Abakobwa bashakishwamo Miss Rwanda batangiye umwiherero i Nyamata (Video+Amafoto)

Yanditswe na Munyengabe Murungi Sabin
Kuya 9 Gashyantare 2018 saa 06:25
Yasuwe :
0 0

Abakobwa 20 bakomeje mu cyiciro cya nyuma cy’irushanwa ryo gutora Miss Rwanda 2018 batangiye umwiherero bazamaramo ibyumweru bibiri bahabwa amasomo atandukanye ku myitwarire ya Nyampinga ubereye u Rwanda.

Iri rushanwa ryazengurutse mu Ntara zose zigize u Rwanda amajonjora asorezwa mu Mujyi wa Kigali hatoranywa abakobwa beza banafite uburanga kurusha abandi. Mu ijoro ryo ku wa 3 Gashyantare2018 akanama nkemurampaka katoye abakobwa 20 bagomba gukomeza muri iri rushanwa abandi 15 barasezererwa kuko bose hamwe mu gihugu bari 35.

Ku gicamunsi cyo kuri uyu wa Gatanu tariki 9 Gashyantare 2018 nibwo abakobwa bakomeje mu cyiciro cya nyuma bajyanywe mu mwiherero (Boot Camp) ubera kuri Golden Tulip [La Palisse] i Nyamata, bazahamara ibyumweru bibiri.

Umuyobozi wa Rwanda Inspiration Back Up yavuze ko aba bakobwa bahataniye kuba Miss Rwanda mu mwiherero batangiye i Nyamata bazanagenda bakira abantu batandukanye basanzwe bafatiraho urugero ndetse bakanasobanurirwa byimbitse imimerere ya Nyampinga u Rwanda rwifuza muri iki gihe.

Abakobwa bazahabwa inyigisho zizibanda ahanini ku muco, ubumenyi bw’Isi, amateka y’u Rwanda, ubukungu, kwihangira imirimo, kumenya guhanga udushya n’ibindi bitandukanye.

Ubu bahawe ibyumba aho babiri bahurizwa muri kimwe. Mbere yo kwinjira mu mwiherero nyir’izina, buri mukobwa yambuwe telefone n’ibindi bikoresho by’ikoranabuhanga bishobora kuba byamuhuza ntakurikirane amasomo n’inyigisho zizajya zitangwa.

Aba bakobwa bashyizwe mu byumba icumi aho babiri basangiye kimwe. Uko iminsi itatu izajya ishira bazajya bahinduranya ibyumba buri wese ahabwe undi mukobwa babana mu rwego rwo gusuzuma uburyo bw’imibanire yabo.

Abakobwa bazajya bahabwa telefone inshuro nke ndetse nabwo bazikoreshe mu buryo buzwi neza n’ababakurikirana umunsi ku munsi mu mwiherero bagiye kumaramo iminsi cumi n’ine.

Mbere yo guhaguruka i Kigali berekeza i Nyamata, aba bakobwa bose uko ari 20 n’itsinda ryari ribaherekeje, babanje gusura icyiciro cya Rwandamotor ahaparitse imodoka nshya yo mu bwoko bwa Suzuki Baleno izahabwa uwahize abandi mu buranga n’ubuhanga mu 2018.

Mbere yo kujya i Nyamata babanje gusura imodoka nziza ya Suzuki Baleno izahembwa Nyampinga

Iyi modoka yakozwe n’uruganda Suzuki rwo mu Buyapani, yaguzwe na Banki ya Cogebanque ari nayo muterankunga mukuru w’irushanwa rya Miss Rwanda. Ifite agaciro ka miliyoni 18 z’amafaranga y’u Rwanda mu gihe iyahawe Iradukunda Elsa yaguzwe miliyoni 15.

Abakobwa 20 bari mu mwiherero ni :

1. Uwase Ndahiro Liliane
2. Umunyana Shanitah
3. Irebe Natacha Ursule
4. Munyana Shemsa
5. Umuhioza Karen
6. Umuhire Rebecca
7. Ishimwe Noriella
8. Iradukunda Liliane
9. Uwase Fiona
10. Irakoze Vanessa
11. Umutoniwase Anastasie
12. Dushimimana Lydia
13. Ingabire Belinda
14. Ingabire Divine
15. Uwankunda Belinda
16. Umutoniwase Paula
17. Uwineza Solange
18. Mushambokazi Jordan
19. Nzakorerimana Gloria
20. Umutoni Charlotte

Irebe Natacha na Ingabire Divine basangiye icyumba
Iradukunda Liliane na Nzakorerimana Gloria mu cyumba cyabo muri Golden Tulip
Ubwo abakobwa binjiraga muri Hotel Golden Tulip
Irakoze Vanessa na mugenzi we Mushambokazi Jordan bahawe icyumba kimwe
Ibyumba bashyizwemo birimo ibitanda bibiri by'impanga
Mu byumba byabo bafite itumanaho

Abakobwa bahawe imyenda ya siporo

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza