Emmy uba muri Amerika ari kurangiza album ateganya kumurikira i Kigali

Yanditswe na Munyengabe Murungi Sabin
Kuya 17 Mata 2017 saa 12:59
Yasuwe :
0 0

Umuhanzi Nsengiyumva Emmanuel [Emmy] umaze imyaka itanu akorera umuziki muri Leta Zunze Ubumwe za Amerika ageze kure umushinga wa album nshya ateganya kuzamurikira mu Rwanda.

Emmy amaze igihe asohora amashusho ya zimwe mu ndirimbo zigize album ye nshya, yaherukaga gukora iyitwa ‘Ntunsige’ nayo yari yabanjirijwe na ‘Ntari umuntu’ n’izindi. Ubu yashyize hanze indirimbo yise ‘Wabaga he’ afatanyije na Princess Priscillah nayo izasohoka kuri album ari gutegura.

Nk’uko yabitangarije IGIHE, najya kuyimurika azava muri Leta Zunze Ubumwe za Amerika akaza kuyimurika mu gitaramo azakorera mu Rwanda. Yahamije ko azaza gukorera igitaramo i Kigali naramuka abonye abaterankunga bazuzuzana ibihwanye n’ibyifuzo bye.
Uyu muhanzi uba muri Leta Zunze Ubumwe za Amerika kuva mu 2012, yasobanuye ko iyi album yatangiye kuyikoraho mu mwaka wa 2014 gusa azitirwa n’amasomo yatumye atabasha kuyirangiza ngo ijye hanze nk’uko yari yarabiteguye.

Yagize ati “Nk’uko nari nabivuze ubu ndi gutunganya album yanjye ngo ndebe ko yarangira neza nyuma nibwo nzategura gahunda y’ibitaramo bizabera hirya no hino. Ibyo birangiye nibwo nizera ko nazaza mu Rwanda, bizaterwa n’uko abaterankunga bazaboneka bakamfasha gutegura igitaramo gikomeye nifuza gukora.”

Yongeyeho ko asigaye akora umuziki areba ku isoko mpuzamahanga, ngo aririmba ashakisha uburyo umuziki we wazamenyekana muri Afurika y’Uburasirazuba na Afurika yose. Nubwo ari urugamba rukomeye ngo yizeye ko amaherezo azabigeraho.

Ati “Muri iki gihe ndi gukora umuziki ntareba cyane mu Rwanda, ubu ndi gushakisha uburyo nakora umuziki wamenyekana muri Afurika y’Uburasirazuba na Afurika muri rusange. Ndi gukora umuziki wabasha guhangana ku rwego mpuzamahanga, ndi gushakisha uburyo nakora ibintu bikomeye, video nziza n’indirimbo zifite ireme ngo ndebe ko umuziki wacu wazamuka.”

Emmy wiga mu mwaka wa kabiri wa Kaminuza mu ishami rya Petroleum Engineering, yijeje abafana be ko agiye kongera umuvuduko w’uburyo asohoramo indirimbo kugira ngo bakomeze kuryoherwa n’ibihangano bye.

Emmy ari gutunganya album nshya yifuza kuzakorera ibitaramo hirya no hino ku Isi

Yagize ati “Ubu amashuri nabyo biri kugenda, nsigaje nk’imyaka ibiri. Muri iki gihe nabaganyije amasomo nafataga cyane kugira ngo nshyire imbaraga mu muziki, ndashaka guha umuziki umwanya ku buryo byose bizagenda ku muvuduko mwiza kandi ntibibangamirane.”

Indirimbo nshya ya Emmy na Princess Priscillah yakozwe na Producer Lick Lick usanzwe ubakorera umuziki, ngo amashusho yayo azajya hanze mu gihe cya vuba, ubu bari muri gahunda yo kuyanoza.

Princess Priscillah yaririmbye mu ndirimbo nshya ya Emmy yitwa 'Wabaga he'

’Wabaga he’, indirimbo nshya Emmy yahuriyemo na Princess Priscillah


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza