Famemix, ikiraro gishya ku bahanzi bifuza gucuruza umuziki mu Rwanda

Yanditswe na Dusabimana Aimable
Kuya 16 Ugushyingo 2017 saa 05:01
Yasuwe :
0 0

Ikoranabuhanga rikataje mu bice binyuranye by’ubucuruzi ku Isi, ntiryasize no muziki kuko ari kimwe mu byashyize amafaranga atubutse mu mifuka y’abahanzi n’abashoramari kuri ubu bikaba byaratewe imboni no mu Rwanda.

Abatangije Famemix, rumwe mu mbuga rufite na porogaramu zijya muri telefoni, banyotewe no kubona umuziki w’Abanyarwanda ugera ku yindi ntera bigizwemo uruhare n’ikoranabuhanga kandi ukazabasha gutunga abahanzi bawukora bakajya basarura amafaranga mu gucuruza ibihangano byabo.

Ni umushinga ushingiye ku ikoranabuhanga watekerejwe n’abasore babiri b’Abanyarwanda mu buryo basobanura nko gushaka gufasha abahanzi bo mu Rwanda kubasha kungukira mu byo bakora bitanyuze mu bitaramo gusa n’ubundi buryo butandukanye bakunze gukoresha.

Rwibutso Ivan na Manishimwe Jean de Dieu mu kiganiro na IGIHE bavuze ko intego bafite ari ugutera ingabo mu bitugu abahanzi bo mu Rwanda mu rugendo barimo rwo kwiteza imbere no kwagura urwego umuziki wabo uriho. Ikindi bizeye kuri uyu mushinga ni ukwereka urundi rubyiruko ko imbere heza hashoboka ku bihangiye udushya.

Rwibutso Ivan yagize ati "Ni umushinga twatangiranye intumbero zirimo gufasha abahanzi bazwi n’abakizamuka mu Rwanda ndetse no kwiteza imbere nk’urubyiruko, kugeza ubu Famemix ni urubuga rumaze kugeraho indirimbo zisaga 400 zishyizweho n’abahanzi ubwabo ndetse n’abandi runaka baba bemereye kuzikwirakwiza."

Yongeyeho ati "Ikindi ni uko usibye kuba dufasha abahanzi kubaha uburyo bwo gucuruza umuziki wabo, ugize indirimbo ishakwa kenshi kugeza ku nshuro 1000 bimuhesha ishimwe ry’amafaranga agera ku madolari 100, bigakorwa mu buryo bumwe n’ubwifashishwa n’izindi mbuga zakataje muri ibi."

Yavuze ko iryo shimwe ari iryo guha imbaraga umuhanzi mu kurushaho gukorana n’urubuga no kwagura umuziki. Iyo umuhanzi yagiranye amasezerano na ba nyiri umushinga mu kumumenyekanishiriza umuziki no kuwucuruza, konti ye ibonekaho akamenyetso kemeza ko uwo muhanzi ayikoresha.

Mugenzi we, Manishimwe Jean de Dieu, yagarutse ku mvano y’igitekerezo cyabo, yavuze ko bajya gutangira umushinga bahuriye ku ntebe y’ishuri, bombi bize amasomo ajyanye n’ikoranabuhanga mu mashuri yisumbuye nyuma biyemeza kuyakomeza muri Kaminuza ari bakabifatanya n’imishinga bahereye kuri uyu wa Famemix.

Yagize ati "Ni umushinga twatangiriye ku ntebe y’ishuri, twembi twize Computer Science muri Glory Secondary School. Twatangiye gutekereza ibijyanye no kuba twahanga ikoranabuhanga ryihariye ricuruza umuziki w’abanyarwanda nk’abantu tuwukunda, gusa muri icyo gihe hari n’indi mishinga twatekerezaga na n’ubu twifuza kuzashyiramo imbaraga ariko duhereye kuri uyu."

Yongeyeho ati "Iyo umuhanzi yemeye gukorana na twe, ahabwa umwanya twumva ko uhagije kuko byibuze hashobora kujyaho indirimbo 200, iyo urangiye nibwo agura undi mwanya yakwifuza, ariko ubundi mu gutangira bikorerwa ubuntu mu rwego rwo gufasha abahanzi."

Abatangije Famemix bavuga ko ifite umwihariko mu zindi mbuga na porogaramu zikora ibi kuko yo umuhanzi abasha no guhuza indirimbo akazishyira kuri album akaba yayicuruza yose, indirimbo imwe ikuweho igurishwa 300Frw

Uru rubuga rugeraho indirimbo zigisohorwa n'abahanzi ubwabo

Ikoranabuhanga muri iki gihe rimaze gufata indi ntera ndetse abahanzi basigaye baryifashisha nk’uburyo bwo kwinjiza agatubutse. Ibi bizwi neza n’abaherwe bo muri USA n’ibindi bihugu bagiye bashora imari mu gucuruza indirimbo kuri murandasi.

Urugero rwa vuba rubera isomo benshi rukanatera imbaraga abakangukiye ibi, ni urwa Tidal yaguzwe na Jay Z akayishoramo miliyoni z’amadolari 56.2 ayiguze n’abanya-Suède hanyuma agahamo abahanzi batandukanye imigabane ingana na 3%, barimo Rihanna, Kanye West, Usher n’abandi.

Ni urubuga rubonekaho indirimbo nyinshi z’abahanzi bakomeye, za album nshya,… zigera kuri Tidal mbere y’uko zijya ahandi hamenyerewe nko kuri YouTube na iTunes, bigafasha abaruyobora n’abahanzi bakorana na rwo gusarura amafaranga mu muziki bacuruza kuko abakunzi bawo, buri wese aba ashaka ko umugeraho mbere.

Abahanzi batandukanye batangiye gukorana na Famemix mu kugirisha umuziki wabo
Famemix iboneka no kuri telefoni zigendanwa
Uru rubuga rugeraho indirimbo zigisohorwa n'abahanzi ubwabo
Rwibutso yavuze ko urubuga rumaze gushyirwaho indirimbo zirenga 400

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza