Charly na Nina bagiye kuzenguruka igihugu mu bukangurambaga bwo kurwanya SIDA n’inda zitateguwe

Yanditswe na Iradukunda Serge
Kuya 7 Kamena 2019 saa 05:53
Yasuwe :
0 0

Itsinda rya Charly na Nina rigiye gutangira ubukangurambaga mu mashuri yisumbuye bwo kurwanya icyorezo cya virusi itera SIDA, inda zitateguwe, imirire mibi ndetse n’ihohoterwa rikorerwa mu ngo.

Kuri uyu wa 7 Kamena 2019 mu kiganiro cyahuje abanyamakuru, iri tsinda ry’aba bahanzi ndetse n’abari kubafasha muri iki gikorwa bagiye gutangira basobanuye birambuye uko gahunda yabyo iteye.

Batangaje gahunda bise #1000girlsiwacu igamije ubukangurambaga ku bana b’abakobwa bari mu mashuri y’isumbuye hifashishijwe amateka y’aba bakobwa bagize iri tsinda.

Iri tsinda rizafatanya muri ubu bukangurambaga na Arthur Nation y’Umunyarwenya Arthur Nkusi, Umuryango w’Ubumwe bw’Ibihugu by’u Burayi(EU), Minisiteri y’Urubyiruko n’Ikigo cy’Igihugu Gishinzwe Uburezi (REB).

Iyi gahunda izahera mu turere umunani mu Ntara zose z’Igihugu.

Muri iki kiganiro Arthur Nation yari ihagarariwe na Gaelle Gisubizo, yatangaje ko ubu bukangurambaga biteze ko hari byinshi buzahindura mu mibereho y’Abanyarwanda muri rusange.

Nina ugize itsinda rya Charly na Nina we yavuze ko bazagira n’umwanya wo kuganiriza aba bana b’abakobwa bakabatera ishyaka.

Ati “Nk’umukobwa muto nkura nanjye nagize abo nareberagaho kandi nzi icyo byamariye mu buzima, gusangiza ubuzima bwanjye ndetse no gutera imbaraga abana b’abakobwa ni ikintu nishimiye gukora.”

Muri iki kiganiro Flora Kayitesi ushinzwe gutanga amakuru muri EU ishami ryo mu Rwanda yatangaje ko impamvu bahisemo gushyigikira iki gikorwa byatewe n’uko kijyanye n’ibyo bateganya.

Ati “Impamvu twahisemo gutera inkunga iki gikorwa ni ukubera ko ibitekerezo bafite bihwanye n’ibikorwa dukunze kwibandaho.”

Ngoga Eugène Fixer uyobora Ishami rishinzwe Ubujyanama no kuyobora abanyeshuri mu myigire mu kigo cy’Igihugu Gishinzwe Uburezi yashimye iki gitekerezo avuga ko kizafasha gahunda y’uburezi anasaba ko abahungu batagomba kwibagirana muri ibi biganiro.

Abana b’abakobwa bazagira umwanya wo kwerekana ibihangano ku nsanganyamatsiko ubukangurambaga buzibandaho n’umwanya w’ibiganiro. Bazahabwa umwanya wo kubaza ibibazo Charly na Nina, nyuma iri tsinda ry’abakobwa ribataramire.

Uko gahunda y’ibiganiro iteye

Ku wa 10 Kamena bazatangirira ku ishuri rya G.S Rukira mu Karere ka Huye, ku wa 12 Kamena bajye ku ishuri rya G.S Kibangu mu Karere ka Muhanga, ku wa 15 Kamena bazaba bari ku ishuRi Marie Reine mu Karere ka Rwamagana.

Ku wa 17 Kamena bazajya ku ishuri rya G.S Nkanga mu Karere ka Bugesera, ku wa 21 Kamena ku ishuri rya G.S Rutunga mu Karere ka Gasabo, ku wa 5 Nyakanga bazakomereza ku ishuri ryitiriwe Mutagatifu Vincent (Saint Vincent) mu Karere ka Musanze, iyi gahunda izasozwa ku wa 8 Nyakanga ku ishuri rya Lycee de Nyundo mu Karere ka Rubavu.

Gaella Gisubizo wari uhagarariye Arthir Nation yatangaje ko ubu bukangurambaga biteze ko hari byinshi buzahindura mu mibereho y’Abanyarwanda muri rusange
Ushinzwe gutanga amakuru muri EU ishami ry'u Rwanda, Flora Kayitesi, yatangaje impamvu bahisemo gushyigikira iki gikorwa ari ukubera ko kijyanye n’ibyo bateganya
Nina ugize itsinda rya Charly na Nina we yatangaje ko bazagira n’umwanya wo kuganiriza abana b’abakobwa
Uyobora Ishami rishinzwe ubujyanama no kuyobora abanyeshuri mu myigire mu Kigo cy’Igihugu Gishinzwe Uburezi, Ngoga Eugène Fixer, yashimye iki gitekerezo avuga ko kizafasha gahunda y’uburezi
Nyuma yo kuganiriza urubyiruko itsinda rya Charly na Nina rizajya ritaramira abanyeshuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza