Abana 6 bazahagararira u Rwanda mu kiganiro mpaka mu Karere k’ibiyaga bigari

Yanditswe na Munyengabe Murungi Sabin
Kuya 17 Werurwe 2015 saa 10:01
Yasuwe :
0 0

Mu irushanwa ritegurwa n’umuryango utegamiye ku Leta, Ejo Youth Echo(EYE), Ndoli Mark na Ntwali Shadia nibo bahigitse bagenzi babo 23 mu biganiro mpaka byahuje abana bo mu bigo byo mu Mujyi wa Kigali.

Ntwali Shadia na mugenzi we Mark biyongeye ku bandi bane batsinze mu zindi Ntara z’u Rwanda. Bose hamwe uko ari batandatu bazahagararira u Rwanda mu biganiro mpaka bizabahuza na bagenzi babo mu Karere k’ibiyaga bigari.

Umwe mu bayobozi ba Ejo Youth Echo, Ndayisaba Betty yatangarije IGIHE ko mu gutegura aya marushanwa bibanze cyane mu mashuri yisumbuye bagatoranya abana b’intyoza kurusha abandi abatsinze bazahagararira u Rwanda bazahuzwa na bagenzi bo mu karere k’ibiyaga bigari.

Intego y’ibi biganiro mpaka ngo ni ukungura urubyiruko ubumenyi no kubatoza kutagira igihunga mu kuvugira mu ruhame.

Yagize ati, “Aya marushanwa agamije kungura urubyiruko ibitekerezo no kwishakamo ibitekerezo, tubaha insanganyamatsiko buri umwe akayisobanura mu buryo bwe”.

Ni ku nshuro ya kabiri aya marushanwa ategurwa, abatsinze ku rwego rw’igihugu bazahuzwa n’abo mu bihugu nka Uganda, Burundi na Repubulika Iharanira Demokarasi ya Congo.

Muri 25 bitabiriye iri rushanwa mu Mujyi wa Kigali bavuye mu bigo bitandukanye muri Kigali, hatsinze Ndoli Mark wa Lycee de Kigali (LDK) na Ntwali Shadia wa EIPR Nyandungu.

Uhereye iburyo(Ndoli, Shadia na mugenzi wabo)

Buri mwana witabiriye irushanwa yahawe certificat, ibikoresho by’ishuri bizajya bibafasha mu myigire ndetse n’inkoranyamagambo bazajya bibafasha mu kwiyungura ubumenyi.

Abari bagize akanama gatanga amanota

Buri gihugu gihagararirwa n’abana 6, biteganyijwe ko Ndoli Mark ,Ntwali Shadia bagenzi babo bazaturuka mu zindi Ntara bazahura n’abandi bazahagararira ibihugu byabo bakabana iminsi igera kuri itatu bihugura, bungurana ibitekerezo muri bo hakazavamo uwa mbere uzafashwa mu mushinga we azaba yatanze.

Ndayisaba Betty yavuze ko intego nyamukuru ya Ejo Youth Echo itegura aya marushanwa ari ugutoza urubyiruko kuba imbuto z’amahoro no kugira ubumenyi mu gukemura amakimbirane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza