A.Y yahishuye Umunyarwandakazi bagiye kurushinga (Amafoto)

Yanditswe na Munyengabe Murungi Sabin
Kuya 27 Ukuboza 2016 saa 05:12
Yasuwe : XX
0

A.Y, umwe mu bahanzi bubashywe muri Afurika y’Uburasirazuba by’umwihariko iwabo muri Tanzania yerekanye ku nshuro ya mbere umukobwa bakundana ukomoka mu Rwanda.

Ambwene Allen Yessayah wamamaye nka A.Y., ni umuraperi ukomeye muri Tanzania, yavutse ku itariki ya 5 Nyakanga 1981. Mu kiganiro aherutse kugirana na IGIHE yashimangiye byeruye ko ari mubyara wa Alpha Rwirangira, nyina yari Umunyarwandakazi mu gihe se ari Umunyatanzaniya wuzuye w’ahitwa Mbeya.

Ku nshuro ya mbere kuva yaba icyamamare, A.Y yerekanye amafoto y’umukobwa bakundana ndetse bamaranye imyaka umunani ariko ntiyigeze yemera na rimwe ko afite umuntu bakundana.

Kuri uyu wa 27 Ukuboza ni isabukuru y’amavuko y’umukunzi wa A.Y witwa Remy, uyu muraperi yanditse ubutumwa bumwifuriza ibyiza kuri Instagram anashyiraho amafoto ye mu buryo bw’inkurikirane.

Ku ifoto imwe A.Y yanditse ati “Isabukuru nziza y’amavuko kuri wowe ugomba kuzambera umugore. Ndagukunda cyane kandi urabizi [akurikizaho udutima]. Yongeye gushyiraho indi foto ayandikaho ko ‘bakoranye urugendo kuva mu mwaka wa 2008 kugera muri 2016’.

A.Y n’uyu mukobwa bakundanye kuva mu mwaka wa 2008 ndetse baritegura kuzarushinga nubwo iby’ubukwe ntacyo barabivugaho byeruye. Bongo5 yatangaje ko Remy atuye mu Rwanda ndetse ari naho afite inkomoko.

A.Y, umwe mu bahanzi bafite ubukire muri Tanzania aheruka kuza mu Rwanda muri Mutarama 2016, icyo gihe yavuze ko yari yaje muri gahunda ze bwite no kumenyekanisha umuziki we.

Mu byo yabwiye itangazamakuru yasize avuze ko nta mukunzi agira ariko avuga aca amarenga ko aba yaje kureba abakobwa beza bo mu gihugu nyina akomokamo.
Icyo gihe yagize ati “ Nta n’urambeshyera ngo namuteye inda ahahaha! (Aseka!) Ni yo mpamvu mba naje mu Rwanda kureba abakobwa beza, mba naje mu Rwanda iwabo wa mama ngo nkurikirane inkomoko yacu.”

Uyu mukunzi wa A.Y ngo akomoka mu Rwanda ni naho atuye

Yongeyeho ati “Nta mukunzi ngira. Nta mukunzi ngira mu gihe ba Mwana FA (umuraperi ukomeye wo muri Tanzania) baririmba ngo “njye ndi umusilamu ngomba kurongora bane nabarambirwa nkazana abandi…”

A.Y amaze imyaka irenga 20 mu muziki

A.Y yinjiye mu muziki mu 1996 ubwo yabarizwaga mu itsinda rya S.O.G, ahagana muri 2002 nibwo yatangiye kuririmba ku giti cye.

Yamenyekanye cyane ubwo yaririmbaga mu itsinda rya East Coast Army. Yaribanyemo n’abahanzi barimo Mwana FA na GK [King Crazy], ubu ntirikibaho.

Amaze gukora album zakunzwe nka ‘Raha Kamili’, ‘Hisia Zangu’ na ‘Habari Ndiyo hiyo’ yitiriye indirimbo yakunzwe yakoranye na Mwana FA.

Yakoranye indirimbo nyinshi n’abahanzi bo mu bihugu bitandukanye nka J. Martins na P Square bo muri Nigeria, Romeo bakoranye iyitwa ‘Speak With Your Body’, Sean Kingston na Ms Triniti bakoranye iyitwa Touch Me Touch Me. Yanakoranye n’abahanzi bo muri Kenya barimo Prezzo, Sauti Sol na Jaguar.

Mu mwaka wa 2013 yagizwe Ambasaderi wa Airtel Africa. Uyu muhanzi yashinze Mkasi TV , ikora ibiganiro ku byamamare mu muziki, sinema, politiki n’abandi. Mkasi TV iterwa inkunga na Coca Cola ndetse na Airtel.

A.Y yashinze sosiyete ye bwite yitwa Unity Entertainment, iramamaza, ikanategura ibitaramo muri Tanzania, izana abahanzi bakomeye bakaza kuririmbira muri Afurika y’Uburasirazuba.

Uyu muraperi afite amaduka y’imyenda, ndetse afite n’imyenda isohoka yanditseho izina rye. Ni umwe mu bahanzi bafite ibikorwa bikomeye bimwinjiriza miliyoni zitabarika buri kwezi. Hejuru y’inyungu avana mu gukora nka rwiyemezamirimo, hari n’ibyo yamamaza bikamwinjiriza miliyoni zitabarika.

Amaze kwegukana ibihembo birenga 24 birimo ibyo ku rwego mpuzamahanga nka Channel O. Mu 2012 yahawe icya Best East African Video atsinze abahanzi bakomeye muri aka karere. Yanahataniye Kora Awards, MTV Africa Music Awards n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza