RRA VC yitegura imikino Nyafurika, yahigiye kwegukana irushanwa ryo kwibuka Padiri Kayumba

Yanditswe na IGIHE
Kuya 16 Gashyantare 2017 saa 01:30
Yasuwe :
0 0

Mu mpera z’iki cyumweru amakipe abarizwa muri shampiyona y’icyiciro cya mbere n’icya kabiri ndetse n’ay’abari n’abategarugori mu mukino wa Volleyball, arahurira i Huye mu irushanwa ritegurwa n’Ishuri Indatwa n’Inkesha (GSO Butare) ryo kwibuka uwahoze ari Umuyobozi waryo, Padiri Kayumba Emmanuel.

Iri rushanwa ngarukamwaka, ku nshuro yaryo ya gatandatu biteganyijwe ko rizaba hagati ya tariki ya 18 kugeza 19 Gashyantare 2017.

Ikipe y’Ikigo cy’Imisoro n’Amahoro (RRA) yegukanye igikombe cy’umwaka ushize itsinze APR amaseti 3-1 mu cyiciro cy’abagore, ifite intego yo kucyisubiza, inarushaho kwitegura imikino Nyafurika y’amakipe yabaye aya mbere iwayo nk’uko
Umutoza Mukuru wayo, Masumbuko Jean de Dieu [Masumbe] abitangaza.

Uyu mutoza avuga ko ikipe ye ihagaze neza ndetse n’umukinnyi wayo ukomeye wari wagiye gukina muri Turikiya, Mukantambara Seraphine bita Baby, yagarutse ari gufatanya na bagenzi be mu myitozo, byanagaruye umwuka mwiza mu ikipe.

Yakomeje avuga ko adatewe ubwoba n’andi makipe bahanganye muri iri rushanwa arimo APR Women VC, Ruhango na IPRC Kigali.

Masumbuko yemeza ko iri rushanwa rizabafasha gukomeza kwitwara neza muri Shampiyona ndetse no kunoza imyiteguro y’irushanwa nyafurika ry’amakipe yabaye aya mbere iwayo rizabera muri Tunisia muri Mata 2017.

Mu mpera z’icyumweru gishize, RRA VC yatangiye shampiyona y’igihugu yitwara neza aho yatsinze St Joseph amaseti 3-0 ndetse na Ruhango VC yatsinze 3-1.

Muri 2015, RRA VC yari yaserukiye u Rwanda mu mikino nyafurika ihuza amakipe yabaye aya mbere iwayo, amarushanwa yabereye mu Misiri. Icyo gihe yatahanye umwanya wa gatandatu, mu gihe mu 2016, yongeye kwitabira iyabereye muri Tunisia, itahana umwanya wa kane muri Afurika.

Masumbuko atangaza ko intsinzi igerwaho kubera umwuka mwiza abakinnyi baba bafite bitewe n’uko ubuyobozi bwa RRA bubahora hafi bukabafasha uko bikwiye.

Ikipe ya Volleyball y’Abakobwa ya RRA imaze kuba ubukombe, yashinzwe muri 2008. Yatangiye ari ikipe igizwe n’abakozi ba RRA iza kujya muri Shampiyona y’igihugu yitwara neza. Nyuma yaje kongererwa imbaraga hiyongeramo abakinnyi bakiri bato, b’abanyeshuri mu mashuri yisumbuye na Kaminuza bakaba bitabwaho neza na RRA mu masomo yabo n’imibereho.

Uko amakipe azahura mu bindi byiciro mu marushanwa yo kwibuka Padiri Kayumba

Amakipe y’abagabo akina mu cyiciro cya mbere

- UNIK

- GISAGARA

- UTB

- KVC

- APR VC

- IPRC South

- KIREHE

- REG

Amakipe y’icyiciro cya kabiri

- GSOB

- College du Christ Roi

- IPRC East

- IPRC West

- Petit Seminaire Virgo Fidelis (PSVF)

- Groupe Scolaire St Philippe Neri de Gisagara

- Gatenga

- Lycée de Nyanza

- Rusumo High School

Abasheshe akanguhe

- Mamba

- Tout Age

- Relax

- Umucyo

- Nyaruguru

- WASAC

- Les Anciens du GSOB

- Les Anciens du PSVF

RRA VC iri mu myiteguro y’imikino Nyafurika yiteguye kwitwara neza mu irushanwa ryo kwibuka Padiri Kayumba
Abatoza ba RRA VC batanga amabwiriza ku mukino wa shampiyona yatangiye mu cyumweru gishize
RRA VC izacakirana na IPRC Kigali mu irushanwa ryo kwibuka Padiri Kayumba Emmanuel

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244