Kwamamaza

Gahongayire ati ‘Umugisha wanjye si umugabo n’urubyaro’

Yanditswe kuya 18-10-2016 saa 10:23' na Munyengabe Murungi Sabin


Umuhanzi Aline Gahongayire uzwi mu cyiciro cy’abaririmba izihimbaza Imana yeruye ko atajya acibwa intege n’amagambo amunenga abantu bamuvugaho mu buzima bwe bwite n’ibyo anyuramo.

Gahongayire yari amaze igihe azenguruka muri Amerika aho yakoreye ibitaramo muri muri Leta zigera kuri cumi n’imwe. Yagiyeyo nk’umwe mu bahanzi bakomeye batumiwe mu giterane cya ‘Rwanda Christian Convention’.

Yabwiye IGIHE ko yagiyeyo atagambiriye kuzabona inyungu y’amafaranga ahubwo ko yashakaga kwifatanya n’ubwoko bw’Imana mu guhimbaza agasohora ibimurimo.

Ati “Nagiye muri Leta zigera kuri cumi n’imwe, nakoze ibitaramo, nahakuye ubufatanye n’abandi bahanzi ndetse n’abatunganya indirimbo bakomeye. Intego yanjye cyane yari uguhimbaza Imana ikindimo kigasohoka […] Inyungu y’amafaranga ntabwo ari yo yari intego yanjye cyane.”

Yashimangiye ko ataciwe intege n’ibyamuvuzweho nyuma yo gutangaza ko yatandukanye burundu n’umugabo kuko ngo ‘icyo ashyize imbere ni ukuzuza isezerano afitanye n’Imana atitaye ku magambo y’abantu’.

Ati “Niba hari umuntu uvugwa nabi utukwa mu itangazamakuru ndi uwa mbere ariko ibyo byose ntabwo bijya binca intege. Njya mu masengesho nkabwira Imana ngo ntibingireho ingaruka […] Nonese ko ari wo musozi Imana yanteretseho mbigire gute? Ariko hari benshi bacitse intege babivamo, hari abana batinya kujya mu muziki, hari impano nyinshi ziryamye kubera gutinya gutukwa.”

Gahongayire yavuze ko kuva yatangira kwigaragaza nk’icyamamare mu mwaka wa 2006 [akimara gukina muri filime Ikigeragezo cy’ubuzima] kugeza ubu ngo yanyuze muri byinshi byiganjemo ibyamucaga intege ariko amaze gukomera.

Ati “Kuva natangira nabonaga ibitekerezo byinshi binca intege nkumva nabivamo ariko ubu aho ngeze singicika intege. Wamvuga nabi ibyo birakureba kuko nzi aho ndi kwerekeza. Imbaraga nzikura muri Yesu, naho abantu bandeka uwo negamiye ntanyeganyega.”

“Erega si njye, ni Kirisitu uri muri njye. Nitekerejeho nk’umuntu sinagakwiye no kuba ngisohoka kubera abantu ariko ibyo bavuga ni bla bla, nitaye ku cyo Imana iri kumvugaho. “

Aline Gahongayire yari amaze igihe akorera ibitaramo muri Amerika

Aline Gahongayire yavuze ko imigirire ye n’ibyo atekereza bitandukanye n’ibyo abantu bamwaturiraho kuko ngo umugisha kuri we atawubonera mu rushako cyangwa kubyara.

Ati “Ntabwo bizambuza gukorera Imana, nabana n’umugabo natandukana n’umugabo, nabyara, ntabyara nagira gute umugisha nyamukuru mfite ni Imana.”

Ntaratekereza undi mugabo

Yavuze ko gusenyuka k’urugo rwe byamubabaje ariko ko yizeye kuzabona ibyiza byinshi nyuma y’ibibazo amaze iminsi acamo.

Ati “Ukuri ni uko, bibaho nyine iyo wubaka uraryoherwa wasenya bikababaza […] Imana ifite impamvu, gusa sinzabipfiramo. Simbereyeho guhindurwa n’amateka ahubwo ngomba guhindura amateka, nyuma y’ibi hari ibindi byiza kandi ndabitegereje.”

Gahongayire ntaratekereza gushaka undi mugabo kuko ngo hari ibikomere bikeneye komorwa yasigaranye. Ati “Oya, kugeza ubu ntabwo icyo gihe kiragera, ukuri ni uko hari ibisebe biba bigikeneye gukandwa, igihe kizagera.”


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved