Charly & Nina bahishuye uko batangiye umuziki bakorera ibihumbi icumi (Amafoto)

Yanditswe na Uwiduhaye Theos
Kuya 12 Kamena 2019 saa 07:49
Yasuwe :
0 0

Itsinda rya Charly na Nina ryatangiriye ubukangurambaga bwo kurwanya icyorezo cya virusi itera SIDA, inda zitateguwe, imirire mibi ndetse n’ihohoterwa rikorerwa mu ngo mu Rwunge rw’Amashuri rwa Rukira mu Karere ka Huye.

Iki gikorwa cyabaye kuri uyu wa Mbere tariki 10 Kamena 2019, aho aba bakobwa batangiye igikorwa cyabo kijyanye na gahunda ya #1000girlsiwacu mu bukangurambaga ku bana b’abakobwa bari mu mashuri yisumbuye.

Cyatangiriye mu Rwunge rw’Amashuri rwa Rukira mu Karere ka Huye, aho iri tsinda ryasangije abana b’abakobwa inzira ryanyuzemo iruhanyije mu rugendo rw’ubuzima ariko bakagenda bashikama.

Uru rwunge rwigamo abanyeshuri 988 biga mu mashuri abanza, 822 biga mu yisumbuye na 126 biga mu y’incuke.

Charly yasangije urugendo rwe rw’ubuzima abana b’abakobwa bari bitabiriye iki gikorwa avuga ko kuva akiri muto yarotaga kuzaba umuhanzi ukomeye ariko yatangira uru rugendo akaza guhura n’ibirushya byinshi.

Ati “Kuva mu buto bwanjye nakundaga kuririmba, nari nziko aricyo kintu nshaka gukora. Ubwo nakuraga nkatangira kuririmba, nahuye n’ibirushya byinshi ndetse kenshi nagiye ncika intege; ariko kuva ku izima ntabwo cyari cyo gisubizo, ndetse nicyo cyanateye imbaraga zo gukomeza urugendo.”

Yavuze ko we na Nina kuririmba byabagejeje ku rwego nabo batatekerezaga. Atanga urugero rw’uko bazengurutse mu Rwanda hose baririmba bakagera muri Uganda, Kenya, Tanzania, Repubulika Iharanira Demokarasi ya Congo (RDC), Ghana, u Burayi hafi mu bihugu bigera 12.

Ubu bitegura kujya muri Leta Zunze Ubumwe za Amerika, u Bwongereza ndetse na Canada.

Avuga ko ikintu umukobwa wese yiyemeje adakwiriye gucibwa intege n’ibyo ahura nabyo mu buzima.

Nina we yavuze ukuntu batangira umuziki bakorera amafaranga y’intica ntikize kugeza aho yigeze gukorera ibihumbi icumi.

Yakomeje avuga ko mu buzima nta kintu gipfa kuza gutyo gusa ndetse ko umuntu atabura ibimwitambika, ahubwo igifite akamaro ari uko umuntu yitwara mu bibazo ahura nabyo.

Ati “Buri munsi mu buzima duhura n’imbogamizi ariko nta kintu mu buzima kiza gutyo gusa; icy’ingenzi ni uko witwara muri izo mbogamizi. Kuva ku izima nta na rimwe bizigera biba amahitamo.”

Nyuma y’iki kiganiro aba bakobwa bashimishije abanyeshuri bo muri iki kigo binyuze mu ndirimbo zabo zitandukanye, bishimirwa by’ikirenga.

Iri tsinda riri gufatanya muri ubu bukangurambaga na Arthur Nation y’Umunyarwenya Arthur Nkusi, Kasha icuruza ibikoresha by’isuku by’abagore, Umuryango w’Ubumwe bw’Ibihugu by’u Burayi(EU), Minisiteri y’Urubyiruko n’Ikigo cy’Igihugu Gishinzwe Uburezi (REB).

Iyi gahunda izazenguruka mu turere umunani mu Ntara zose z’Igihugu.

Charly na Nina bambariye guhanura abana b'abakobwa mu mashuri yisumbuye
Charly & Nina batangiriye gahunda yabo muri G.S Rukira mu Karere ka Huye
Aba bakobwa baririmbiye abanyeshuri baranyurwa
Charly na Nina babyiniwe n'itorero ribyina bya Kinyarwanda muri iki kigo
Nina avuga ko ku Isi nta kintu umuntu yabona atavunitse kandi ko gucika intege bidakwiriye kuba amahitamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza