Minisitiri w’Intebe mu gukemura bombori bombori iri mu Ishyirahamwe ry’abasiganwa ku maguru

Minisitiri w’Intebe mu gukemura bombori bombori iri mu Ishyirahamwe ry’abasiganwa ku maguru


Yanditswe kuya 8-05-2012 - Saa 09:03'

Ku Cyumweru tariki ya 6 Gicurasi 2012, Kuri Stade Amahoro i Remera hateraniye inama yari ihuriwemo n’Intumwa ya Ministiri w’Intebe, Ministeri y’Umuco na Siporo, Abayobozi b’Amatsinda biruka ku maguru(Clubs) n’abanyamakuru, igamije kwiga ku bibazo bimaze igihe byibasiye Ishyirahamwe ry’Abasiganwa ku maguru “Federation d’Athletisme”.

Nyuma y’uko Ministiri w’Intebe Dr Habumuremyi Pierre Damien agiranye ibiganiro biziguye n’ababyifuzaga bose ubwo yamurikiraga Abanyarwanda ibyo Guverinoma ayoboye iri gukora kuri tariki ya 27 Mata 2012, mu bibazo yagejejweho hari harimo n’ikibazo cy’uwahoze yungirije Perezida mu Ishyirahamwe ry’abasiganwa ku maguru (Federation d’Atletisme) ariwe Rurangirwa Louis, aho yavugaga ko yakuwe kuri uyu mwanya mu buryo bunyuranye n’amategeko.

Minisitiri w’Intebe yashyizeho Barikana Eugene nk’intumwa igomba kumva ikanakurikirana amavu n’amavuko y’icyo kibazo cyari giteye inkeke haba muri iyi komisiyo ndetse no mu gihigu hose ku bagira uruhare muri iyi mikino ya Athletisme dore ko abanyarwanda bakizamuka hirya no hino mu Rwanda mu mukino wo kwiruka ku maguru usanga bari kuhazaharira cyane bitewe n’imiyoborere mibi.

Uko ikibazo giteye

Aya makimbirane atari aya none kuko no guhera mu mwaka w’1987 yariho nk’uko byatangajwe n’umwe mu bahoze muri iri shyirahamwe mu mwaka w’1987 kugeza magingo aya, kimaze kugira isura idasanzwe ahanini bitewe n’uko abakora bose muri iri shyirahamwe ari abakorerabushake(bakora badahembwa).

Gusa ngo bitewe n’amafaranga yoherezwa ava hirya no hino haba mu Rwanda n’ahandi ku isi yo gufasha iri shyirahamwe kugera ku nshingano zaryo nk’uko bikwiye, abayobozi bo muri iri shyirahamwe, ngo usanga aho gukoresha aya mafaranga ibyo yakagombye gukora, akenshi aburirwa irengero. Aya mafaranga ahanini akaba ariyo ari kubatera impagarara.
Mu gukemura iki kibazo ku buryo bunogeye buri ruhande, hatanzwe umwanya uhagije wo gusobanura uko ikibazo cyifashe, n’ubwo byari bisanzwe bivugwa ko hari hariho komite ebyiri zitandukanye ziyobora iri shyirahamwe, muri iyi nama icyagaragaye ni uko nta komite ebyiri zihari ahubwo ari ibibazo byagaragaye muri komisiyo byaje gutuma kuri tariki ya 14 Kanama 2011 habaho inama rusange yasabaga abagize komite kwiyunga kubera ibibazo bifitemo ahanini bishingiye kukurwanira ubuyobozi n’amafaranga.

Igihe cy’iminota 20 bari bahawe ngo ubwo bwiyunge buboneke, cyarinze gishira butagezweho akanama kari kayoboye iyi nama rusange gahita gafata icyemezo cyo gukuraho iyo komite yari iriho, bashyiraho abantu bake baba bafasha ishyirahamwe mu gukora ubushakashatsi ku mutungo wakoreshejwe, gukurikirana uko ibikorwa byifashe no gutegura amatora y’ubuyobozi bushya mu gihe bigaragaye ko ibyavuye mu bushakashatsi bwakozwe harimo ibyakozwe nabi n’ubuyobozi bwavuyeho. Kuri ubu Lieutenant Kayitsinga Alexandre akaba ariwe uhagarariye abo bantu bashyizweho.

Uko uwahoze ari Visi Perezida Rurangirwa Louis abyumva

Rurangwa Louis avuga ko ibyabereye muri iyi nama ari ikinamico akanavuga ko bavuga ko yigometyse kuri Leta akaba yifuza kumenya abemerewe kuba mu Rwanda n’abatabyemerewe.

Nyuma y’uko ikibazo cye akigejeje ku nzego eshatu arizo Umuvunyi, Ibiro bya Minisitiri w’Intebe (Primature) n’Inteko Ishinga Amategeko avuga ko Urwego rw’Umuvunyi rwandikiye Ibiro bya Minisitiri w’Intebe bimenyesha ko Rurangirwa ari we Visi Perezida dore ko we akurikiza raporo y’umuvunyi yisunze amategeko y’imikino mpuzamahanga, yisunze kandi n’amatora batoye yo mu 2010. Ibindi rero ngo ntabyo yitayeho kandi ngo nta muntu uri bumuhatire guca inyuma y’amategeko.

Akomeza asobanura ko ku bijyanye n’amafaranga, bamennye ibiro maze amafaranga yari arimo baranayatwara. Akaba avuga ko ari umwere kuko nta mafaranga yafashe, ahubwo atewe inkeke n’ubu bushakashatsi budashyirwa ahagaragara mbere y’uko amatora aba, kugira ngo abatwaye aya mafaranga bagaragare.

Uko abo mu Ishyirahamwe babibona

Ibi byabayeho, ntibyahagaritse ubuzima bw’ishyirahamwe kuko abajya mu marushanwa haba muri Uganda, Afurika y’Epfo n’ahandi hirya no hino ku isi bakomeje kugenda kandi aho bagiye bajya hose bikitwara neza.

Hateguwe amatora yagombaga kuba mu Cyumweru gishize, ntiyabaho kuko mu bari biyamamaje hari harimo abatujuje ibyangombwa bibemerera kwiyamamariza iyo myanya bituma asubikwa kugira ngo banoze ibyo badafite mu cyumweru gitaha bakaba bazatora bose bashyize inyungu z’Ishyirahamwe n’iz’Igihugu imbere.

Abakinnyi batandukanye(athletes) bagaragaje agahinda kabo bavuga ko batagira kivugira kuko ababashinzwe aho kugira ngo babafashe, bishyirira imbere inyungu zabo.

Icyo abahagarariye Ibiro bya Minisitiri w’Intebe babivugaho

Barikana Eugene yavuze ko Ibiro bya Minisitiri w’Intebe, Komite Olympique n’Amashyirahamwe bagomba kuzuzanya n’ubwo Minisiteri iba izikuriye, bakagendera kuri politiki imwe y’igihugu ariko buri wese akagira inshingano ze. Iyo ubwo bufatanye bwananiranye, kiba ari ikibazo kigomba gukemuka vuba.

Minisiteri y’Umuco na Siporo ishimangira ko izakomeza gukurikirana ivugururwa kuri iki kibazo ikazakurikirana ifatanyije na Komite Olympique inabafashe mu matora bazakora kuri iki Cyumweru gitaha.

Nk’intumwa ya Minisitiri w’Intebe, yavuze ko igihugu kitakirangwa n’amakimbirane kuko ari igihugu gifite amahame y’imiyoborere myiza igomba no kuba muri muri iri Shyirahamwe, kandi ko mbere y’uko amatora aba, hazabanza kugaragazwa ibyavuye mu bushakashatsi buri gukorwa.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO