Volleyball: RRA VC yegukanye “Carre d’AS”ya gatanu, Kirehe VC yihaniza APR VC

Yanditswe na Manzi Rema Jules
Kuya 4 Ukwakira 2017 saa 11:58
Yasuwe :
0 0

Ikipe y’abakobwa ya RRA niyo yegukanye irushanwa rya Carre d’AS 2017, rihuza amakipe ane ya mbere muri shampiyona itsinze APR VC amaseti atatu kuri abiri naho mu bagabo Kirehe VC nayo yihaniza APR VC ku maseti atatu kuri imwe.

Imikino ya carre d’AS yabaye mu mpera z’icyumweru gishize, yitabiriwe n’amakipe yabaye aya mbere mu bagore RRA VC, APR VC, Ruhango VC na St Aloys VC naho mu bagabo yitabirwa na Kirehe VC, APR VC na Gisagara VS nyuma y’uko IPRC South isezeye ku munota wa nyuma.

Mu mikino y’ijonjora, RRA VC yatsinze amakipe yose bahuye, irangiza ari iya mbere igera ku mukino wa nyuma yahuriyeho na APR VC zihora zihanganye yo yabashije gutsinda Ruhango na St Aloys.

Ku mukino wa nyuma RRA VC yatsinze APR VC bigoranye ku maseti 3-2 (18-25, 25-19, 25-21, 20-25, 15-12) yegukana igikombe kibaye icya gatanu mu mateka yayo inahabwa ibahasha irimo ibihumbi 350,000 Frw.

Iyi kipe y’Ikigo cy’Igihugu gishinzwe imisoro n’amahoro, yanashyikirijwe ku mugaragaro igikombe cya Shampiyona yegukanye tariki 3 Nzeri 2017 itsinze n’ubundi APR VC ku mukino wa kamarampaka (Playoff) amaseti 3-0 (25-22, 25-18, 25-18).

Umutoza w’iyi kipe, Masumbuko Jean de Dieu, yatangaje ko intsinzi babona ziba zateguwe abakinnyi bameze neza mu mutwe ku buryo bakina nta gihunga kandi n’ubuyobozi bwa RRA bukababa hafi.

Yagize ati “Imikino tuba twayikaniye, nta kipe dusuzugura niyo mpamvu ubona dufite ishyaka mu kibuga. Abakinnyi baba bameze neza, ubuyobozi bubaba hafi natwe tugakora akazi kacu dushaka intsinzi.”

Mu bagabo Kirehe VC yahaye isomo APR VC iyitsinda amaseti 3-1 (21-25, 25-16, 25-23, 25-23) yegukana igikombe n’ibihumbi 350 by’amafaranga y’u Rwanda.

Biteganyijwe ko kuri uyu wa Gatatu habaho ijoro ryo gushimira abakinnyi n’abatoza bitwaye neza muri iyi mikino ryateguwe na Tele 10.

Ibyo wamenya ku ikipe ya RRA y’abakobwa

RRA VC ikomeje kwigarurira Volley ball y’abagore, yagombaga guhagararira u Rwanda uyu mwaka mu mikino ihuza amakipe yabaye aya mbere iwayo yabereye muri Tunisia muri Mata gusa ntibyakunda kubera ikibazo cy’amikoro.

Umwaka wa 2016 nabwo ni RRA yaserukiye u Rwanda mu mikino yabereye muri Tunisia itahana umwanya wa kane ku rwego rwa Afurika.

Iyi kipe imaze kuba ubukombe yashinzwe mu 2008 ari ikipe igizwe n’abakozi ba RRA iza kujya muri shampiyona y’igihugu yitwara neza bituma yongererwa imbaraga itangira kuzana abakinnyi bakiri bato b’abanyeshuri mu mashuri yisumbuye na Kaminuza bagahembwa gufashwa mu masomo n’ubuzima bwa buri munsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza