Nyirimana yanze kungiriza mu ikipe y’igihugu ya Volleyball, agaragaza bimwe mu byari bihishwe

Yanditswe na Eric Tony Ukurikiyimfura
Kuya 21 Gicurasi 2019 saa 05:39
Yasuwe :
0 0

Umutoza w’ikipe ya UTB VC, Niyirimana Fidèle, yandikiye Ubuyobozi bw’Ishyirahamwe ry’Umukino wa Volleyball mu Rwanda, FRVB, abumenyesha ko atazunguriza umutoza mukuru w’ikipe y’igihugu nk’uko byari byagenwe.

Ku wa Mbere w’iki Cyumweru, ni bwo FRVB yashyize ahagaragara itangazo rigenewe abanyamakuru, rigaragaza abakinnyi 22 bahamagariwe kwitabira umwiherero w’ikipe y’igihugu yitegura imikino ya Zone V izabera muri Kenya mu kwezi gutaha ndetse hanatangazwa abatoza bashya b’ikipe y’igihugu.

Iyi kipe yahawe Mutabazi Elie umaze iminsi afashe Gisagara VC, aho yari yungirijwe na Nyirimana Fidèle utoza UTB VC mu gihe aba batoza bombi bahawe Paul Bitok watozaga iyi kipe nk’umujyanama, ariko amasezerano ye akazaba azarangirana n’ukwezi gutaha, nk’uzajya areberera ibyo bakora.

Ubwo ikipe y’igihugu yatangiraga imyitozo kuri uyu wa Mbere kuri Petit Stade Amahoro, yakoreshejwe n’umutoza mukuru, Mutabazi Elie, ndetse hari na Paul Bitok nk’umureberera mu gihe umutoza wungirije, Nyirimana Fidèle atigeze ahagaragara.

Mu gitondo cyo kuri uyu wa Kabiri, nibwo hagiye hagaragara ibaruwa Niyirimana Fidèle yandikiye umuyobozi w’Ishyirahamwe ry’umukino wa Volleyball, FRVB, avuga ko atazakora inshingano yahawe zo kungiriza mu ikipe y’igihugu.

Mu mpamvu uyu mutoza yatanze, yashyizemo iyo kuba ubwo yaherukaga gukorana n’aba yari yahawe ngo bafatanye, nta musaruro mwiza ikipe y’igihugu yigeze igira.

Ati” Nyakubahwa Perezida, mu mikino y’ikipe y’igihugu mperukamo yabereye mu Rwanda, nkorana n’itsinda ry’abatoza nahawe, twatanze umusaruro udashimishije. Nyuma natunguwe no kumva bamwe mu bo twafatanyije bahamije ko ari njye utaratanze umusaruro bishimangirwa n’uko imikino yakurikiyeho mu Misiri, navanywe muri iryo tsinda kandi ntamenyeshejwe indi mpamvu mu gihe rwari urugendo rumwe rugikomeza.”

Nyirimana akomeza avuga ko ubwo yakoranaga na Paul Bitok ndetse na Mutabazi Elie, bagize umusaruro mubi imbere ya Kenya ndetse yongeraho ko kuba ikipe bari bahamagaye uko ari batatu, yarahinduwe atabimenyeshejwe bitamushimishije, asaba gusimbuzwa kuri uwo mwanya.

Ati” Nshingiye kandi ko tumaze guhabwa amabaruwa aduha inshingano zo gutoza ku wa 18/05/2019, twahuye nk’itsinda ry’abantu batatu barimo umutoza mukuru, umutoza wungirije ndetse n’ureberera (Supervisor), tugatoranya abakinnyi 22 ariko ku wa 20/05/2019 hagatangazwa ikipe yahinduwe kandi ntamenyeshejwe, nta n’uruhare nabigizemo […] Nasabaga gusimbuzwa.”

Uyu mutoza avuga ko aramutse yemeye izi nshingano, azi uburemere bw’umusaruro Ikipe y’Igihugu isabwa kandi uruhare rwe atarutanga ku buryo bukwiriye, byagira ingaruka ku kazi ke no kuri Volleyball muri rusange.

Niyirimana Fidèle atoza UTB VC guhera muri uyu mwaka w’imikino, ni nyuma y’uko mu mwaka ushize, afashije Gisagara VC kwegukana igikombe cya shampiyona muri uyu mukino.

Abakurikirana umukino wa Volleyball mu Rwanda batunguwe no kubona Mutabazi Elie udafite ikipe ikomeye yatoje, agirwa umutoza w’ikipe y’igihugu imbere ya Nyirimana Fidèle wari wagizwe umwungiriza.

Inkuru bifitanye isano: Mutabazi yahawe ikipe y’igihugu ya Volleyball, ahamagara abitegura Zone V

Niyirimana Fidèle yanze ibyo kungiriza mu ikipe y'igihugu
Niyirimana avuga ko aramutse yemeye uyu mwanya atabona uko atanga ibitekerezo bye ndetse byagira ingaruka zitari nziza ku musaruro w'ikipe y'igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza