Charly&Nina na Makanyaga bategerejwe i Genève mu Busuwisi

Yanditswe na Munyengabe Murungi Sabin
Kuya 24 Gicurasi 2018 saa 09:36
Yasuwe :
0 0

Charly na Nina bagiye gukorera ikindi gitaramo mu Busuwisi, baherukagayo muri Werurwe 2017, kuri iyi nshuro bazafatanya na Makanyaga umaze igihe kinini mu muziki.

Makanyaga Abdul na Charlotte Rulinda[Charly] na Fatuma Muhoza[Nina] bazagera i Genève ku gicamunsi cyo ku wa Gatanu tariki ya 25 Gicurasi 2018; bazaherekezwa n’itsinda ry’abacuranzi ryabafashishe mu gitaramo bakoreye mu Bubiligi mu mpera za Mata 2018.

Igitaramo aba bahanzi bazakorera mu Mujyi wa Genève, cyateguwe na Umutesi Parfine abicishije mu ikompanyi nshya y’ubucuruzi yafunguye ya Golden Queen ku bufatanye na Umugabekazi Sonia basanzwe bakorana.

Mu kiganiro na IGIHE, Umutesi Parfine yavuze ko yateguye iki gitaramo mu rwego rwo gutangira urugendo rushya rwo kumenyekanisha muzika nyarwanda mu bihugu by’amahanga biciye mu kigo yashinze cya Golden Queen cyunganira ibikorwa by’imyidagaduro yari asanzwe akorera mu Burayi.

Umutesi ati “Impamvu ikomeye nateguye iki gitaramo ni ukumenyekanisha umuziki nyarwanda mu bihugu bya kure, ni ukugira ngo n’abanyamahanga bamenye ko mu Rwanda dufite umuziki mwiza.”

Yavuze ko yatumiye Charly&Nina ndetse na Makanyaga abifashijwemo n’Umuyobozi wa Team Production, Justin Karekezi ari na we wateguye urugendo rw’ibitaramo aba bahanzi bagiyemo mu Burayi.

Yagize ati “Ubushize aba bakobwa baje bonyine abantu barabishimira cyane, ubu bagarukanye na Makanyaga na we wishimiwe cyane, ibi bizatuma hazamo abantu b’ingeri zose. Abakiri bato bakunda ba Charly na Nina bazakizamo, abakuze bakunda Makanyaga na bo bazaza, abanyamahanga bakunda u Rwanda na bo bazaza.”

Umutesi Parfine uyobora Golden Queen, yavuze ko muri iki gitaramo RwandAir yashyizeho uburyo bwongera ibyishimo mu bazacyitabira aho abanyamahirwe bazatombora amatike y’indege ababashisha kujya muri kimwe mu byerekezo 26 iyi kompanyi yafunguye hirya no hino ku Isi.

Ati “Ikindi cyihariye muri iki gitaramo ni uko hazaberamo tombora, RwandAir yaradufashije, yatwemereye amatike. Abafana bazaza muri iki gitaramo, bazagira amahirwe yo gutombora itike y’indege ukaba wajya muri kimwe mu byerekezo bya RwandAir.”

Nina, Umutesi Parfine, Charly ndetse na Dj Princess Flor ubwo baheruka guhurira mu Bubiligi

Iki gitaramo kizabera i Genève kizayoborwa na Dady de Maximo Mwicira-Mitali wabaye umunyamakuru mu Rwanda akaba n’umuhanga mu byerekeye imideli; hazaba hari n’ubuyobozi bwa Diaspora nyarwanda mu Busuwisi buyobowe na Cyaka Yves. Dj Princess Flor na Dj Ti usanzwe aba mu Busuwisi ni bo bazavanga imiziki.

Nina na Umutesi Parfine wateguye igitaramo cyabo i Genève
RwandAir niyo muterankunga mukuru w'iki gitaramo

I Do, indirimbo nshya ya Charly&Nina na Bebe Cool


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza