Gisagara VC yihimuye kuri REG VC bituma hitabazwa umukino wa kamarampaka

Yanditswe na Eric Tony Ukurikiyimfura
Kuya 12 Gicurasi 2019 saa 09:49
Yasuwe :
0 0

Umukino wa kabiri wa Playoffs wabereye mu majyepfo kuri uyu wa Gatandatu, warangiye Gisagara VC yihimuye kuri REG VC nayo iyitsinda amaseti 3-0 mu mikino yo guhatanira igikombe cya shampiyona.

Gisagara VC yari imbere y’abafana bayo yaje ishaka gutsinda uyu mukino nyuma yo gutakaza uwa mbere wabereye i Kigali ku maseti 3-0, mu cyumweru gishize.

Iyi kipe yatsinze iseti ya mbere ku manota 25-22, itsinda iya kabiri kuri 25-21 mu gihe REG VC yananiwe kuzamura amanota mu iseti ya nyuma, itsindwa kuri 25-17.

Gutsinda uyu mukino kwa Gisagara VC byatumye amakipe yombi anganya umukino 1-1, aho hazitabwa umukino wa kamarampaka wa gatatu uzabera i Kigali ku wa Gatandatu utaha, tariki ya 18 Gicurasi 2019.

Nyuma yo gutakaza uyu mukino, umutoza wa REG VC, Mugisha Benon, yavuze ko kuri uyu wa Gatandatu ikipe ye bitayihiriye cyane mu guhagarika imipira yatewe na Gisagara VC.

Ati ”Ntabwo twakinnye neza cyane mu guhagarika imipira. Twagerageje ariko ntibyagenda neza. Gisagara VC n’ubundi ihora itera imipira ikomeye, nitwe twari hasi uyu munsi. Hari igihe uba wizeye umukinnyi rimwe bikanga, natwe niko byagenze. Ibyo tunaniwe gukora nibyo tugiye gukoraho.”

Mutabazi Elie utoza Gisagara VC yavuze ko gutsinda uyu mukino wa kabiri byongeye guha ikipe ye amahirwe yo kwegukana shampiyona y’uyu mwaka.

Ati ”Ntabwo ari ukwihimura kuko turakinnye turatsinda. Iyo dutakaza uyu mukino igikombe cyari kuba kigiye ariko twihaye andi mahirwe yo kwisuganya ngo turebe ko twatwara kiriya gikombe.”

UTB VC yegukanye umwanya wa gatatu nyuma yo gutsinda IPRC Ngoma umukino wa kabiri amaseti 3-1 (28-26, 22-25, 25-18, 25-18).

Gisagara VC yatsinze umukino wa kabiri, bituma hazitabazwa uwa gatatu
REG VC yari yatsinze umukino wa mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza