Cyumweru, nibwo habaye Car Free Day ya kabiri muri iyi Mutarama, ikurikira iya mbere yabaye tariki ya 5 Mutarama 2020.

Iyi siporo rusange yitabiriwe mu bice bitandukanye by’igihugu, aho abaturage bakoze imyitozo ngororangingo, bahabwa ubutumwa bujyanye no kurinda ubuzima bwabo n’ubw’umutekano wo mu muhanda mu gihe banapimwe indwara zitandura.

Akarere kazahiga utundi muri iyi siporo rusange kashyiriweho igihembo cyihariye.

Mu gushaka kumenya uko Abanyarwanda batandukanye bitabiriye iki gikorwa, IGIHE yarebye uko muri tumwe mu turere tw’igihugu cyagenze.

Umujyi wa Kigali

Mu Mujyi wa Kigali watangiriyemo iyi siporo mu myaka ine ishize, Car Free Day yakorewe mu duce tune, yitabirwa n’abantu b’ingeri zitandukanye.

Umuyobozi w’Umujyi wa Kigali, Rubingisa Prudence, n’Umuyobozi wungirije w’Umujyi wa Kigali Ushinzwe Iterambere ry’Ubukungu n’Imibereho myiza y’Abaturage, Umutoni Nadine, bifatanyije n’abitabiriye Car Free Day ku cyicaro cya Rwanda Revenue Authority ku Kimihurura mu Karere ka Gasabo.

Muri aka karere kandi, hari abahuriye ku kibuga cya Kaminuza Yigenga ya Kigali (ULK) mu gihe abo mu Karere ka Kicukiro bahuriye ku Kibuga cya IPRC Kigali.

Abo mu Karere ka Nyarugenge bahuriye ku kibuga cy’Ikigo cy’Urubyiruko cya Kimisagara.

Intara y’Amajyaruguru

Mu Ntara y’Amajyaruguru, mu Karere ka Musanze, iyi siporo rusange yabaye ku wa Gatandatu, yitabirwa n’abahatuye n’abahakorera mu byiciro byose.

Intara y’Amajyepfo

Mu bitabiriye Car Free Day mu Karere ka Muhanga, harimo n’intumwa ya rubanda Kalinijabo Barthelemy, abayobozi b’akarere, Ingabo na Polisi yakanguriye abatuye aka karere kuzirikana gahunda ya Gerayo Amahoro.

Ubu bukangurambaga bwa Gerayo Amahoro bwakozwe nyuma ya siporo rusange aho abafite ubumuga bagiriye inama abakoresha umuhanda kwitwararika kuko impanuka ziri mu bitera ubumuga ndetse zikabwongera ku babufite.

Nyuma y’imyitozo ngororamubiri hakurikiyeho amasiganwa ku byiciro bitandukanye: abafite ubumuga, abana, urubyiruko, abadamu bakuru n’abagabo n’abagore barengeje imyaka 50.

Nyuma y’amasiganwa hakurikiyeho n’imyiyereko y’akataraboneka ya Acrobatie.

Ku bufatanye n’Ibitaro bya Kabgayi n’amavuriro yigenga akorera i Muhanga, hapimwe indwara zitandura na Hepatite B & C ku bitabiriye.

Mu Karere ka Nyanza, abitabiriye iyi siporo rusange bahagurukiye mu bice bitandukanye, bahurira mu mbuga y’Umurenge wa Busasamana bakora imyitozo ngororamubiri itandukanye.

Intara y’Uburasirazuba

Mu Karere ka Bugesera, abitabiriye iyi siporo bifatanyije n’Umuyobozi w’Akarere wungirije ushinzwe imibereho myiza, Imanishimwe Yvette, inzego z’umutekano n’abaganga baje gupima indwara zitandura zirimo iy’umwijima (B&C), diabète, umuvuduko w’amaraso n’ibindi.

Ubutumwa bwatanzwe muri iki gikorwa bufite insanganyamatsiko igira iti "Rengera umwana" isaba buri wese kurinda abana ihohoterwa.

Intara y’Uburengerazuba

Mu Murenge wa Ngororero wo mu Karere ka Ngororero, abaturage n’abayobozi bitabiriye iyi siporo kuri bose nyuma habaho kwipimisha indwara zitandura.

Iyi siporo yakozwe kandi no mu mirenge y’icyaro yo muri aka karere irimo uwa Bwira, naho abaturage bipimisha indwara zitandura.

Abanya-Bugesera bapimwa indwara zitandura
Car Free Day imaze no kugera mu gice cy'icyaro- Aha ni mu Murenge wa Bwira muri Ngororero
Umutoza Mukasa akoresha abo kuri IPRC Kigali
Abanya-Muhanga bitabiriye ku bwinshi kuri Stade yabo
Abaturage b'i Muhanga muri Siporo Rusange kuri iki Cyumweru
I Musanze, yitabiriwe n'abantu b'ingeri zose
Mu Karere ka Ngororero na bo bitabiriye iyi siporo ikorwa na buri wese
Abitabiriye Siporo Rusange ku cyicaro cya RRA ku Kimihurura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza