FRVB yabonye umuyobozi mushya wahize kuzana impinduka muri Volleyball y’u Rwanda

Yanditswe na Manzi Rema Jules
Kuya 6 Gicurasi 2017 saa 11:12
Yasuwe :
0 0

Karekezi Léandre yatorewe kuyobora Ishyirahamwe ry’Umukino wa Volleyball mu Rwanda (FRVB) mu gihe cy’imyaka ine iri imbere, asezeranya guteza imbere ibikorwa remezo birimo ibibuga no kuzamura urwego rw’uyu mukino mu gihugu.

Karekezi wahoze ari Meya wa Gisagara, yari yatsinzwe mu matora ya komite nshya ya FRVB yaherukaga kuba ku itariki 4 Gashyantare 2017 icyo gihe umwanya wa Perezida wari wegukanwe na Nkurunziza Gustave wari uwusanganywe gusa nyuma y’igihe gito aza kwegura ku mpamvu ze bwite nubwo hari nyuma yo kuva mu nkiko akekwaho kunyereza umutungo w’iri shyirahamwe.

Mu matora yo gusimbura Nkurunziza n’abandi bari beguye ku mpamvu zifitanye isano yabaye kuri uyu wa Gatandatu mu cyumba cya Minisiteri y’Umuco na Siporo, Karekezi wari umukandida rukumbi ku mwanya wa Perezida yatowe ku ku majwi 23 kuri 23 aho abanyamuryango bakoreshaga ‘Yego’ cyangwa ‘Oya’.

Mu ijambo rye yagejeje ku banyamuryango ba FRVB, yavuze ko intego ye ya mbere ari ukuzamura urwego rw’ibikorwa remezo cyane cyane ibibuga mu bice bitandukanye by’igihugu ari na byo bizatuma n’umukino uzamuka.

Yagize ati “Muri gahunda yanjye harimo guteza imbere ibikorwa remezo cyane cyane ibibuga. Iyo urebye, ibibuga bigaragara mu bigo by’amashuri no mu Mujyi wa Kigali ariko hirya no hino mu Ntara nta bihari. Ibi ni byo tugiye gukora kuko ibibuga bya Volleyball ntabwo bihenda. Tugiye gukora ibishoboka tubikwirakwize hose cyane cyane iyo mu byaro”.

Karekezi wahoze ari umukinnyi ukomeye wa Volleyball ndetse akaba yaranabaye mu Ikipe y’Igihugu, azwi cyane mu bikorwa yakoreye Akarere ka Gisagara ubwo yari akabereye umuyobozi by’umwihariko ahaba yarakubakiye inzu yo gukiniramo imikino itandukanye(Gymnase) ifite na Guest House.

Aka karere kari mu bwigunge bwo kutagira ikipe iyo ariyo yose ikomeye yatuma abagatuye basusuruka, yasize agashinzemo iya Volleyball ‘Gisaraga Volleyball Club’ kuri ubu irimo guhanganira igikombe cya shampiyona.

Uretse Karekezi wabaye Perezida, hanatowe Visi Perezida wa kabiri umwanya wegukanywe na Ruterana Ferdinand watanzwe n’ikipe ya KVC akaba yabonye amajwi 23 kuri 23 aje asimbura Ribanje Jean Pierre nawe weguye ku mirimo ye naho umubitsi yabaye Mukamurenzi Providence watanzwe n’ikipe ya Rwanda Revenue Authorithy Women Volleyball Club (RRA WVC) wabonye amajwi 22 kuri 23 akaba agiye gusimbura Uwera Jeannette weguye nyuma yo gufungurwa.

Ihererekanya bubasha hagati ya komite y’inzibacyuho yari iyobowe na Kansiime Julius usanzwe ari Visi Perezida wa mbere na Karekezi watowe ryahise rikorwa akaba yeretswe n’umutungo w’Ishyirahamwe urimo miliyoni esheshatu n’ibihumbi 500 z’amafaranga y’u Rwanda, konte y’amadorali iriho angana na $ 1093 ndetse n’umwenda wa Miliyoni eshatu z’amanyarwanda.

Karekezi ashyikirizwa ibijyanye n'ishyirahamwe agiye kuyobora
Komite nshya ya FRVB iyobowe na Karekezi Léandre

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza