UTB VC na Nkumba University zegukanye ibikombe mu irushanwa ryo Kwibuka (Amafoto)

Yanditswe na Eric Tony Ukurikiyimfura
Kuya 1 Nyakanga 2019 saa 12:03
Yasuwe :
0 0

Ikipe ya Kaminuza y’Ubukerarugendo, Ubucuruzi n’Ikoranabuhanga, UTB VC mu bagabo na Nkumba University mu bagore, zegukanye ibikombe mu irushanwa rya Volleyball ryo kwibuka abari abakinnyi, abayobozi n’abakunzi b’uyu mukino bishwe muri Jenoside yakorewe Abatutsi mu 1994, imikino yasojwe kuri iki Cyumweru.

Iri rushanwa ryatangiye ku wa Gatanu, ryasojwe kuri iki Cyumweru hanashimirwa uwari umutoza w’amakipe y’igihugu ya Volleyball, umunya-Kenya Paul Bitok wari umaze imyaka 10 mu Rwanda, ariko akaba atazongera amasezerano.

Muri iyi mikino yo kwibuka yabaga ku nshuro ya 21 kuva ibaye mpuzamahanga, UTB VC yari yabaye iya gatatu mu mwaka ushize, ni yo yegukanye igikombe itsinze REG VC yari ifite igikombe giheruka ku maseti 3-1 (25-15, 21-25, 19-25,25-10 na 15-13).

Mu cyiciro cy’abagore, Nkumba University yo muri Uganda yisubije iri rushanwa yari yegukanye no mu mwaka ushize, aho yegukanye irushanwa ry’uyu mwaka itsinze RRA ku mukino wa nyuma.

Ikipe ya mbere mu bagabo no mu bagore, zahawe igikombe na miliyoni imwe y’amafaranga y’u Rwanda, iza kabiri zihabwa ibihumbi 600 Frw mu gihe buri kipe ya gatatu yahawe ibihumbi 400 Frw ndetse hanatangazwa abakinnyi bitwaye neza kurusha abandi muri buri cyiciro.

Abakinnyi ba UTB bateraga imipira ikomeye
Gisagara VC ni yo yari ifite gikombe giheruka mu bagabo
UTB yihagazeho, ibasha kwegukana umwanya wa mbere
Umutoza wa UTB Nyirimana Fidele (imbere) yishimira kwegukana irushanwa ryo kwibuka
Nkumba University yongeye kuba iya mbere mu bagore
Abakinnyi bitwaye neza kurusha abandi mu bagore
UTB VC ni imwe mu makipe amaze igihe gito ashinzwe ariko ikomeye
Paul Bitok watozaga amakipe y'igihugu y'u Rwanda yashimiwe n'Ishyirahamwe ry'Umukino wa Volleyball mbere yo gusubira iwabo muri Kenya
Uyu mugabo w'imyaka 48 yageze mu Rwanda mu 2009
REG VC yabaye iya kabiri mu irushanwa ry'uyu mwaka

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza