Gaël Faye yahawe igihembo na Minisiteri y’Uburezi mu Bufaransa

Yanditswe na Munyengabe Murungi Sabin
Kuya 17 Ugushyingo 2016 saa 03:54
Yasuwe :
0 0

Gaël Faye, umuraperi w’Umunyarwanda ufite inkomoko mu Bufaransa amaze amezi abiri asohoye igitabo cya mbere yise ‘Petit Pays’, ubu kiri mu bikunzwe cyane ku Mugabane w’u Burayi by’umwihariko mu Bufaransa aho bamuha ibihembo ubutitsa.

Igitabo cya Gaël Faye cyahawe igihembo gikomeye cyane mu Bufaransa cyitwa ‘Prix Goncourt des lycéens’ gitangwa na Fnac[ Fédération nationale d’achats] ifatanyije na Minisiteri y’Uburezi muri iki gihugu.

Gaël Faye yari amaze icyumweru kimwe ahawe ikindi gihembo gikomeye cya Prix du Premier Roman (First Novel Prize) gisanzwe gitangwa ku banditsi batarubaka izina bari mu kigero cy’imyaka hagati ya 18 na 30.

Igihembo ‘Prix Goncourt des lycéens’ umwaka wa 2016 cyahawe Faye ukomoka mu Rwanda ku bw’igitabo cye yise "Petit Pays" cyacapiwe mu Bufaransa mu nzu yitwa Grasset. Asimbuye umwanditsi witwa Delphine de Vigan wahawe iki gihembo muri 2015 kubera igitabo yise "D’après une histoire vraie"[iki gitabo kimaze kugurishwa kopi zigera kuri 450.000].

Gaël Faye w’imyaka 34 yahawe iki gihembo na Minisiteri y’Uburezi ifatanyije na Fnac[ikigo gishinzwe gukwirakwiza ibihangano haba indirimbo, ibitabo, filime n’ubundi buhanzi bwose], by’umwihariko inacuruza ibitabo kuri internet.

Muri Nzeri 2016, iyi Fnac yahembye Gaël Faye nk’umwanditsi mwiza w’umwaka mu cyiciro cy’abanditse ibitabo byo mu bwoko bwa Roman. Icyo gihe ‘Petit Pays’ cyatoranyijwe mu bitabo 650 byitabiriye irushanwa uyu mwaka.

Gael Faye amaze guhabwa ibihembo bine mu mezi abiri amaze asohoye igitabo cye

Iki gihembo cya ‘Prix Goncourt des lycéens’ Faye yahawe cyatangiye gutangwa mu 1988, gitangwa ku mwanditsi wahawe amanota menshi n’akanama k’abanyeshuri b’abasomyi 2 000.

Huffungton Post yatangaje ko umuyobozi w’akanama nkemurampaka katanze iki gihembo, Margaux Compte yamenyesheje Faye kuri telefone amubwira ko ari we watsinze. Gaël Faye ngo yahise avuga ko ‘ari iby’ikirenga kuba bamutoranyije’.

Ibitabo 14 byari bihanganiye iki gihembo cyatanzwe ku nshuro ya 29, guhitamo icyahize ibindi byari bimaze amezi abiri bikorwa n’abasomyi. Aba basomyi kandi bagiranye ibiganiro mpaka n’abanditsi babyo nyuma banahura n’akanama nkemurampaka ari nako kafashe umwanzuro ko Gaël Faye ari we watsinze.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244