Choeur International yanyuze abitabiriye igitaramo cyayo mu ndirimbo za Noheli (Amafoto)

Yanditswe na Munyengabe Murungi Sabin
Kuya 8 Mutarama 2018 saa 09:48
Yasuwe :
0 0

Abaririmbyi babigize umwuga bahuriye muri Choeur International bakoze igitaramo cy’indirimbo zihariye mu gufasha abakunda umuziki wabo kwinjira mu mwaka wa 2018 bizihiwe n’ivuka rya Yezu.

Ni igitaramo cyiswe ‘Christmas Carols in a Live Concert’, cyabereye muri Serena Hotel ku mugoroba wo kuri iki Cyumweru tariki ya 7 Mutarama 2018, cyari uruvangitirane rw’indirimbo zifasha Abanyarwanda gukomeza kuryoherwa na Noheli.

Bimaze kumenyerwa ko mu ntangiriro za buri mwaka, abaririmbyi babigize umwuga bahuriye muri Choeur International batarama gihanzi mu kurushaho gufasha abakunda umuziki wabo kuryoherwa n’ibihe bya Noheli no kwinjira mu mwaka mushya bafite imitima isukuye.

Mu gitaramo bakoze mu ijoro ryacyeye bakoze ku mbamutima z’abakunzi ba muzika bari bateraniye muri Serena Hotel, baririmbye indirimbo za Noheli zo mu bihe bitandukanye banasubiramo izigezweho z’urukundo zikunzwe cyane mu bice bitandukanye by’Isi.

Mu ndirimbo basubiyemo harimo iyitwa ‘The Power of Love’ yaririmbwe na Aline wo muri Choeur, All of Me ya John Legend bayiririmbye bafatanyirije hamwe, Nerea ya Sauti Sol yaririmbwe n’itsinda ry’abasore rya The Bright Five Singers n’izindi.

Choeur International yagaragaje umwihariko muri iki gitaramo cyabereye mu cyumba cya Serena Hotel, cyitabiriwe n’abafana mu ngeri zinyuranye kuva ku bana bari mu kigero cy’imyaka itanu kugeza ku basaza n’abakecuru basheshe akanguhe gusa ubwitabire bwari hasi ugereranyije n’ibindi bitaramo byabaye mu myaka yashize.

Choeur International, itsinda rihuriwemo n’abahanzi b’intyoza mu muziki, baririmbye bagaragaza ubuhanga, bakoze igitaramo cy’indirimbo za Noheli ‘Chrismas Carol’ abacyitabiriye ibyishimo birabasaba ndetse bagaragaza ko banyuzwe n’umuziki.

Byabaga akarusho ndetse bikanyura amatwi by’indengakamere ubwo abagize Choeur International bacurangaga umuziki ukundwa na benshi mu bakuze wa ‘Musique Classique’ bifashishije piano gusa.

Mu gitaramo hagati, Umuyobizi wa Choeur International Mushinzimana Benjamin yafashe umwanya muto avuga ibigwi by’aba baririmbyi mu myaka icumi ishize ndetse asaba ko “bakomeza gushyigikirwa bakarushaho kugira imbaraga”.

Igitaramo cya Chrismas Carols cyaryoheye abacyitabiriye

Iki ni kimwe mu bitaramo bifite umwihariko, kuva gitangiye kugeza kirangiye aba bahanzi baririmbye bakoresheje amajwi yabo bwite, nta mashyi, ingoma cyangwa ibindi bicurangisho bikomeye ahubwo bunganirwaga n’inanga yacurangwa hagendewe ku manota y’indirimbo.

Igitaramo cyasojwe mu masaha asatira saa yine z’ijoro.

Umuyobozi wa Choeur International
Umuyobozi wa Komisiyo y'Igihugu y'Ubumwe n'Ubwiyunge, Fidèle Ndayisaba yitabiriye iki gitaramo ashima ubuhanga bw'abagize Choeur International
Iki gitaramo ntabwo cyitabiriwe nk'uko ibindi byagenze mu myaka yashize
Aba baririmbyi bakoze igitaramo cyuje ubuhanga
Umuziki wa Choeur International wizihiye benshi
Cyriaque umwe mu bagize Choeur wari uyoboye iki gitaramo

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza