Choeur International yateguye igitaramo cyihariye cyo kwizihiza imyaka icumi imaze

Yanditswe na Munyengabe Murungi Sabin
Kuya 27 Ukuboza 2016 saa 12:03
Yasuwe :
0 0

Abaririmbyi babigize umwuga bahuriye muri Choeur International bateguye gitaramo cy’imbonekarimwe cyo kwizihiza imyaka icumi ishize bibumbiye hamwe, kizaba ari uruvangitirane rw’indirimbo zizafasha Abanyarwanda gukomeza kuryoherwa na Noheli.

Iki gitaramo cyiswe ‘Christmas Carols Concert’ kizahurirana n’ibirori byo kwizihiza imyaka icumi ishize Choeur International et Ensemble Instrumental de Kigali (CIEIK) ibayeho. Igitaramo kizaba kuwa 7 Mutarama 2017 kuri Serena Hotel guhera saa kumi n’ebyiri z’umugoroba.

Kwinjira muri ‘Christmas Carols Concert’ ni amafaranga y’u Rwanda ibihumbi icumi [10,000 frw] mu myanya y’imbere n’ibihumbi bitanu [5000 frw] mu byicaro bisanzwe.

Kikazaba ari igitaramo cy’umwihariko kizitabirwa n’abaririmbyi bafite ubuhanga bwihariye batoranyijwe mu makorali akomeye mu Rwanda hose, hari abaririmba ku giti cyabo (solistes) ndetse n’abaririmbira hamwe (Choir).

Umuyobozi wa Choeur International, Mushinzimana Benjamin yavuze ko abaririmbyi n’abacuranzi b’iyi korali biteguye gukora igitaramo gifite umwihariko kurusha ibindi byose byakozwe kuva yashingwa.

Yavuze ko “kwizihiza iyi sabukuru bigamije gutaramira Abanyarwanda ko abaririmbyi ba Choeur International bageze ku rwego mpuzamahanga mu kuririmba.”

Yongeyeho ati “Ni no kugeza ku Banyarwanda bose ibitaramo byo kwizihiza iyi sabukuru y’imyaka icumi, twatangiriye i Rwamagana ku itariki ya 18 Ukuboza 2016 tukazakomereza no mu zindi ntara nyuma y’igitaramo tuzakora muri Serena kuwa 7 Mutarama 2017.”

Iki gitaramo giteguwe nyuma y’uko mu mwaka wa 2015, mu bihe bya Noheli n’Ubunani Choeur International yakoze igitaramo cy’umusogongero w’indirimbo zo kwizihiza ivuka ry’akana Yezu, cyabereye muri Serena Hotel cyitabirwa n’umubare munini w’abakunda umuziki w’umwimerere by’umwihariko abizihiza Noheli.

Amavu n’amavuko ya Choeur International de Kigali

Choeur International et Ensemble Instrumental de Kigali (CIEIK) ni umuryango w’abaririmbyi washinzwe ku itarikii ya 21 Mata 2006, ubona ubuzima gatozi mu mwaka wa 2008 bugengwa n’itegeko no26/11 ryo kuwa 11 Gashyantare 2008 riyemerera gukorera aho ariho hose mu Rwanda.

CIEIK ikaba ari umuryango udaharanira inyungu wemewe n’itegeko no 4/2012 rigena imikorere y’imiryango idaharanira inyungu. Ifite icyicaro muri St. Paul i Kigali muri Nyarugenge.

Chœur International et Ensemble Instrumental de Kigali (CIEIK) igizwe n’abaririmbyi baturuka mu makorari anyuranye mu gihugu ndetse n’abanyamahanga bemerewe kuyiririmbamo mu gihe bagaragaza ubuhanga mu kuririmba. Ibarizwamo abaririmbyi bo mu madini n’amatorero atandukanye kuko ari umuryango w’abaririmbyi hadashingiwe ku idini cyangwa ku bitekerezo bya Politiki ku buryo indirimbo iririmba buri wese aziyumvamo bitewe n’imyemerere ye.

Chœur International yakoze ibintu byinshi muri iyi myaka 10 imaze ishinzwe. Yahinduye mu buryo bugaragarira imiririmbire y’amakorali mu Rwanda, cyane cyane amakorali aririmba muzika yanditse ku manota.

Ifatanyije na Minisiteri y’Umuco na Siporo yateguye kandi ikora ibitaramo bitandukanye byo kwibuka abahanzi ba mbere banditse kandi bahimba indirimbo zanditse ku manota bazize Jenocide yakorewe Abatutsi barimo Rugamba Cyprien, Padiri Alfred Sebakiga, Padiri Musoni, Padiri Byusa, Saulve Iyamuremye n’abandi.

CIEIK yagize uruhare mu gutegura indirimbo yubahiriza umuryango wa Afurika y’Iburasirazuba EAC izwi nka “Jumuiya Yetu.”

Mu mwaka ushize wa 2013 CIEIK ni bo baririmbye iyi ndirimbo yubahiriza EAC ubwo hatangizwaga iserukiramuco ry’ibihugu bigize EAC ryari ryiswe JamaFest ryabereye i Kigali.

Choeur International igizwe n'abaririmbyi b'abahanga gusa

Mu bindi bikorwa Choeur international et Groupe instrumental de Kigali yateguye harimo ihuriro ry’amakorari rya 6 ryakoranyije amakorari yakoze igitaramo cyo kwibuka abaririmbyi bo mu bihugu duturanye Kenya, Uganda, RDC hamwe na Korari zo hirya no hino mu gihugu.

Choeur International yitabiriye ibitaramo mpuzamahanga byabereye mu bihugu bitandukanye birimo Burundi, Uganda, Tanzaniya, Kenya na Ghana aho yahagarariye u Rwanda kandi ikitwara neza muri byo.

Igitaramo iyi korali yakoze mu mpera za 2015 cyizihiye benshi

Incamake ya Christmas Carols Concert 2015


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza