Abakobwa10 b’ibyamamare bihariye umwaka wa 2016

Yanditswe na Munyengabe Murungi Sabin
Kuya 28 Ukuboza 2016 saa 01:46
Yasuwe :
0 0

Amatwi y’Abanyarwanda yagaburiwe byinshi mu mwaka wa 2016, hari amazina yagarutse cyane mu mitwe ya benshi haba mu itangazamakuru, mu biganiro hagati y’abantu, ku byapa, ku mbuga mpuzabantu na nkoranyambaga ku bw’ibikorwa buri wese yakoze.

Muri aba bantu uko ari icumi bigaruriye umwaka wa 2016 mu itangazamakuru no mu buzima busanzwe babamo, harimo abakoze ibikorwa byiza byabambitse umwambaro wera buri wese yifuza kwibonamo .

Muri aba bakobwa uko ari icumi hari abavuzwe ku bw’ibyago byabagwiririye, abandi bavugwa ku bw’umugayo n’amafuti bijanditsemo ndetse kuri ubu bakaba bagifite urubwa.

Miss Uwase Vanessa ari mu ba mbere basize umugani kurusha abandi urebye ku buremere by’ibyamuvuzweho n’uburyo byateje impagarara ku mbuga nkoranyambaga ubwo yatandukanaga n’umuhanzi Olivis Mugabo wo muri Active.

Miss Vanessa yasezeye umusore bakundanaga agira ati “Ndacyari muto sinabasha kurera umwana w’abandi kandi ndakuze sinabasha gukomeza gutegereza” , umusore na we ntiyaripfana amusubiza ko ‘ntawita umwana uwo yambariye ukuri’. Ibi byahindutse umugani.

Knowless

Uwavuga gusa ko Knowless yavuzwe cyane mu mwaka wa 2016 ntiyaba asobanuye neza ibyamubayeho. Mu myaka amaze mu itangazamakuru ry’u Rwanda ni inshuro ya kabiri avuzwe bikomeye kurusha ibindi bihe byose mu buzima bwe. Uyu mwaka wibutsa byinshi mu bihe yanyuzemo muri 2011 ubwo yatandukanaga na Safi bakandikwa mu binyamakuru uko umutima uteye.

Muri 2016 nabwo yahogoje abanyamakuru, byatangiye binugwanugwa ko atwite abyamaganira kure ndetse koko ntibyaba impamo nyuma atangira kwibona ku ntonde mpuzamahanga z’abahanzi bahataniye ibihembo bikomeye muri Afurika.

Yaranatunguranye yemerera Clement umusore bari bamaze imyaka itanu bakundana mu ibanga ko bakwerura. Yakoze ubukwe bwavuzweho bidasanzwe, asezeranywa na pasiteri Itorero ritemera nyuma y’iminsi ijana n’irindwi (amezi atatu n’iminsi 15) aribaruka. Akiri mu buryohe bwo kwakira imfura Kaminuza ya ULK imwongerera ipeti nk’umubaruramari wabiminuje. Ibyiza biracyaza.

Gahongayire

Yavuzwe kuva umwaka ugitangira kugeza usojwe, byatangiye ibinyamakuru byandika ko ‘umubano we na Gahima Gabriel wajemo rushorera’ kuko yari atacyambara impeta y’isezerano. Gahongayire yabanje kubitera ishoti [kandi byari byararangiye] abonye ko ari guhisha ibimenyetso bizavunduka nyuma ahitamo kwemera ko urugo rwe rwasenyutse.

Aline Gahongayire yaravuzwe biratinda gusa byarushijeho cyane ubwo yagiye muri Amerika agatangarizayo birambuye ibye n’umugabo batandukanye. Mu binyamakuru inkuru zaracicikanye, abasomyi bakamwuka inabi nyamara we akiregura avuga ko ‘ari umusozi Imana yamuteretseho bityo ko ntacyo yabihinduraho.’

Urugendo yagiriye muri Amerika narwo rwavuzweho byinshi, akigenda bamwe bakekaga ko atazagaruka nyamara yasoje akazi ataha mu Rwanda agarutse yavuze ibyo yanyuzemo muri leta 11 yagezemo abwiriza ubutumwa bwiza abandi bakamwamagana bavuga ko ‘ayobya uburari atari umukozi w’Imana’.

Kuvuga Gahongayire byakajije umurego ubwo yatangazaga ko ‘umugisha we atari urubyaro’. Ni inkuru yaciye igikuba by’umwihariko mu bemera Imana bamusubizaga ko nta mugisha uruta kubona akana.

Miss Mutesi Jolly

Mutesi Jolly yatangiye kuvugwa akiyamamariza kuba Nyampinga w’u Rwanda. Kuvugwa kwe byaturukaga ku masekuru ye yavugaga ahamya ko avuka ibwami. Yivuga ahereye ku gisekuru cya Serwiri akabimanukura akageza kuri Kigeli IV Rwabugiri hanyuma se[wa Jolly] akaba mu buvivure bw’uyu mwami.

Ibi benshi barabyamaganye bakavuga ko abeshya nyamara we akabishimangira. Amaze kwambikwa ikamba rya Miss Rwanda 2015 hari abazanye amafoto ye akiri muri King David Academy bakavuga ko yisize amavuta ahindura uruhu, abandi bakongeraho ko ishinya afite atari karemano. Icyo gihe yasubije abamushidikanyagaho ati “Uwo mubona ni njye nyawe, ntabwo ari photoshop!”

Umwaka ugana ku musozo yahawe amahirwe yo kujya guserukira u Rwanda muri Miss World, ni na we mukobwa wa mbere mu mateka y’igihugu ugiye muri iri rushanwa. Yagiyeyo ariko nta gahenge yabonye, yaherekejwe n’inkuru zavugaga ko ‘yitukuje’ abandi bakamugereranya na Michael Jackson [na we wari waribagishije uruhu].

Kate Bashabe

Kate Bashabe ni rwiyemezamirimo uri gutera imbere byihuse, azwi cyane mu mideli ndetse ni we washinze inzu yitwa ‘Kabash Fashion House’. Ubusanzwe ntiyavugwaga cyane, izina rye ryabaye ikimenyabose cyane ubwo yafunzwe kuwa 4 Nyakanga 2016.

Icyo gihe abakobwa b’inshuti ze bari bamuhururije bamushinja ko yabakubise yarangiza akabata ku wa kajwiga. Polisi yakoze iperereza iza kumurekura nyuma yo kudahamwa n’ibyo yashinjwaga.

Amaze gufungwa bamwe basakaje inkuru zavugaga ko ibyo atunze abikomora ahandi hatari mu mideli nyamara we akavuga ko ‘abikesha gukora cyane no gukunda ibyo akora’.

Umwaka ugana ku musozo yaserukiye u Rwanda mu mideli mu bihembo bya Abryanz Style&Fashion Awards, ntiyatsinze ariko izina rye ryazamutse kurushaho ku rwego mpuzamahanga.

Miss Uwase Vanessa

Uwase Vanessa ni igisonga cya Mbere cya Nyampinga w’u Rwanda 2015. Uyu mwaka yaravuzwe biratinda, byatangiye avugwaho gukundana na Safi Madiba bombi barabyamagana. Nyuma avugwa ko akundana na Olivis wo muri Active abanza kubyanga ariko nyuma aza kubyemera.

Miss Uwase Vanessa yakomeje kuvugwa mu nkuru ziganjemo inziza biturutse ku bikorwa yateguraga afatanyije na Sandra Teta. Igihe cyarageze yanga gukomezanya n’uyu musore amushinja kuba umwana muto. Umusore na we ati “Uwo ukunda nagenda ntukababare kuko aba agiye guha umwanya ugukunda bya nyabyo”.

Olivis yongeyeho ijambo ryabaye agakeregeshwa ubwo yavugaga ati “ntawita umwana uwo yambariye ukuri”. Abasomaga inkuru na bo bati ‘ubwo Nyampinga yarasambanye ahanwe’, Vanessa akiregura avuga ko ‘uwemerewe kumutera ibuye ari umukobwa w’isugi’.

Yakoresheje imvugo itazigabirana ati “Kuri njyewe numva ko umuntu wese byamubaho. Ntabwo ari ukuvuga ngo ni njye mukobwa wenyine mu Rwanda wambariye ukuri umuntu akunda.”

Mukasine Asinah

Muri 2016 Asinah yatangiye yakajije umurego nk’umuhanzi ushaka kuyobora injyana ya Dancehall mu Rwanda. Yaje mu muziki amaze gutandukana na Riderman, inkuru nyinshi yavuzweho zaciye ibintu ni izo yabaga agaruka ku bihe byiza cyangwa ibibi yanyuranyemo n’uyu muperi [utacyifuza na gato kubona inkuru imuhuza n’uyu mukobwa].

Mukasine Asinah[Asinah Erra] yavuzwe mu nkuru zidasanzwe aho yajyaga mu bitaramo akambara bitangaje, gushyira hanze amafoto yambaye ikariso gusa, kwambara ikanzu igaragaza imyanya y’ibanga akajya mu ruhame ntacyo yishisha, imibyinire idasanzwe yamurangaga mu bitaramo no mu mashusho y’indirimbo ze.

Yavugishije abantu bidasanzwe muri Kamena 2016 ubwo yarakaranyije na Riderman nyumakavuga ko uyu muraperi niyongera kumushotora azashyira amabanga yose y’ibihishe hagati yabo.

Ndoli Nickita

Ndoli Nickita umukobwa wakoreshejwe mu mashusho y’indirimbo ‘Agatako’ ya Dj Pius na Chameleone, imwe mu zakunzwe mu Rwanda na Uganda. Amaze kugaragara muri iyi ndirimbo yaratutswe bikomeye ndetse ashinjwa kwiyandarika kwiyandarika ahanini kubera imyambarire ye.

Uyu mukobwa usanzwe ari umunyamideli yavuzwe mu binyamakuru birimo n’ibyo muri Uganda kubera ibitutsi byamuherekezaga aho agiye hose. Yireguraga avuga ko ‘ibyo akora n’uko yambara ari akazi akaba atumva impamvu abantu bamutuka.’

Isimbi Amanda

Mu gitaramo yakoreye muri Serena Hotel i Kigali, Kiss Daniel umuhanzi ukomeye muri Nigeria yakoreye i Kigali muri Gashyantare 2016 yafotowe abyinisha Isimbi Amanda umwe muri Nyampinga b’iyahoze yitwa SFB [ubu ni CBE], yamukorakoraga ku matako no ku bibero.

Mu bakobwa bashamadukiye Kiss Daniel ndetse bakifuza kubyinana na we, harimo Miss Isimbi Amanda wabaye igisonga cya Nyampinga w’Ishuri ry’Imari n’Amabanki (SFB) muri 2013.

Miss Isimbi Amanda kandi yakomeje kuvugwa mu nkuru ziganjemo iz’uko yambara ubusa agashyira amafoto kuri Instagram[ariko we avuga ko ntawe ukwiye kumwinjirira mu buzima]. Kugeza ubu biravugwa ko ari mu rukundo n’umunyamideli wo muri Uganda witwa Kim Swagga.

Miss Isimbi Amanda akoze ibi nyuma y’uko mu mwaka ushize wa 2015 yagarutsweho bikomeye mu itangazamakuru kubera ifoto ye yari yagiye hanze agaragara nk’uwari wambaye ingutiya nta kariso.

Akiwacu Colombe

Muri 2016 Miss Akiwacu Colombe yagiye mu irushanwa ry’ubwiza rya Miss Supranational 2016 na we yemeye kwiyerekana yambaye ‘Bikini’ mu gihe abandi bakobwa bagiye baserukira u Rwanda bajyagayo bakabyangaga.

‘Bikini’ Akiwacu yambaye yateje impagarara bamwe bamushinja guta umuco abandi abakavuga ko bitari bikwiye ko Umunyarwandakazi yambara ikariso gusa akajya mu irushanwa.

Miss Akiwacu yaratutswe abandi bakamushima ko ‘amaze kumenya ibigezweho’. Mu gusubiza abamututse yavuze ko ‘yakoze igikwiye mu gihe gikwiye’.

Mu mwaka wa 2015 nabwo uyu mwari yavuzwe bikomeye mu nkuru zashimangiraga ko ari mu rukundo na Christopher we agahora azamagana avuga ko ‘nta kidasanzwe hagati yabo ahubwo ko amufata nk’inshuti bisanzwe’.

Shadia

Muri Mata 2016 yatandukanye n’umugabo we Producer Meddy Saleh. Shadia [uzwi mu mashusho y’indirimbo Buhoro Buhoro ya King James], asanzwe afite abana babiri yabyaranye na Meddy, ubu bamaze gutandukana.

Nyuma yo gutandukana na Meddy saleh izina rye nibwo ryinjiye cyane mu itangazamakuru, yagiye agaragara kenshi mu matsinda y’abakobwa bazwi cyane mu Rwanda ndetse akavugwa mu nkuru na bo.

Shadia kandi yongeye kugaragara mu mashusho y’indirimbo zirimo ‘Ntawundi’ ya Umutare Gaby. Iyi ndirimbo yakurikiwe n’izindi nkuru zavugaga ko Shadia akundana na Umutare nyuma yo gutandukana n’umugabo.

Shadia yanavuzwe cyane ubwo yagiranaga ubushyamirane na Kate Bashabe ubwo yafungwaga. Uyu mukobwa ari mu bashinjaga Kate Bashabe ko yamukubise akanashaka kumutera icyuma.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza