Abahanzi bose batwaye PGGSS bari inyuma ya Paul Kagame mu matora

Yanditswe na Munyengabe Murungi Sabin
Kuya 14 Nyakanga 2017 saa 09:25
Yasuwe :
1 0

Uhereye kuri Tom Close kugeza kuri Dream Boyz iheruka guhabwa igikombe cya Primus Guma Guma Super Star bari mu bukangurambaga n’ibikorwa byo kwamamaza umukandida Paul Kagame mu matora y’Umukuru w’Igihugu.

Abakandida bahataniye umwanya wo kuba Umukuru w’Igihugu muri manda itaha ni Mpayimana Philippe [wigenga], Frank Habineza watanzwe n’Ishyaka Green Party ndetse na Paul Kagame usanzwe ari Perezida w’u Rwanda.

Muri aba bakandida buri wese ashyigikiwe mu buryo bwe gusa kuri Perezida Paul Kagame abamuri inyuma bafite umurindi ukomeye kurusha abandi ndetse no ku mbuga nkoranyambaga harazenguruka amafoto ye n’ubutumwa bwibutsa Abanyarwanda ibikorwa byihariye yakoze mu myaka amaze ayobora igihugu.

Abaririmbyi b’umuziki bafite amazina akomeye mu Rwanda hafi ya bose bashyigikiye Perezida Kagame, by’umwihariko abakunzwe kurusha abandi banabiherewe igihembo cya Primus Guma Guma Super Star guhera mu mwaka wa 2011 kugeza muri 2017 batangiye kumuherekeza mu bikorwa byo kwiyamamaza.

Mu bahanzi bamaze kumenyekana bazajya baherekeza Perezida Paul Kagame barimo Tom Close, King James, Riderman, Jay Polly, Knowless, Urban Boyz na Dream Boyz batwaye PGGSS mu myaka itandukanye. Kitoko usanzwe uba mu Bwongereza na we yaje gushyigikira Paul Kagame.

Safi Madiba uririmba muri Urban Boyz yavuze ko itsinda aririmbamo ryahisemo guherekeza Paul Kagame kuko ‘babonye ko hari byinshi yakoreye igihugu kandi akwiye gukomeza urugendo yatangiye’.

Yagize ati “Turishimira byinshi twagezeho, muri byo harimo umutekano, dufite umutekano aho dusigaye tunasagurira n’abandi. Ibyo tubikesha ubuyobozi bwiza n’imiyoborere myiza by’umwihariko Perezida wa Repubulika yacu Paul Kagame…”

Muri aba bahanzi Tom Close, King James na Kitoko baherekezaga Paul Kagame mu matora aheruka kuba mu mwaka wa 2010.

Abahanzi bose batwaye PGGSS bari inyuma ya Paul Kagame mu matora

Ibikorwa byo kwiyamamaza bitangira kuri uyu wa 14 Nyakanga 2017 bizarangira ku wa 3 Kanama buri buke haba amatora. Amatora ateganyijwe ku wa 3 Kanama 2017 ku Banyarwanda baba hanze y’igihugu no ku wa 4 Kanama ku baba mu gihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza