Chuck Berry wafatwaga nk’umwami w’injyana ya Rock and Roll yitabye Imana

Yanditswe na IGIHE
Kuya 19 Werurwe 2017 saa 08:18
Yasuwe :
0 0

Igihangange mu njyana na Rock and Roll, Chuck Berry, yitabye Imana ku myaka 90 azize urupfu rutunguranye nk’uko ubutumwa bwatambukijwe ku rukuta rwe rwa Facebook bubigaragaza.

Uyu mugabo yitabye Imana kuwa Gatandatu aguye hanze y’urugo rwe i St. Louis. Abapolisi bo mu gace ka St. Charles bavuze ko basanze uyu mugabo asa n’uwataye ubwenge hanze y’urugo niko guhita bitabaza abashinzwe ubutabazi nyuma biza gutangazwa ko yagize ikibazo cy’ubuhumekero.

Berry yanditse indirimbo nka "Johnny B. Goode" na "Sweet Little Sixteen" zigaragaza ubuhanga bwe mu gucuranga gitari.Ni umwe mu bafatwa nk’umwami w’injyana ya Rock and Roll bitewe n’ubuhanga yagaragaje kuva mu myaka ya 1970 na mbere yaho.

Itsinda ryo mu njyana na ‘The Rolling Stones’ ni bamwe mu bazwi batangaje ko bababajwe n’urupfu rwa Chuck Berry. Mu butumwa bashyize ku rubuga rwabo rwa Internet bavuze ko yari umugabo w’umuhanga mu gucuranga gitari no kwandika indirimbo, bityo ko zizahora zibukwa.

Chuck Berry yitabye Imana afite imyaka 90

Charles Edward Anderson "Chuck" Berry yavutse kuwa 18 Ukwakira 1926. Yakoze indirimbo zamenyekanye mu myaka yo hambere nka "Maybellene" (1955), "Roll Over Beethoven" (1956), "Rock and Roll Music" (1957) na "Johnny B. Goode" (1958).

Yahawe ibihembo bitandukanye birimo Grammy Lifetime Achievement Award mu 1984. Mu 2009 yashyizwe ku mwanya wa karindwi ku rutonde rw’abantu 10 b’ibihe byose bafite ubuhanga mu gucuranga gitari. Ni urutonde rwakozwe na Time Magazine.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza