Corneille utaherukaga kuvugwa, akanyamuneza ni kose kubera amashusho y’indirimbo ye nshya

Yanditswe na Uwiduhaye Theos
Kuya 10 Ukwakira 2019 saa 05:32
Yasuwe :
0 0

Corneille Nyungura umaze kubaka izina mu buryo bukomeye mu muziki ku Isi yose, akaba n’umwe mu bahanzi bakomoka mu Rwanda bakunzwe mu bihugu by’abavuga Igifaransa, yashyize hanze indirimbo ‘Le Bonheur’ iri kuri album ye nshya.

Corneille, umuhanzi w’ikirangirire wazamuye ibendera ry’u Rwanda ku rwego mpuzamahanga agakundwa byimazeyo n’abihebeye ururimi rw’Igifaransa, yongeye gukora mu nganzo!

Yari amaze iminsi atavugwa, yashyize hanze indirimbo nshya yise ‘Le Bonheur’ iri kuri album ye nshya yise ‘Parce qu’on aime’. ‘Le Bonheur’ cyangwa ‘Umunezero’ mu Kinyarwanda, yiganjemo ubutumwa bwo kwerekana ko ibyishimo ari ngombwa mu buzima.

Ikijya hanze mu minsi mike ishize yasamiwe hejuru n’abantu batandukanye basanzwe bakunda uyu muhanzi, mu bitekerezo batanze ku rubuga rwa Youtube benshi bavuga ko agarukanye imbaraga nyuma y’igihe kinini adakora indirimbo ngo zikundwe cyane.

Bitewe n’uko iyi ndirimbo "Bonheur" yakiriwe, bigaragara ko ishobora guha akuka gashya uyu muhanzi usa n’umaze igihe kitari gito ashakisha inganzo yabasha kongera kumwegereza abafana be bo hambere.

Nyungura mu 2002 yasohoye album ye ya mbere ‘Parce qu’on vient de loin’ yakunzwe mu buryo bukomeye, izindi zakukirikiyeho zirimo iyagiye hanze mu 2005 yise ‘Les marchands de rêves’, iya 2007 yise ‘The Birth of Corneillius’, ‘Sans titre’ yagiye hanze mu 2009, ‘Les inséparables’ na Entre nord et sud zagiye hanze mu 2011 na 2013.

Uretse iyi album ya mbere izindi zose ntabwo zabashije gukundwa no kugurishwa cyane, ‘Les inséparables’ yagiye hanze mu 2011 yafashe umwanzuro wo kongera kuyisubiramo mu 2012, ndetse iyi nshya yakoze iherekezwa n’izindi ndirimbo yahaye abakunzi be nk’impano zirimo ‘Le jour après la fin du monde’, ‘Des pères, des hommes et des frères’ yakoranye na La Fouine n’iyo yise ‘Le Meilleur du monde’.

Kuri iyi album hagurishijwe ibihumbi 70 byayo, icyo gihe haketswe ko byaba byatewe n’ubukene abantu bari bafite ndetse no kuba abantu barazikuraga kuri internet mu buryo butemewe.

Nyungura yavukiye i Freiburg mu Budage tariki 24 Werurwe 1977, abyarwa na Emile Nyungura na nyina w’Umunyarwandakazi. Aba bombi bari baragiye kuba muri icyo gihugu kubera amasomo, hanyuma bagaruka gutura mu Rwanda.

Uyu muhanzi mu 1994 yerekeje mu Bufaransa ahunze Jenoside yakorewe Abatutsi, nyuma y’igihe atuye mu Bufaransa yaje kwimukira muri Canada aho atuye kugeza ubu.

Uyu mugabo w’imyaka 43 yatangiye umuziki mu 1993 kugeza nubu akaba akiwukora, mu mwaka wa 2006 yashakanye n’umunyamideri wo muri Canada Sofia de Medeiros kugeza ubu bafitanye abana babiri.

Corneille yashyize hanze indirimbo nshya yakiranywe urugwiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza