Diamond yavuze icyatumye aha Wema Sepetu akazi kuri Televiziyo ye

Yanditswe na Dusabimana Aimable
Kuya 19 Werurwe 2018 saa 02:15
Yasuwe :
0 0

Diamond Platnumz ufite umushinga mushya wo gutangiza radiyo na televiziyo bye bwite muri Tanzania, yasobanuye impamvu yatumye aha Wema Sepetu akazi ko kujya akora ikiganiro yemeza ko nta mubano udasanzwe muri iki gihe uri hagati yabo.

Uyu muhanzi ugezweho muri Afurika yavuze ko yishimira kuba nta nzigo iri hagati ye na Wema Sepetu kuko akenshi ngo bidahira abakundanye gukomeza kubana neza mu gihe babihagaritse.

Ibi yabitangarije mu kiganiro yagiranye na Citizen Radio muri Kenya mu mpera z’icyumweru. Diamond yavuze ko nta mubano udasanzwe uri hagati ye na Wema Sepetu ahubwo yamuhaye akazi nk’uburyo bwo kumufasha nk’umuntu bahurira muri byinshi bakeneranamo mu myuga bakora.

Yagize ati "Nta byiyumviro by’urukundo mfitiye Wema muri iki gihe. Ni urugendo rwantwaye imyaka ine. Ndamwubaha, aranyubaha, nshimira Imana ko yatumye ibyo bishoboka hagati ya twembi kuko ntabwo ariko bishobokera ababyifuza bose gukomeza umubano nyuma yo guhagarika gukundana. Ni iyo mpamvu azagira ikiganiro cye kuri Wasafi TV twitegura gutangiriza imikorere."

Yakomeje agira ati "Wema nanjye turi mu ruganda rw’iby’imyidagaduro niyo mpamvu bigoye ko twashyira intera hagati y’ubuzima bwa twembi. Ni umukinnyi wa filime nkaba umunyamuziki. Abo bombi rero kenshi barakenerana kugira ngo babeho."

Urukundo rwa Diamond Platnumz na Miss Wema Sepetu rwanditse amateka muri Tanzania, bombi bavuzwe mu buryo bukomeye bagikundana ndetse no gutandukana kwabo byateje impaka. Umukobwa yasigaye avuga ko ‘Diamond atabasha gutera inda’ undi na we agashinja Sepetu ko ari ingumba’.

Mu mpera za 2014 Diamond Platnumz yahise yishumbusha Zari ukomoka muri Uganda, bakundanye mu gihe kigera ku myaka itatu. Urukundo rwabo rwashyizweho akadomo ku wa 14 Gashyantare 2018 ku munsi wahariwe abakundana [Saint Valentin]. Zari yavuze ko yasize Diamond ku bwo kunanirwa kwihanganira ibibazo no gucibwa inyuma.

Diamond na Wema Sepetu bazwi mu rukundo rw'igihe kirekire mbere y'uko uyu muhanzi amenyana na Zari

Mu byateye Zari Hassan kumuzinukwa harimo abagore bari bamaze iminsi bakururana na Diamond muri bo Wema Sepetu na we ashyirwa mu majwi ndetse yari aherutse kugaragara asomana n’uyu muhanzi.

Wema Sepetu agiye kujya akora ikiganiro kuri Wasafi TV ya Diamond
Zari yemeje indunduro y'urukundo rwe na Diamond ku munsi w'abakundanye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza