Beach Volleyball World Tour: Nzayisenga na Hakizimana bageze muri kimwe cya kabiri

Yanditswe na Eric Tony Ukurikiyimfura
Kuya 23 Kanama 2019 saa 03:54
Yasuwe :
0 0

Ikipe y’u Rwanda y’abagore igizwe na Nzayisenga Charlotte na Hakizimana Judith yabonye itike yo gukina ½ mu irushanwa ry’Isi rya Beach Volleyball World Tour riri kubera i Rubavu nyuma yo gutsinda indi kipe y’u Rwanda igizwe na Muhoza Louise na Musabyimana Penelope amaseti 2-0 muri ¼.

Aba bakobwa bombi baheruka mu Gikombe cy’Isi cya Beach Volleyball cyabereye mu Budage muri Nyakanga ni wo mukino wa mbere bari bakinnye muri iri rushanwa nyuma yo kuruhuka kuri uyu wa Kane kuko bo batangiriye muri ¼.

Muri uyu mukino, Nzayisenga na Hakizimana batsinze Muhoza Louise na Musabyimana Penelope 21-14 na 21-18 bakomeza muri ½ ndetse basigara ari yo kipe imwe rukumbi ihagariye u Rwanda mu bagabo n’abagore, aho andi yose uko ari atanu yasezerewe.

Mu mukino wabanjirije uyu, Nyirarukundo Christine na Umulisa Pacifique basezerewe n’ikipe y’u Buholandi igizwe na Van Driel na Teinders ku maseti 2-0 (21-8 na 21-10) mu gihe undi mukino wa ¼ warangiye ikipe ya Denmark (Zibrandtsen/Olsen) itsinze iya Côte d’Ivoire (Fieny/Miessan) amaseti 2-0 (21-5 na 21-8).

Muri ½ kizakinwa kuri uyu wa Gatandatu, Nzayisenga na Hakizimana bazahura na Zibrandtsen na Olsen bo muri Denamark guhera ejo saa 10:20 mu gihe undi mukino uzahuza Van Driel na Reinders bo mu Buholandi na Palmer na Grimson bo mu Bwongereza.

Nzayisenga Charlotte yavuze ko biteze ko umukino bazahuramo n’ikipe ya Denmark uzaba utoroshye, ariko bazakora ibishoboka byose bakagera ku mukino wa nyuma.

Ati “Denmark ni ikipe ikomeye kandi natwe ntabwo tworoshye. Icyo tugomba gukora ni ugutanga ibyo dufite byose kugira ngo dushake intsinzi. Ni ikipe nabonye ikinisha mu mutwe cyane icungana n’amakosa yo guhagarara nabi kugira ngo bagutere umupira aho utari”.

Kuri uyu wa Gatanu ni bwo hakinwa kandi imikino ya ¼ mu bagabo mu gihe na bo bazakina ½ kuri uyu wa Gatandatu.

Ikipe ebyiri z'u Rwanda zahuriye muri kimwe cya kabiri mu bagore
Nzayisenga Charlotte atera umupira
Musabyimana Penelope atangiza umupira nyuma yo gutsinda inota
Nzayisenga Charlotte na Hakizimana Judith bageze muri 1/2
Musabyimana Penelope na Muhoza Louise ntiborohewe na bagenzi babo b'Abanyarwandakazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza