World Vision yatanze inkunga muri “Peace Marathon”

Yanditswe na Manzi Rema Jules
Kuya 16 Gicurasi 2018 saa 06:03
Yasuwe :
0 0

Umuryango utegamiye kuri Leta w’Abanyamerika World Vision, watanze inkunga ya miliyoni enye z’amafaranga y’u Rwanda muri Kigali International Peace Marathon 2018, unashimira urwego iri rushanwa rigezeho mu gukwirakwiza Amahoro.

Isiganwa mpuzamahanga rya Kigali International Peace Marathon ryatewe inkunga na MTN, Skol na Banki ya Kigali nk’abafatanyabikorwa bakuru ariko rifite n’abandi batandukanye barimo Uruganda rukora moto mu Rwanda (RMC) na World Vision yatanze sheke ya miliyoni enye kuri uyu wa Gatatu.

Umuyobozi w’uyu muryango mu Rwanda, Sean Kerrigan, yatangaje ko bishimira urwego iri rushanwa rigezeho mu myaka itandatu ishize batangiye gufatanya, anashimangira ko bizakomeza kuko rihuje na World Vision intego yo kwimakaza umuco w’amahoro.

Yagize ati “Intego ya World Vision ni ukubona urubyiruko, abana bishimye, babayeho neza hari n’amahoro mu muryango. Dutewe ishema rero no kuba tumaze imyaka itandatu turi abafatanyabikorwa b’iri siganwa ryitiriwe Amahoro. Ni umwanya mwiza wo kwishimira Amahoro u Rwanda rufite ndetse no kuyereka amahanga.”

Umuyobozi w’Ishyirahamwe ry’Imikino Ngororamubiri mu Rwanda, Mubirigi Fidèle, yashimiye World Vision, avuga ko yo itandukanye n’abandi bafatanyabikorwa kuko bo baba bafite ibyo bamamaza ariko yo ikaba igira uruhare muri Kigali International Peace Marathon nta yindi nyungu igamijemo.

Yagize ati “Twakiriye inkunga ya World Vision ariko siyo yonyine, kuko no mu minsi yashize baduteye izindi mu bikorwa bitandukanye byo kuzamura impano z’urubyiruko muri uyu mukino. Amafaranga baduhaye azadufasha cyane mu myiteguro kugira ngo igikorwa kizagende neza.”

Yakomeje agira ati “World Vision itandukanye n’abandi bafatanyabikorwa kuko ibyo ikora ni ubwitange, ntabwo hazamo ibintu byo kuvuga ngo urampa nanjye nguhe nunguke. Babikora mu rwego rwo gufasha umuryango muri rusange no guteza imbere urubyiruko.”

Kigali International Peace Marathon 2018 izaba ku Cyumweru, tariki 20 Gicurasi, izatwara amafaranga y’u Rwanda agera kuri miliyoni 120.

Biteganyijwe ko izitabirwa n’abagera ku 8000 bazakina mu bice bitatu harimo icy’abiruka marathon (ibirometero 42), abiruka igice cya marathon (ibirometero 21) n’icy’abiruka bishimisha (Run for Fun).

Kwiyandikisha ku bashaka kuryitabira birakomeje ku mashami ya MTN kuri UTC, CHIC, Nyabugogo, Nyarutarama na Remera, ku cyicaro cya Banki ya Kigali no ku murongo wa mobile money wa *182*3*505050*2000#.

Umuyobozi wa World Vision mu Rwanda, Sean Kerrigan (Iburyo) yashyikiriza sheki Umuyobozi w’Ishyirahamwe ry’Imikino Ngororamubiri mu Rwanda, Mubirigi Fidèle
Nyuma yo kwakirara inkunga ya World Vision muri “Peace Marathon” bafashe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza