Filime ya Dusabejambo yegukanye igihembo mu iserukiramuco ryo muri Madagascar

Yanditswe na Uwiduhaye Theos
Kuya 28 Mata 2019 saa 01:55
Yasuwe :
0 0

Filime yitwa ‘Icyasha’ ya Dusabejambo Marie Clémentine yegukanye igihembo mu Iserukiramuco rikomeye muri Afurika rya Rencontres du Film Court ryo muri Madagascar ryabaga ku nshuro ya 14.

Filime ya Dusabejambo yari ihatanye n’izindi zirimo iz’Abanya-Maroc, Algérie, Madagascar, Cameroun, Sénégal n’ahandi.

Mugisha Emmanuel wagaragaye muri iyo filime ari umukinnyi w’imena na we yari ari mu cyiciro cy’umukinnyi witwaye neza, ariko ntiyabashije kwegukana igihembo.

‘Icyasha’ yegukanye igihembo cyahawe inyito ‘Zébu d’Or Panafricain’ mu cyiciro cya filime ngufi yari irimo.

Dusabejambo yanditse ku rukuta rwe rwa Facebook ashimira abo bafatanyije gukora iyi filime, anavuga ko umwana witwa Mugisha Emmanuel wayigaragayemo ari umukinnyi w’imena afite ubuhanga bwihariye.

Dusabejambo Marie Clémentine wayoboye iyi filime, ni umukobwa w’imyaka 32 wavukiye mu Mujyi wa Kigali.

‘Icyasha’ yegukanye igihembo muri Rencontres du Film Court 2019 irimo ubuzima bw’umwana w’umuhungu, uba akunda gukina umupira w’amaguru ariko kubera kugira imyitwarire nk’iy’abakobwa, bagenzi be bakabimwangira.

Yaje kwisanga mu Isi agomba kwerekana ko benshi bamwibeshyaho bakamukekera ibindi, akerekana ko ari umuhungu nk’abandi bose.

Iyi filime ye ‘Icyasha’ mu mwaka ushize yitabiriye amaserukiramuco atandukanye, yari iri mu zahataniye ibihembo bya Baobab Awards in Film Africa 2018 bitangirwa mu Bwongereza ndetse mu ntangiriro za 2019 yari ihatanye mu iserukiramuco rya sinema rikomeye muri Afurika rya FESPACO.

Uyu mukobwa ni we wanditse filime ya Yves Montand Niyongabo yitwa ‘Maibobo’ yagiye hanze mu 2009. Iyi filime yamuhesheje ikuzo kubera amaserukiramuco atandukanye yitabiriye arimo Rotterdam International Film Festival, The Göteborg Film Festival na The Film Festival yabereye muri Afurika, Asia n’indi migabane.

Mu 2010 yatangiye umushinga wa filime ye ‘Lyiza’ ivuga inkuru ku byabaye muri Jenoside yakorewe Abatutsi, kwibuka n’ubumwe n’ubwiyunge, yagiye hanze mu 2011.

Yerekanywe mu maserukiramuco atandukanye akomeye hirya no hino ku Isi arimo Tribeca Film Festival, inamuhesha igihembo muri Carthage Film Festival.

“A Place for Myself” yavugiyemo imibereho n’ubuzima bw’abafite ubumuga bw’uruhu, yavuzemo umukobwa w’imyaka itanu uhabwa akato n’abandi banyeshuri bigana nawe, agashakisha ubuhungiro mu kigo yajya yihereramo atari kumwe n’abandi.

Yamuhesheje ibihembo birimo icyitiriwe Thomas Sankara muri Panafrican Film & Television Festival cyatanzwe mu 2017, i Ouagadougou muri Burkina Faso.

Dusabejambo ni umwe mu bakoze ku mishinga ya filime zerekanwe mu iserukiramuco rya Zanzibar International Film Festival (ZIFF) 2018.

Dusabejambo yaherewe igihembo muri Madagascar aho yari amaze igihe yaritabiriye iserukiramuco rya 'Rencontres du Film Court'
Ibyishimo byari byose kuri Dusabejambo nyuma yo kwegukana igihembo
‘Icyasha’ yanditswe na Duysabejambo yegukanye igihembo cyahawe inyito ‘Zébu d’Or Panafricain’ mu cyiciro cya filime ngufi yari ihatanyemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza