Abahanzi bo mu bihugu icumi baje i Kigali mu iserukiramuco ry’imbyino

Yanditswe na Munyengabe Murungi Sabin
Kuya 24 Ugushyingo 2016 saa 11:56
Yasuwe :
0 0

Abahanzi n’amatsinda abyina yo mu bihugu icumi bya Afurika n’u Burayi batumiwe mu Mujyi wa Kigali ahagiye kubera iserukiramuco ry’imbyino East African Nights of Tolerance (EANT), rigiye kuba ku nshuro ya Gatanu.

Iserukiramuco East African Nights of Tolerance (EANT) risanzwe riba buri mwaka guhera muri 2012, rihuza abahanzi n’amatsinda y’ababyina ku giti cyabo bagatanga ubutumwa bwigisha abantu ubworoherane no gusakaza amahoro binyuze mu mbyino [danse contemporaine].

Ku mugoroba wo kuri uyu wa Gatatu tariki ya 23 Ugushyingo 2016 habaye umuhango wo gufungura ku mugaragaro iri serukiramuco ryashinzwe na Wesley Ruzibiza abinyujije muri Amizero Dance Kompagnie ari na we wayitangije.

Ruzibiza Wesley yavuze ko ‘imyaka ishize byari urugendo rukomeye kuko byari bigoranye cyane gutegurira Abanyarwanda iserukiramuco ry’imbyino za Danse Contemporaine. Ati “Ni ibintu byagoranye cyane, gutangiza iri serukiramuco Abanyarwanda batabyumva […] Nta muntu watekerezaga ko ubu buhanzi bwakorerwa mu Rwanda abantu bakabwiyumvamo.”

Iri serukiramuco rizamara iminsi itatu kuva kuwa Gatanu tariki ya 25 Ugushyingo 2016 kugeza kuwa 27 Ugushyingo 2016. Ibihugu byatumiwe birimo u Rwanda, Uganda, Kenya, Tanzania, DR Congo, Cameroon, Benin, Côte d’Ivoire, u Bufaransa n’u Bubiligi.

Imikino izerekanwa, ku munsi wa mbere hateguwe uwitwa ‘Ibeiji’ uzahuza ababyinnyi bo mu Rwanda, Benin na Côte d’Ivoire. Abakinnyi bazawugaragaramo ni Nestor Kouame, Vincent Harisdo na Wesley Ruzibiza. Indi mikino ni uwitwa Bainishi w’Abanyakenya n’undi witwa Je Prends Ma Liberté uzerekanwa n’abo muri Cameroun no mu Bufaransa.

Ku munsi wa kabiri kuri Zenith Hotel ku Kimihurura hazerekanwa uwitwa ‘Utu’ w’Abanya-Tanzania n’undi ukomeye witwa ‘Samedi Détente’ , uyu uzakinwa na Dorothée Munyaneza na Nadia Beugre wo mu Bufaransa.

Kuwa Gatandatu tariki ya 26 Ugushyingo 2016 iserukiramuco rizakomereza ku Kimisagara kuri Maison de Jeunes, hazerekanwa imikino ibiri uwitwa ‘Ma tête est mon village’ w’Ababiligi n’undi witwa ‘Unité dans la diversité’.

Munyaneza Dorothée umaze kwamamara i Burayi na we azagaragara muri iri serukiramuco

Iserukiramuco East African Nights of Tolerance rizasozwa ku Cyumweru kuri Zenith Hotel, hazerekanwa imikino itatu uwitwa ‘L’autre est moi’, ‘To Belong’ w’abazaturuka muri Uganda na ‘Masu Kaino’ uzerekanwa n’abo muri RDC.

Kuri uyu wa Kane harerekanwa umukino witwa 'Ibeiji'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244