Angel Mutoni, Munyakazi na Eric Soul baserukiye u Rwanda muri Uganda

Yanditswe na Munyengabe Murungi Sabin
Kuya 15 Mata 2017 saa 11:18
Yasuwe :
1 0

Umuhungu wa Kayirebwa, Eric Soul Kirenga, umukirigita nanga Deo Munyakazi n’umuraperi Angel Mutoni batumiwe mu iserukiramuco rikomeye rya Doadoa rizamara iminsi ine ribera muri Uganda.

Ku nshuro ya Gatandatu mu Mujyi wa Kampala hagiye kubera iserukiramuco rikomeye rya ‘Doadoa’ rizahuriza hamwe abahanzi bo muri Afurika bakora umuziki wibanda kuri gakondo.

Kirenga Eric [Eric Soul, uyobora Afrogroov [itsinda rya ba rwiyemezamirimo bo mu karere bibumbiye hamwe mu guteza imbere umuco, imyidagaduro no kuzamura ireme ry’umuziki wa live by’umwihariko mu Rwanda no mu karere], ni we wagize uruhare rukomeye mu gushakira aba bahanzi amahirwe yo kwitabira iri serukiramuco.

Mu bahanzi bazaserukira u Rwanda muri uyu mwaka harimo Munyakazi Deo, Angel Umutoni ndetse na Eric Soul wanagiyeyo mu mwaka ushize ubwo Doadoa yabaye ku nshuro ya gatanu.

Ku rubuga rw’iri serukiramuco hari urutonde rurerure rw’abahanzi bazaryitabira barimo n’abakomoka mu Rwanda. Mu bahanzi bakomeye bategerejwemo harimo Cindy Sanyu wo muri Uganda, Espen Sorensen (Mzungu Kichaa) uyobora inzu itunganya umuziki ya Caravan Records, Nina Ogot wo muri Kenya, Giovanni Kremer Kiyingi uri mu ba mbere bakunzwe mu muziki gakondo wa Uganda, Haka Mukiga wo muri Uganda n’abandi.

Mutoni Angel na Deo Munyakazi na Eric Soul bazaserukira u Rwanda baherutse kwitabira ihuriro rikomeye rigiye guhuza abahanzi bafite umwihariko muri Afurika y’Uburasirazuba, ryabereye ahitwa Sarit Centre Expo Hall mu Mujyi wa Nairobi.

Munyakazi umaze iminsi atumirwa mu bitaramo bikomeye hanze y’u Rwanda avuga ko muri ibi bihugu byose ajyamo ajyana intego iruta izindi yo “kwerekana umwihariko w’umuziki w’u Rwanda, kubacurangira bya Kinyarwanda ku buryo bazabona ko hari byinshi bigaragaza ubukire bw’umuziki wacu.”

Uyu mukirigita nanga yabwiye IGIHE ko yiteze kuzunguka ibintu byinshi muri iri serukiramuco bizazamura iterambere ry’umuziki we.

Yagize ati "Ngiye kwerekana umuco wacu by’umwihariko inanga gakondo nzabataramira na Eric Soul, Angel Mutoni, ni amahirwe akomeye yo guhura n’abandi bahanzi bo muri Afurika y’Uburasirazuba, tukaganira tukunguran ibitekerezo by’uko twazamura umuziki wa Kinyafurika, nzungukiramo byinshi."

Doadoa izamara iminsi itatu ibera mu Mujyi wa Kampala kuri Uganda National Museum kuva ku itariki ya 3-6 Gicurasi 2017.

Abahanzi baserukiye u Rwanda basanzwe bafite ubuhanga mu muziki, muri Mutarama 2016 Eric Soul na Gaël Faye batumiwe mu Mujyi wa Addis-Abeba mu iserukiramuco rikomeye rya ‘Selam Festival Addis’, nyuma yanatumiwe mu rindi ryitwa Doa Doa ryabereye muri Uganda.

Angel Mutoni na we aheruka kwitabira Amani Festival muri RDC yanahataniye igihembo cya Prix Découvertes-RFI 2016. Munyakazi Deo na we ni umwe mu bahanzi bakizamuka bari kugaragaza imbaraga n’umwihariko mu gucuranga inanga.

Munyakazi Deo, umwe mu bahanzi bagaragaza ubuhanga bukomeye mu gucuranga inanga
Angel Mutoni ni we mukobwa mu bakora umuziki mu Rwanda watumiwe muri Doadoa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244