Nkurunziza wahoze ari Perezida wa FRVB yatorewe kuyobora Zone V y’ibihugu 12

Yanditswe na Manzi Rema Jules
Kuya 4 Nyakanga 2017 saa 08:03
Yasuwe :
0 0

Nkurunziza Gustave wahoze ari Perezida w’Ishyirahamwe rya Volleyball mu Rwanda (FRVB) yatorewe kuyobora ibihugu 12 bihuriye mu Karere ka Gatanu (zone V).

Nkurunziza wamaze imyaka ine ayobora FRVB akaza gusimburwa na Karekezi Léandre uyu mwaka, yagiriwe icyizere cyo kuyobora Zone V aho ateganya gufasha mu iterambere ry’uyu mukino biciye mu bana, gutanga amahugurwa ku batoza, abayobozi n’abandi bagira uruhare mu iterambere rya Volleyball nk’uko yabitangarije IGIHE.

Yagize ati “Habayeho inama y’inteko rusange ya Zone V yabereye i Nairobi muri Kenya tariki 30 Kamena, muri iyo nama hagombaga kwigirwamo ukuntu Zone ya Gatanu yakongera gukora ku buryo bugaragara kuko byasaga nk’aho ibikorwa byayo bisinziriye mu gihe andi mazone, kuko Afurika igabanyijemo arindwi, yo akora.”

Akarere ka Gatanu u Rwanda rubarizwamo kagizwe n’ibihugu 12 birimo Misiri, Kenya, Uganda, Rwanda, Sudani, Sudani y’Epfo, Ethiopia, Djibouti, Erytria, Burundi, Tanzania na Somalia.

Aka karere gasanzwe gafite komite yari yaratowe mu 2015 ariko kubera kutumvikana n’ Impuzamashyirahamwe y’uyu mukino muri Afrika (CAVB) ku bijyanye n’impamvu ituma Zone V idakora uko bikwiye, bituma ikurwaho hatorwa indi nshya iyobowe na Nkurunziza.

Mu ntego ze, Nkurunziza yavuze ko azibanda n’ubundi ku bikorwa bya Zone, aho iba igomba gutegura amarushanwa mu byiciro byose muri Volleyball ikinirwa mu nzu (indoor), ikinirwa ku mucanga (beachVolleyball).

Yagize ati “Hari amarushanwa yo ku rwego rwa Afurika no ku rw’Isi ahera muri Zone, haba mu bakuru ndetse no mu byiciro bitandukanye by’abakiri bato. Amakipe abonye tike aba agomba koroherezwa gukomeza, ibi byose rero ni twe bireba.”

Yakomeje agira ati “Ikindi ni uguteza imbere umukino biciye mu gushaka abana bakiri bato bafite impano mu bihugu byose, amahugurwa ku batoza, abayobozi b’amashyirahamwe, abaganga, abasifuzi n’abandi bagira uruhare mu iterambere ry’umukino.”

Nkurunziza yanavuze ko hari umushinga w’uko ibihugu byajya bitegura amarushanwa atandukanye abihuza bitagombye gutegereza ayateguwe ku rwego rwa Afurika cyangwa urw’Isi, akaba yafasha ibihugu kugira amakipe akomeye ashobora no guseruka akitwara neza.

Uretse Nkurunziza watorewe kuba Perezida, hanatowe babiri bungirije barimo Dr Fouad Abd El Salam wo mu Misiri; Augustino Israel Agapa wo muri Tanzania; Umunyamabanga mukuru yabaye Martin Makokha wo muri Kenya naho Umubitsi hatorwa Hadija Namanda wa Uganda.

Nkurunziza Gustave watorewe kuyobora ibihugu 12 bihuriye mu Karere ka Gatanu (zone V)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza