Berita ukunzwe muri Afurika y’Epfo agiye gukorera igitaramo i Kigali

Yanditswe na Dusabimana Aimable
Kuya 24 Gicurasi 2018 saa 11:56
Yasuwe :
0 0

Berita Khumalo umukobwa w’umunyempano ukunzwe muri Afurika y’Epfo yaje i Kigali kuhakorera igitaramo gikomeye kizasusurutsa abakunda injyana ituje y’umwimerere wa kinyafurika.

Uyu muhanzi ategerejwe mu gitaramo cyiswe ‘Live and Unplugged’ kizaba ku wa Gatandatu, tariki 26 Gicurasi 2018 muri Kigali Cultural Village iherereye muri KCEV [ahahoze hitwa Camp Kigali].

Iki gitaramo cyateguwe na Afrogroov yo mu Rwanda ni cyo gisoza urugendo rw’ibyo Berita yari amaze iminsi akora muri Afurika y’Uburasirazuba birimo ibyo yakoreye mu Mujyi wa Kampala ku itariki 9 n’iya 10 Gicurasi 2018.

Berita ubusanzwe witwa Gugugulethu Berita Khumalo aje i Kigali nyuma y’ibindi bitaramo bibiri yakoreye i Nairobi muri Kenya mu mpera z’icyumweru gishize ku wa Gatanu no ku Cyumweru.

Igitaramo cya ‘Live & Unplugged’ yatumiwemo i Kigali gisanzwe gisusurutswa n’abahanzi batandukanye bakomeye muri Afurika. Mu 2015, habaye ikindi nka cyo cy’umuhanzikazi Iyadede ufite inkomoko mu Rwanda ariko uba muri Amerika cyabereye ku Kimihurura mu nyubako za ‘Rubangura Luxury Apartments’.

Mu 2017, igitaramo cya ‘Live and Unplugged’ cyabereye muri Grand Ubumwe Hotel gisusurutswa n’abanya-Nigeria, Kezia Jones na Nneka bafatanyije n’itsinda ry’abanya-Kenya rihuje umugabo n’umugore we bazwi cyane nka Winyo na Nina Ogot.

Igitaramo cya ‘Live & Unplugged’ cyo mu mwaka ushize cyateguwe na Afrogroov cyabereye muri Kigali Marriot Hotel cyaririmbwemo n’Umwongerezakazi Joss Stone na Somi, Umunyarwandakazi ukorera umuziki muri Leta Zunze Ubumwe za Amerika.

Berita ubusanzwe witwa Gugugulethu Berita aje i Kigali nyuma y’ibindi bitaramo bibiri yakoreye i Nairobi

Berita ugiye gutaramira i Kigali mu gitaramo cy’uyu mwaka yatangiriye umuziki mu 2012 avuye muri Nouvelle-Zélande aho ababyeyi be baba. Muri iki gihe ari mu bakomeye mu njyana ya Afrosoul muri Afurika y’Epfo nubwo afite inkomoko muri Zimbabwe.

Uyu mukobwa afite indirimbo zarebwe na benshi nk’iyitwa ’Thandolwethu,’ ’Mwana Wa Mai’ yakoranye na Oliver Mtukudzi na nyakwigendera Hugh Masekela. Yataramiye mu bihugu bitandukanye cyane cyane ibyo muri Afurika y’Amajyepfo.

Berita yamaze kugera mu Rwanda aho agiye gutaramira bwa mbere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza