Abanyarwenya Nkusi Arthur, Garasiyani na Ben Nganji bagiye guhurira mu gitaramo

Yanditswe na Munyengabe Murungi Sabin
Kuya 28 Ukuboza 2016 saa 12:24
Yasuwe :
0 0

Abanyarwenya batatu bakomeye mu Rwanda, Nkusi Arthur, Niyitegeka Gratien na Ben Nganji bagiye guhurira mu gitaramo cyo gususurutsa abakunzi babo mu gusoza umwaka wa 2016.

Iki gitaramo kizabera kuri Ambassador’s Park i Gikondo mu ijoro ryo ku wa 30 Ukuboza 2016. Kizasusurutswa n’abanyarwenya bakomeye barimo Nkusi Arthur usanzwe ari umunyarwenya ukomeye wanashinze itsinda ahuriyemo n’abandi ryitwa Comedy Knights.

Niyitegeka Gratien umenyerewe muri filime y’uruhererekane yitwa Seburikoko na we azasusurutsa abazitabira iki gitaramo kizaba kinarimo Ben Nganji benshi bamenye mu buhanzi bw’Inkirigito no mu ndirimbo zitandukanye nka ’Mbonye Umusaza’, ’Nsazanye Inzara’, ’Habe n’Akabizu’ z’izindi.

Mu kiganiro na IGIHE, Nzatunga Emmanuel ukuriye itsinda ry’abari gufasha aba banyarwenya mu myiteguro y’iki gitaramo yavuze ko ari igikorwa bahaye umwanya uhagije kugira ngo abazacyitabira bazasoze umwaka bishimye.

Yagize ati "Ni igitaramo tumaze iminsi dutegura, twizeye neza ko aba banyarwenya babifitemo ubuhanga kandi abakunda urwenya n’umuziki bazishima."

Yanavuze ko ku bakunzi b’umuziki hari akandi gashya babateguriye kuko nyuma y’igitaramo cy’aba banyarwenya ku itariki ya 1 Mutarama 2017 na bwo itsinda Impala de Kigali rizaririmbira kuri Ambassador’s Park mu gitaramo cy’ubuntu.

Ati "Ubusanzwe mu bitaramo by’Impala twishyuzaga ariko kuri iyi nshuro twashatse guha abakunzi babo Ubunani kugira ngo babashe gutangira umwaka mushya bishimana n’abaririmbyi n’abacuranzi bakunda."

Nkusi Arthur, Garasiyani na Ben Nganji bagiye guhurira mu gitaramo

Igitaramo kizahuriramo abanyarwenya Nkusi Arthur, Niyitegeka Gratien na Ben Nganji giteganyijwe kuba ku itariki 30 Ukuboza 2016, kizatangira kuva ku isaha ya saa Moya z’umugoroba, kwinjira ni 3000 FRW na 5000 FRW mu myanya y’icyubahiro.

Igitaramo cyizasusurutswa na Impala de Kigali cyo giteganyijwe kuba ku itariki ya 1 Mutarama 2017, kizatangira ku isaha ya saa kumi n’ebyiri z’umugoroba kigeze saa saba mu ijoro.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza