Eddy Kenzo yaje i Kigali gufata amashusho y’indirimbo yakoranye na Mani Martin

Yanditswe na Dusabimana Aimable
Kuya 17 Nzeri 2017 saa 08:47
Yasuwe :
0 0

Umuhanzi Eddy Kenzo wo muri Uganda ari mu Rwanda mu rugendo rw’iminsi itatu aho yaje mu bikorwa byo gufata amashusho y’indirimbo yakoranye na Mani Martin witegura kumurika album iriho indirimbo z’umudiho wa Kinyafurika.

Umuririmbyi w’umunyempano Mani Martin amaze iminsi ashyize imbaraga n’umutima ku bikorwa byo kumenyekanisha no kunoza umushinga wa album ye nshya yise ’Afro’ nyuma y’izindi enye ziriho indirimbo ziganjemo izakunzwe, Isaha ya 9 yasohotse mu 2007, Intero y’amahoro (2011) n’iyitwa My Destiny yaherukaga gusohora mu 2012.

Ni muri urwo rwego uyu muhanzi yisunze Eddy Kenzo uri mu bamaze igihe bakunzwe muri Uganda ndetse akaba yaragiye akora n’indirimbo zitandukanye zagize amashusho yatumye amenyekana ku rwego mpuzamahanga kugeza ubwo yabimburiye abandi bahanzi bo muri Afurika kwegukana igihembo cya ‘Viewer’s Choice Best New International Artist’ mu bitangwa na BET Awards.

Eddy Kenzo yageze i Kigali ku wa Gatandatu, tariki 16 Nzeri 2017. Akigera ku kibuga cy’indege yakiriwe n’abantu batandukanye barimo itangazamakuru na Mani Martin wamutumiye mu Rwanda mu bikorwa byo gufata amashusho y’indirimbo basubiranyemo.

Mani Martin yabwiye IGIHE ati “Eddy Kenzo yaje mu Rwanda mu bikorwa byo gukora amashusho ya ’Afro Remix’ twakoranye. Azasubira iwabo ku wa Mbere.”

Yongeyeho ati “Gufata amashusho birakorwa kuri iki Cyumweru nijoro, kuri Kwetu Film Institute hanyuma tuzakurikizeho ibikorwa byo kumenyekanisha indirimbo yacu hirya no hino ku Isi.”

Mani Martin yavuze ko ubufatanye bwe na Eddy Kenzo abwitezeho kurushaho kuzamura urwego rwabo bombi, ati “Ubufatanye ni bwiza iteka kuko butuma buri muhanzi arushaho kumenyekana bityo umuziki n’ubutumwa bikagera henshi kurushaho.”

Mani Martin amaze iminsi akubutse muri Kenya, aho yakoreye umushinga w’indirimbo n’itsinda rya “Sauti Sol”, gusa iyi izasohoka nyuma ya Afro Remix yakoranye na Eddy Kenzo.

’Afro’ ni album igizwe n’indirimbo nka ‘Afro’ ikunzwe muri iyi minsi; iyitwa ‘Ndaraye’; ‘Kalibagiza’, ‘Afrika Ndota’, ‘Kinyaga’, ‘Iyizire Chalala’ n’izindi zitandukanye. Ifite umwihariko w’uko igizwe n’indirimbo ziri mu ndimi enye, Igifaransa, Ikinyarwanda, Icyongereza n’Igiswahili. Yabikoze agamije kugeza ubutumwa ku mubare wagutse.

Eddy Kenzo (hagati) yaje mu bikorwa byo gufata amashusho y’indirimbo yakoranye na Mani Martin
Eddy Kenzo yabimburiye abandi bahanzi bo muri Afurika kwegukana igihembo cya ‘Viewer’s Choice Best New International Artist’ gitangwa na BET Awards
Mani Martin na Eddy Kenzo bagiye gufata amashusho y'indirimbo ’Afro Remix’
Mani Martin yakiriye Eddy Kenzo akigera ku Kibuga cy'Indege Mpuzamahanga cya Kigali

Amashusho y’indirimbo ’Afro’ iri gusubirwamo na Eddy Kenzo na Mani Martin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza