EAGT: Itorero Intayoberana ryaje ku mwanya wa kabiri, igikombe gitaha muri Uganda

Yanditswe na Nsengiyumva Emmy
Kuya 6 Ukwakira 2019 saa 08:29
Yasuwe :
0 0

Esther na Ezekiel bakomoka muri Uganda nibo begukanye igihembo cya $50 000, mu irushanwa East Africa’s Got Talent ryari rimaze igihe rihuje abanyempano bo mu karere ka Afurika y’Iburasirazuba.

Mu cyiciro cya nyuma cy’iri rushanwa, Itorero Intayoberana niryo gusa ryari rihagarariye u Rwanda muri batandatu bahataniraga igikombe.

Iri torero ni naryo ryabanje ku rubyiniro ku munsi wa nyuma w’irushanwa, mu birori bikomeye byabereye i Nairobi muri Kenya. Mu minota ibiri bari bafite babyinnye Kinyarwanda indirimbo indirimbo zinyuranye.

Abana icumi bagize itorero Intayoberana baba babyina ari nako baririmbirwa n’abatoza babo banabavugiriza ingoma.

Abagize akanama nkemurampaka bongeye kugaragariza aba bana urukundo babashimira uko bateza imbere umuco wabo, babinyujije mu mbyino gakondo.

Nyuma y’itorero Intayoberana hakurikiyeho umwana ukiri muto witwa Jannell Tamara wo muri Uganda ufite impano yo kuririmba.

Ku mwanya wa gatatu higaragaje itsinda rya Spell Cast rituruka muri Kenya, korali yagaragaje ubuhanga mu miririmbire. Hakurikiyeho itsinda ry’ababyinnyi bo muri Uganda ryitwa DNA ryashimishije abari mu cyumba cyabereyemo iri rushanwa.

Ku mwanya wa gatanu hakurikiyeho itsinda rya Esther na Ezekiel bo muri Uganda baririmba mu buryo bwa Live.

Igikorwa cyo kugaragaza impano cyasojwe n’itsinda rya Jehovah Shalom Acapella rigizwe n’abaririmbyi baturuka mu gihugu cya Uganda.

Saa 19h30 amatora yari amaze gusozwa.

Umuhanzi wo muri Tanzania Omy Dimpoz niwe wari watumiwe, uyu yasusurukije abari bakurikiranye iki gikorwa mu gihe amanota yari akomeje kubarwa.

Habanje gutoranywa batatu ba mbere, Intayoberana zabonye itike yo kwinjiramo. Bari bahatanye na Jannell, kimwe na Esther na Ezekiel.

Intayoberana zasigaranye na Esther na Ezekiel abavandimwe bo muri Uganda baririmba.

Nyuma yo kubarura amajwi, Anne Kansime wari uyoboye ibirori yahamagaye Esther na Ezekiel bo muri Uganda nk’abegukanye irushanwa, bashyikirizwa sheko y’ibihumbi 50 by’amadorari ya Amerika, mu gihe Intayoberana zaje ku mwanya wa kabiri.

Vanessa Mdee wa kabiri uturutse i Bumoso yari mu bagize akanama nkemurampaka
Itorero Intayoberana ryaje ku mwanya wa kabiri muri iri rushanwa
Byari ibyishimo ku bavandimwe Esther na Ezekiel begukanye iri rushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza